ដំណឹងសេដ្ឋកិច្ច

អ៊ឺរ៉ុបលប់ចោល​ការអនុគ្រោះពន្ធ​លើ ផលិតផលអង្ករ ពីកម្ពុជា​និង​ភូមា

ពីរាជធានី ព្រុយហ្សែល (ប្រទេសប៊ែលហ្សិក) សហភាពអ៊ឺរ៉ុបបានប្រកាស ក្នុងថ្ងៃទី១៦ ខែមករា ឆ្នាំ២០១៩ យកពន្ធអាករ​ឡើងវិញ​ទៅលើ ផលិតផលអង្ករ ដែលត្រូវបាននាំចូល ពីប្រទេសកម្ពុជា និងពីប្រទេសភូមា។ ការកំណត់ ឲ្យ​ផលិតផលអង្ករ ពីប្រទេសទាំងពីរ ត្រូវបង់ពន្ធ នឹងត្រូវអនុវត្តន៍ ចាប់ពីថ្ងៃសុក្រទី១៨ ខែមករា ឆ្នាំ២០១៩នេះតទៅ។

សម្រាប់គណៈកម្មការ នៃសហភាពអ៊ឺរ៉ុប បានពន្យល់ ពីការសម្រេចចិត្តរបស់ខ្លួនថា ការកំណត់ខាងលើ ធ្វើឡើងបន្ទាប់ពីមានការកើនឡើងខ្លាំង នៃការនាំចូលអង្ករ ប្រភេទ «Indica» ពីប្រទេសកម្ពុជា និងភូមា នៅក្នុងលំហរទីផ្សារអ៊ឺរ៉ុប សម្រាប់រយៈពេល៥ឆ្នាំចុងក្រោយ ហើយថា ការកើនឡើងនេះ បានធ្វើឲ្យខូច ដល់ផលប្រយោជន៍សេដ្ឋកិច្ច សម្រាប់កសិករ (ក៏ដូចជាផលិតករអង្ករ) នៅក្នុងបណ្ដាប្រទេស ជាសមាជិកសហភាព។

គណ‍កម្មាការអ៊ឺរ៉ុប បានពន្យល់ទៀតថា អង្ករដែលនាំចូល ពីទ្វីបអាស៊ី មានតម្លៃថោកយ៉ាងច្រើន ជាងអង្ករដែលផលិត នៅក្នុងទីផ្សារអ៊ឺរ៉ុបខ្លួនឯង ដែលធ្វើអាត្រាតួលេខ នៃផលិតផលអង្ករ ក្នុងបណ្ដាប្រទេសជាសមាជិក សម្រាប់រយៈពេល៥ឆ្នាំដូចគ្នា បានធ្លាក់ចុះ ពី៦១% មកនៅត្រឹមតែ ២៩%។

បើតាមឯកសារ ដែលទស្សនាវដ្ដី មនោរម្យ.អាំងហ្វូ ទទួលបាន បានបង្ហាញថា ការកំណត់ពន្ធអាករ ទៅលើផលិតផលអង្ករនេះ មានរយៈពេល៣ឆ្នាំ ក្នុងកម្រិត ១៧៥អ៊ឺរ៉ូ ក្នុង១តោន សម្រាប់ឆ្នាំដំបូង – ១៥០អ៊ឺរ៉ូ ក្នុង១តោន សម្រាប់ឆ្នាំបន្ទាប់ និង១២៥អ៊ឺរ៉ូ សម្រាប់ឆ្នាំទី៣។

កាលពីខែកុម្ភៈ ឆ្នាំកន្លងទៅ ប្រទេសអ៊ីតាលីបានស្នើ ឲ្យមានចំណាត់ការ ដើម្បីមានការការពារ ទៅលើផលិតផលអង្កេរ ក្នុងសហភាពអ៊ឺរ៉ុប។ ហើយសំណើរនេះ ត្រូវបានគាំទ្រដោយប្រទេសផ្សេងទៀត ដូចជាប្រទេសអេស្ប៉ាញ បារាំង ព័រទុយហ្គាល់ ក្រិច ហុងគ្រី រូម៉ានី និងប្រទេសប៊ុយហ្គារីជាដើម។

ក្នុងឆ្នាំ ២០១៦កន្លងទៅ ប្រទេសកម្ពុជាបាននាំចេញ​នូវ ផលិតផលអង្ករ ចូលមកក្នុងទីផ្សារសហភាអ៊ឺរ៉ុប ប្រមាណជា ៣៤៥ពាន់តោន ទល់នឹងបរិមាណ តែ៨ពាន់តោន ក្នុងឆ្នាំ២០០៩។

គួរបញ្ជាក់ដែរថា ការអនុគ្រោះពន្ធទៅលើ ផលិតផលអង្ករ ជាផ្នែកមួយ នៃកម្មវិធីប្រព័ន្ធអនុគ្រោះពន្ធ របស់សហភាពអ៊ឺរ៉ុប ហៅកាត់ថា «EBA» ដែលសហភាពអ៊ឺរ៉ុប បានផ្ដល់ទៅឲ្យប្រទេសកម្ពុជា និងភូមា ដើម្បីអាចនាំចេញផលិតផលគ្រប់យ៉ាង លើកលែងតែអាវុធ ចូលមកក្នុងលំហរទីផ្សារ នៃសហភាពអ៊ឺរ៉ុប ដែលមានសមាជិក២៨ប្រទេស (រាប់ទាំងចក្រភពអង់គ្លេស ព្រោះប្រទេសនេះ នៅជាសមាជិកសហភាពនៅឡើយ)។

ប៉ុន្តែការរកឃើញ ពីភាពមិនអើពើ នៃរបបដឹកនាំរបស់លោក ហ៊ុន សែន ក្នុងការងាកត្រឡប់ មករកការដឹកនាំ បែបប្រជាធិបតេយ្យសេរី ពហុបក្ស និងការគោរពសិទ្ធិមនុស្ស ឲ្យបានត្រឹមត្រូវវិញនោះ បានតម្រូវឲ្យសហភាពអ៊ឺរ៉ុប បើកនីតិវិធី ដែលមានរយៈពេល៦ខែ និងបន្ថែម៦ខែទៀត ដើម្បីដកប្រព័ន្ធ​អនុគ្រោះពន្ធ​ខាងលើ ចេញពីប្រទេស​កម្ពុជា។ នីតិវិធីនេះ ត្រូវបានសហភាពអ៊ឺរ៉ុប ជូនដំណឹងទៅប្រទេសកម្ពុជា កាលពីខែតុលា ឆ្នាំ២០១៨កន្លងទៅ៕



You may also like

កម្ពុជា

ហ៊ុន សែន បន្ត​និយាយ​ឆ្លើយឆ្លង​ ជាមួយ​«ឆ្កែ»

មេដឹកនាំកម្ពុជា លោក ហ៊ុន សែន បានថ្លែងហៅលោក សម រង្ស៊ី ថាជា«ឆ្កែ»យ៉ាងពេញមាត់ ខណៈបុរសខ្លាំងនៅក្នុងអំណាច តាំងពីជាង៣៤ឆ្នាំរូបនេះ បានលើកឡើងជាបន្តបន្ទាប់ ថាលោកឈប់ឆ្លងឆ្លើយ ជាមួយមេដឹកនាំប្រឆាំងទៀតហើយ។ ...
កម្ពុជា

សម រង្ស៊ី ប្រកាស​«សង្គ្រាមចិត្តសាស្ត្រ»ដើម្បីឲ្យ​កងទ័ព​ឈប់​ការពារ ហ៊ុន សែន

ពីទីក្រុង យូស្ដុន សហរដ្ឋអាមេរិក លោក សម រង្ស៊ី ប្រធានស្ដីទីគណបក្សសង្គ្រោះជាតិ បានថ្លែងអះអាងជាថ្មី ថាលោកត្រូវវិលត្រឡប់ ចូលមកដឹកនាំចលនាប្រឆាំង នៅក្នុងប្រទេសកម្ពុជា ឲ្យខាងតែបានក្នុងឆ្នាំ២០១៩នេះ ហើយត្រៀមធ្វើ«សង្គ្រាមចិត្តសាស្ត្រ»មួយ ...
ដំណឹង

EU បរិហារសំដី ពូទីន ដែល​បង្ហាញពី​«ក្ដី​អស់សង្ឃឹម​របស់គាត់»

ការថ្លែងជាថ្មី របស់លោក វ្លាឌីមៀរ ពូទីន (Vladimir Poutine) ប្រធានាធិបតីរ៉ុស្ស៊ី បង្ហាញពី«ក្ដី​អស់សង្ឃឹម​របស់គាត់» នៅក្នុងសង្គ្រាមឈ្លានពានប្រទេសអ៊ុយក្រែន ដែលបានប្រព្រឹត្តិទៅ អស់ជាង៦ខែកន្លងមកហើយ។ នេះ ជាប្រតិកម្មខ្លាំងៗរបស់មេដឹកនាំសហភាពអ៊ឺរ៉ុប ...

Comments are closed.

ដំណឹង

សង្គ្រាមនៅអ៊ុយក្រែន ៖ អាមេរិកផ្ដល់ភ្លើងខៀវបញ្ជូនយន្តហោះ«F-16»

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

អ្នកជំនាញមួយក្រុមរបស់អង្គការសហប្រជាជាតិ បានអំពាវនាវទៅ​របបដឹកនាំរបស់លោក ហ៊ុន សែន ឲ្យដោះលែងអ្នកស្រី សេង ធារី មេធាវីខ្មែរអាមេរិកាំង ដែលគេស្គាល់ក្នុងពេលកន្លងមក ថាជា«ស្ត្រីសេរីភាព» តាមរយៈសម្លៀកបំពាក់តែងខ្លួនសម្ដែងមតិរបស់អ្នកស្រី នៅខាងមុខសាលាដំបូងរាជធានីភ្នំពេញ។ ក្រុមអ្នកជំនាញប្រឆាំងការឃុំឃាំងតាមទំនើងចិត្ត ...
កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...