កម្ពុជាដំណឹង

នីតិរដ្ឋកម្ពុជា ជាប់លេខនៅ​«បាត​តារាង»​របស់​គម្រោង​យុត្តិធម៌​ពិភពលោក

មិនអន់ដល់ចុងក្រោយគេបង្អស់ទេ តែគ្រាន់ជាងចំណាត់ថ្នាក់ចុងក្រោយបង្អស់មួយ​លេខ។ «គម្រោងយុត្តិធម៌ពិភពលោក» ដែលជាកម្មវិធី របស់អង្គការសង្គមស៊ីវិលអន្តរជាតិ​មួយ មានទីតាំងក្នុងរដ្ឋធានីវ៉ាស៊ីនតោន (សហរដ្ឋអាមេរិក) បានដាក់​លេខ​«បាត​តារាង»​ជិតចុងក្រោយគេបង្អស់នេះ ឲ្យដល់កម្រិតនីតិរដ្ឋនៅកម្ពុជា។

របាយការណ៍របស់ «គម្រោងយុត្តិធម៌ពិភពលោក (World Justice Project)» ស្ដីពីកម្រិតនីតិរដ្ឋនៅតាមប្រទេសចំនួន១១៣ នៅក្នុងពិភពលោក ដែលចេញផ្សាយក្នុងដើមខែកុម្ភៈនេះ បានផ្តល់ពិន្ទុ ០,៣២ ឲ្យកម្ពុជាសម្រាប់ការគោរព-អនុវត្តច្បាប់ អភិបាលកិច្ច ការប្រឆាំងអំពើពុករលួយ សន្តិសុខ​សណ្ដាប់ធ្នាប់ និងប្រព័ន្ធយុត្តិធម៌ ដែលត្រូវនឹងចំណាត់ថ្នាក់លេខ ១១២ លើ១១៣។ ចំណាត់ថ្នាក់នេះ មិនបានផ្លាស់ប្ដូរទេ បើធៀបនឹងឆ្នាំមុន។

តារាងចំណាត់ថ្នាក់ ឆ្នាំ២០១៧-២០១៨ របស់គម្រោងអន្តរជាតិខាងលើ បានបង្ហាញថា ប្រទេសដែលអន់ជាងគេកម្ពុជា មានតែមួយប៉ុណ្ណោះ គឺប្រទេសវេណេស៊ុយអេឡា ដែលជាប់លេខ១១៣ (ជាមួយពិន្ទុ ០,២៩)។ ផ្ទុយទៅវិញប្រទេស អាហ្វហ្គានីស្ដង់ ដែលមេដឹកនាំកម្ពុជា​តែង​រិះគន់ថា ញាំញីដោយសង្គ្រាមនោះ ជាប់លេខ១១១ ជាមួយពិន្ទុ ០,៣៤ ស្ថិតនៅលើកម្ពុជា។

បើនិយាយនៅក្នុងតំបន់ ចំណាត់ថ្នាក់ជិតចុងគេបង្អស់នេះ មិនអនុញ្ញាតឲ្យកម្ពុជា ធ្វើការធៀបខ្លួន ទៅនឹងបណ្ដាប្រទេសជិតខាងខ្លួនបានទេ។ ប្រទេសជាសមាជិកអាស៊ានទាំងអស់ សុទ្ធតែមានចំណាត់ថ្នាក់ល្អជាងកម្ពុជា ដូចជា ហ្វីលីពីនលេង៨៨ វៀតណាម​លេខ៧៤ ថៃលេខ៧១ ឥណ្ឌូនេស៊ីលេខ៦៣ និងម៉ាឡេស៊ីលេខ៥៣។ រីឯភូមាដែលទើបចេញ ពីរបបដឹកនាំយោធាផ្ដាច់ការនោះ ក៏មានចំណាត់ថ្នាក់ប្រសើរជាងកម្ពុជាដែរ (លេខ១០០)។ សម្រាប់ប្រទេសសិង្ហបូរីវិញ លោតឡើងដល់លេខ១៣ ដែលសឹងតែមានន័យថា ជាកំពូលចំណាត់ថ្នាក់។

សម្រាប់ប្រទស ដែលជាប់ចំណាត់ខ្ពស់ជាងគេ មានប្រទេស​ដាណឺម៉ាក​លេខ១ ណ័វេស​លេខ២ ហ្វាំងឡង់​លេខ៣ ស៊ុយអែដ​លេខ៤ និងហូឡង់​លេខ៥។ ប្រទេសមួយចំនួនដែល​តែងអួតអាងថា ជាបីតាប្រជាធិបតេយ្យ ដូចយ៉ាងបារាំង ជាប់លេខ១៨ និងសហរដ្ឋអាមេរិក ជាប់លេខ១៩។

អ្នកនាំពាក្យក្រសួងយុត្តិធម៌កម្ពុជា លោក ជិន ម៉ាលីន បានថ្លែងប្រាប់ប្រព័ន្ធផ្សព្វផ្សាយក្នុងស្រុកថា ក្រសួងត្រូវការពេល សិក្សា​ទៅលើ​របាយការណ៍​ខាងលើ ដើម្បីឲ្យដឹងថា របាយការណ៍នេះនិយាយពីអ្វីខ្លះសិន មុននឹងធ្វើប្រតិកម្មតបវិញ។ លោកថា កម្ពុជាបានធ្វើ​កំណែទម្រង់​​ច្រើន​ហើយ ​​លើ​ប្រព័ន្ធ​យុត្តិធម៌របស់ខ្លួន បើទោះជាមានការ​ខ្វះ​ចន្លោះ​ខ្លះក៏ដោយ។

ក្នុងរបាយការណ៍សន្ទស្សន៍ ឆ្នាំ២០១៨ របស់អង្គការតម្លាភាពអន្តរជាតិ ស្ដីពីអំពើពុករលួយ ប្រទេសកម្ពុជា ក្រោយរបបដឹកនាំលោក ហ៊ុន សែន ក៏មានពិន្ទុមិនសូវល្អដែរ។ របាយការណ៍នោះ ដែលទើបចេញផ្សាយ កាលពីចុងខែកន្លងទៅ បានផ្ដល់ពិន្ទុសម្រាប់កម្ពុជា ឲ្យជាប់លេខជិត​«បាត​តារាង»ដូចគ្នា គឺលេខ១៦១ ពីក្នុងចំណោម១៨០ប្រទេស។

សូមជម្រាបជូនថា «គម្រោងយុត្តិធម៌ពិភពលោក» ធ្វើការតាមរយៈកម្មវិធីចំនួន ៣ គឺ (១) ការស្រាវជ្រាវ និងអាហារូបករណ៍ (២) របាយការណ៍​សន្ទស្សន៍​ចំណាត់ថ្នាក់ ស្ដីពីនីតិរដ្ឋ និង (៣) ការចូលរួម។ គម្រោងនេះព្យាយាមបង្កើនការយល់ដឹង​ជាសាធារណៈ អំពីសារៈសំខាន់​ជាមូលដ្ឋាននៃនីតិរដ្ឋ ជំរុញការកែទម្រង់របស់រដ្ឋាភិបាល និងបង្កើតកម្មវិធីជាក់ស្តែង នៅថ្នាក់សហគមន៍៕



លំអិតបន្ថែមទៀត

កម្ពុជា

អ្នកជំនាញ អ.ស.ប ស្នើជាថ្មី​ឲ្យកម្ពុជា​គោរពសិទ្ធិ​ ជនជាប់ចោទ​ទាំង​​៦០នាក់

ការជំនុំជម្រះក្ដី​លើ ជនជាប់ចោទ​ទាំង​​៦០នាក់ ដែលនឹងត្រូវធ្វើឡើង ក្នុងថ្ងៃតែមួយ នៅថ្ងៃទី១៤ ខែមករា ឆ្នាំ២០២១ខាងមុខ នឹងធ្វើឲ្យ​«សិទ្ធិបុគ្គល​របស់ពួកគេ ក្នុងការទទួលបាន​ការជំនុំជម្រះក្តី ប្រកបដោយយុត្តិធម៌ ត្រូវប្រឈមនឹងហានិភ័យ»។ នេះ ជាការអះអាងឡើង ...
កម្ពុជា

ស្ថានទូតអាមេរិកថា កឹម សុខា គ្មានកំហុសនិងជាប់ឃុំដោយអយុត្តិធម៌

ស្ថានទូតសហរដ្ឋអាមេរិក បានចេញមុខ មកអះអាងថា លោក កឹម សុខា ប្រធានគណបក្សសង្គ្រោះជាតិ ដែលកំពុងជាប់ឃុំ ក្នុងគេហដ្ឋានសព្វថ្ងៃ គឺជាមនុស្សស្អាតស្អំ ដែលត្រូវបានឃុំខ្លួនដោយអយុត្តិធម៌ ក្រោមបទចោទប្រកាន់មិនពិត។ ទំព័រហ្វេសប៊ុកផ្លូវការ ...
កម្ពុជា

លឺ ឡាយស្រេង សុំ ហ៊ុន សែន ត្រឡប់​ចូល​កម្ពុជា​វិញ ព្រោះ​នឹក​ស្រុក

លោក លឺ ឡាយស្រេង អតីតឧបនាយករដ្ឋមន្ត្រី មកពីគណបក្សហ្វុនស៊ីនប៉ិច បានថ្លែងស្នើសុំ ទៅលោកនាយករដ្ឋមន្ត្រី ហ៊ុន សែន ឲ្យអនុញ្ញាតឲ្យរូបលោក បានវិលត្រឡប់ចូលប្រទេសកម្ពុជាវិញ ឲ្យបានយ៉ាងហោចណាស់ ក្នុងឱកាសបុណ្យចូលឆ្នាំប្រពៃណីខ្មែរ ...

យល់ស៊ីជម្រៅផ្នែក កម្ពុជា

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...

Comments are closed.