ហ៊ុន សែន តម្រូវឲ្យចៅប្រុសទាំងអស់ ត្រូវចេះលេងកីឡា៣ប្រភេទ
កើតមកជាចៅប្រុស របស់នាយករដ្ឋមន្ត្រីកម្ពុជា ត្រូវចេះលេងកីឡា៣ប្រភេទ ! នេះ បើតាមការបង្ហោះសារ របស់លោកនាយករដ្ឋមន្ត្រី ហ៊ុន សែន នៅលើបណ្ដាញសង្គម កាលពីមុននេះបន្តិច។
អមនឹងរូបថតជាច្រើន ដែលបង្ហាញ ពីការបីបមចៅស្រី ទី២១របស់លោក និងការជួបជុំចៅប្រុសស្រីច្រើននាក់ លោក ហ៊ុន សែន បានបង្ហើបថា ចៅស្រីដែលទើបនឹងចាប់កំណើតម្នាក់នេះ មានឈ្មោះ ម៉ាលីយ៉ា ហើយថាឈ្មោះនេះ ត្រូវជាមួយឈ្មោះម្ដាយ ដែលមិនពិបាកសរសេរ។ លោកថា៖
«ទើបបានជួប និងបីចៅស្រីទី២១ មុននេះបន្តិច។ ឪពុកម្តាយគេ បានដាក់[ឈ្មោះ]ថា ម៉ាលីយ៉ា (Malya) ឆ្លាតគ្រាន់បើ ម្តាយឈ្មោះម៉ាលី ឯកូនឈ្មោះម៉ាលីយ៉ា មិនពិបាកសរសេរ។»
លោកបន្តថា ពីក្នុងចំណោមចៅទាំង២១នាក់ ចៅ១២នាក់ ជាប្រុស និង៩នាក់ ជាស្រី។ បន្ទាប់មកលោក ហ៊ុន សែន បានបង្ហាញពីបំណងរបស់លោក ដែលតម្រូវឲ្យចៅប្រុសទាំងអស់ ត្រូវចេះលេងកីឡា៣ប្រភេទ គឺបាល់ទាត់ បាល់ទះ និងបាល់បោះ។
បុរសខ្លាំងកម្ពុជា បានបន្តថា៖
«ក្នុងចំណោមចៅ២១នាក់ មានប្រុសចំនួន១២នាក់ និងស្រី៩នាក់ គ្រប់គ្រាន់ដើម្បីបង្កើតក្រុមបាល់ទាត់បុរស មួយក្រុម បាល់ទះបុរស មួយក្រុម បាល់បោះបុរស មួយក្រុម និងបង្កើតក្រុមបាល់ទះនារី មួយក្រុម។ ចង់បានដូចនេះ ចៅប្រុសទាំងអស់ ត្រូវចេះលេង៣ប្រភេទកីឡា គឺបាល់ទាត់ បាល់ទះ និងបាល់បោះ។»
តែជីតាវ័យ៦៧ឆ្នាំរូបនេះ បានទប់អារម្មណ៍ របស់លោកមកវិញ ដោយសរសេរ នៅទីបញ្ចប់ថា៖
«នេះគ្រាន់តែជាគិតរបស់ជីតា តែមិនដឹងថា ចៅៗនឹងធ្វើតាមយើង ឬអត់?»
