ចាប់ពីថ្ងៃចូលឆ្នាំចិនឆ្នាំ២០២១នេះតទៅ លោក ហ៊ុន សែន នាយករដ្ឋមន្ត្រីកម្ពុជាបានផ្ញើរសារ ជូនពរពលរដ្ឋខ្មែរ ឲ្យជួបតែសំណាងល្អ ជោគជ័យ និង«ហេងហេង»។ នេះ បើតាមសំណេររបស់បុរសខ្លាំងរូបនេះ ដែលបង្ហោះនៅលើបណ្ដាញសង្គម កាលពីមុននេះបន្តិច។
សំណេររបស់លោក ហ៊ុន សែន ដែលចូលរួម«អបអរសាទរ» នៅក្នុងថ្ងៃសែនចូលឆ្នាំចិន នៅថ្ងៃទី១១ ខែកុម្ភៈ ឆ្នាំ២០២១នេះ បានសរសេរទៅកាន់បណ្ដាជន ដែលប្រារព្ធពិធីបុណ្យចូលឆ្នាំនេះ ឲ្យធ្វើការប្រុងប្រយ័ត្ន ក្នុងគ្រោះអគ្គិភ័យ និងគ្រោះថ្នាក់ចរាចរណ៍ ដែលអាចកើតឡើង ដោយការធ្វេសប្រហែសណាមួយ។
មេដឹកនាំរដ្ឋាភិបាលបានរំឭក ឲ្យបន្តចូលរួមបង្កាជំងឺរាតត្បាតកូវីដ-១៩ (Covid-19) ដោយត្រូវអនុវត្តតាមការណែនាំ របស់ក្រសួងសុខាភិបាល។ បន្ទាប់មកបុរសខ្លាំង នៅកម្ពុជា ដែលអង្គុយក្នុងអំណាច តាំងពីជិត៤០ឆ្នាំ បានសរសេរឡើងថា៖
«ខ្ញុំ និងភរិយា សូមជូនពរបងប្អូនជនរួមជាតិ ជួបតែសំណាងល្អ ជោគជ័យ និង”ហេងហេង”គ្រប់ៗគ្នា ចាប់ពីក្នុងថ្ងៃចូលឆ្នាំចិន ២០២១ នេះតទៅ។»
បើតាមក្បួនតម្រាបុរាណ បានឲ្យដឹងថា ពិធីបុណ្យចូលឆ្នាំចិន ក្នុងឆ្នាំ២០២១នេះ ប្រព្រឹត្តិទៅចាប់ពីថ្ងៃទី១១ ខែកុម្ភៈ ដែលត្រូវជាថ្ងៃសែន ខណៈថ្ងៃចូលឆ្នាំ គឺចាប់ពីថ្ងៃទី១២ ដល់ថ្ងៃទី១៤ ខែកុម្ភៈខាងមុខ៕
