Covid-19៖ កម្ពុជាមាន២ករណីទៀត ជាអ្នកដំណើរមកពី ឥណ្ឌូនេស៊ី
ពីចំណោមអ្នកដំណើរ៤៦នាក់ ដែលជិះយន្ដហោះ មកពីប្រទេស ឥណ្ឌូនេស៊ី ប្រទេសកម្ពុជា បានរកឃើញករណីឆ្លង ជំងឺ«Covid-19» ចំនួនពីរនាក់ ដែលជាជនជាតិខ្មែរ។ នេះ បើតាមសេចក្តីប្រកាសព័ត៌មាន របស់ក្រសួងសុខាភិបាលកម្ពុជា ដែលបានធ្លាក់មកដល់ដៃអ្នកសារព័ត៌មាន នៅមុននេះបន្តិច។
ជនជាតិខ្មែរទាំងពីរនាក់ ជាបុរសអាយុ ២៩ឆ្នាំ និងបុរសអាយុ ២២ឆ្នាំ ដែលមានអាស័យដ្ឋាន នៅខេត្តកំពង់ចាម។ បើតាមសេចក្ដីប្រកាសព័ត៌មាន បានឲ្យដឹងថា បុរសទាំងពីរនាក់ បានស្ថិតក្នុងចំណោម អ្នកដំណើរសរុប ៤៦នាក់ (ក្នុងនោះស្ត្រី ២៤នាក់) ដែលជិះក្នុងយន្ដហោះ ហោះត្រង់ពី ឥណ្ឌូនេស៊ី មកកម្ពុជា កាលពីថ្ងៃទី១២ ខែមិថុនា ឆ្នាំ២០២០។
ក្រសួងសុខាភិបាល បានបន្តថា ពីក្នុងចំណោមអ្នកដំណើរទាំងអស់ មានជនជាតិខ្មែរចំនួន ៤២នាក់ (ស្រី ២២នាក់) និងជនជាតិឥណ្ឌូណេស៊ី ចំនួន ០៤នាក់ (ស្រី ០២នាក់ ក្នុងនេះ មានកុមារីអាយុ ០៤ឆ្នាំ ០១នាក់)។
អ្នកដំណើរចំនួន ៤៤នាក់ ដែលត្រូវបានធ្វើតេស្ដិ៍ ចេញលទ្ធផលអវិជ្ជមាន ត្រូវបានដាក់ឱ្យធ្វើចត្តាឡីស័ក ចំនួន ១៤ថ្ងៃ នៅមណ្ឌលចត្តាឡីស័កជម្ពូន១ មណ្ឌលចត្តាឡីស័ក នៅតាមបណ្ដាខេត្ត ដែលបុគ្គលរស់នៅ (សម្រាប់អ្នក ដែលមិនមានលទ្ធភាព បង់ថ្លៃសណ្ឋាគារ) និងនៅក្នុងសណ្ឋាគារមួយ ក្នុងរាជធានីភ្នំពេញ (សម្រាប់អ្នក ដែលជ្រើសរើសយក ការបង់ថ្លៃសណ្ឋាគារ) ដើម្បីតាមដានសុខភាពបន្តទៀត។
ការរកឃើញករណីពីរខាងលើ បានបន្ថែមតួលេខ ឲ្យប្រទេសកម្ពុជា មានករណីជំងឺ «Covid-19» កើនឡើងដល់១២៨ករណី ក្នុងនោះមាន១២៥នាក់ បានជាសះស្បើយ និង៣នាក់ទៀត កំពុងសម្រាកព្យាបាលនៅឡើយ ក្នុងមន្ទីរពេទ្យ។
អ្នកជំងឺ៣នាក់ ដែលកំពុងសម្រាកព្យាបាលនោះ មានជនជាតិខ្មែរ១នាក់ ដែលទើបវិលត្រឡប់ ពីប្រទេសហ្វីលីពីន និងជនជាតិខ្មែរ២នាក់ ដែលទើបត្រឡប់ មកពីប្រទេសឥណ្ឌូនេស៊ី នេះតែម្តង៕
