«ពាក់ម៉ាស់» ៖ ពិធីទទួលព្រះមហាក្សត្រ សម្ដេច នរោត្ដម សីហមុនី និងព្រះមហាក្សត្រី សម្ដេច មុនីនាថ សីហនុ ដែលយាងត្រឡប់ ពីប្រទេសចិន ក្នុងរសៀលថ្ងៃចន្ទនេះ មានលក្ខណៈខុសគ្នាទាំងស្រុង ពីពិធីថ្វាយព្រះរាជដំណើរ ចាកចេញពីកម្ពុជា កាលពីដើមខែមេសា។
នោះ គឺនៅថ្ងៃនេះ មន្ត្រីរដ្ឋាភិបាល គ្រាក់ៗទាំងអស់គ្នា សុទ្ធតែ«ពាក់ម៉ាស់» រាប់ទាំងលោកនាយករដ្ឋមន្ត្រី ហ៊ុន សែន ផង ក្នុងការទៅទទួល ព្រះរាជដំណើរមាតុភូមិនិវត្តន៍ នៅព្រលានយន្ដហោះអន្តរជាតិភ្នំពេញ។
ការពាក់ម៉ាស់ព្រោងព្រាតនេះ ធ្វើឡើង ក្នុងខណៈប្រទេសកម្ពុជា រកមិនឃើញករណីឆ្លងថ្មី នៃជំងឺ«Covid-19»តាំងពីច្រើនសប្ដាហ៍មកហើយ។ តួលេខករណីឆ្លង ដែលចេញផ្សាយ ដោយអាជ្ញាធរកម្ពុជា មានចំនួន១២២នាក់ ខណៈមនុស្ស១២០នាក់ បានជាសះស្បើយ ពីជំងឺនេះ។
ផ្ទុយទៅវិញ ក្នុងពិធីយាងព្រះរាជដំណើរ ចេញពីរាជធានី ភ្នំពេញ កាលពីព្រឹកថ្ងៃទី១ ខែមេសា ឆ្នាំ២០២០ មេដឹកនាំរដ្ឋាភិបាលទាំងអស់គ្នា សុទ្ធតែទុកមុខទទេរ មិនមានឃើញ«ពាក់ម៉ាស់»នោះទេ (រូបខាងក្រោម)។
លោក ហ៊ុន សែន ខ្លួនលោក ក៏មិនសូវជាឃើញពាក់ម៉ាស់ដែរ នៅក្នុងពិធីបុណ្យសព ម្ដាយក្មេករបស់លោក ទាំងនៅក្នុងគេហដ្ឋាន នៅរាជធានីភ្នំពេញ និងនៅពិធីដង្ហៃសព យកទៅបញ្ចុះ នៅខេត្តត្បូងឃ្មុំ៕
