ខ្លីៗពីបារាំង៖ ក្រុងប៉ារីសបញ្ជាក់ពីការដាក់កម្ពុជាក្នុង«បញ្ជីខ្មៅ»អ៊ឺរ៉ុប
សប្ដាហ៍ទីពីរ នៃខែឧសភានេះ ត្រូវបានកត់សម្គាល់ ដោយការដាក់ប្រទេសកម្ពុជា ចូលក្នុង«បញ្ជីខ្មៅ» ពីសំណាក់សហភាពអ៊ឺរ៉ុប (EU) ស្ដីពីការលាងសម្អាតលុយ និងហិរញ្ញប្បទានភេរវកម្ម។ នេះ បើតាមរបាយការណ៍ខ្លីៗ ប្រចាំសប្ដាហ៍ទី២០ របស់ក្រសួងសេដ្ឋកិច្ច និងហិរញ្ញវត្ថុបារាំង ដែលទស្សនាវដ្ដីមនោរម្យ.អាំងហ្វូ បានចូលទៅពិគ្រោះ។
របាយការណ៍ខ្លីៗនោះ បានរៀបរាប់ថា បន្ទាប់ពីកម្ពុជា នៅមានប្រទេសភូមា ក៏ត្រូវបានសហភាពអ៊ឺរ៉ុប ដាក់ចូលក្នុង«បញ្ជីខ្មៅ» នៃក្រុមប្រទេស ដែលមានហានិភ័យ អំពីការលាងសម្អាតលុយ និងហិរញ្ញប្បទានភេរវកម្មដែរ។ ក្រសួងសេដ្ឋកិច្ច និងហិរញ្ញវត្ថុបារាំង បានសរសេរបន្តថា៖
«ជាការរំឭកឡើងវិញ ចាប់ពីខែកុម្ភៈ ឆ្នាំ២០១៩មក អង្គការឃ្លាំមើលសកម្មភាពហិរញ្ញវត្ថុ (FATF / GAFI) បានដាក់កម្ពុជា ចូលក្នុង”បញ្ជីប្រផេះ“នៃក្រុមប្រទេស ដែលត្រូវពង្រឹងការប្រឆាំង នឹងការលាងសម្អាតលុយ និងហិរញ្ញប្បទានភេរវកម្ម។»
កាលពីថ្ងៃទី៧ ខែឧសភា គណៈកម្មការអ៊ឺរ៉ុប (ឬហៅម្យ៉ាងទៀត ថាជារដ្ឋាភិបាលសហភាពអ៊ឺរ៉ុប) បានធ្វើបច្ចុប្បន្នភាព «បញ្ជីខ្មៅ» របស់ខ្លួន ទាក់ទងនឹងការលាងលុយកខ្វក់ និងហិរញ្ញប្បទាន សម្រាប់បណ្ដាញភេរវកម្ម ពីចំនួន១៦ប្រទេស ក្នុងបញ្ជីខ្មៅចាស់ ឲ្យឡើងដល់២២ប្រទេស។ កម្ពុជា និងប្រទេសភូមា បានជាប់ឈ្មោះ នៅក្នុងបញ្ជីខ្មៅថ្មី ខណៈប្រទេសឡាវ ត្រូវបានដកចេញ ពីបញ្ជីចាស់ ជាស្ថាពរ។
របាយការណ៍សប្ដាហ៍ទី២០ របស់រដ្ឋាភិបាលបារាំង បានសរសេរបញ្ជាក់ទៀតថា អង្គភាពមានសមត្ថកិច្ចមួយ របស់ធនាគារជាតិកម្ពុជា បាន«ជំរុញ»ឲ្យបណ្ដាក្រុមហ៊ុន-សហគ្រាស ឲ្យបង្កើនការប្រុងប្រយ័ត្ន ជុំវិញការលាងសម្អាតប្រាក់ និងហិរញ្ញប្បទានភេរវកម្ម តែមិនបានបញ្ជាក់បន្ថែមទេថា ការ«ជំរុញ»នោះ បានចេញផ្លែផ្កា ជាចំណាត់ការជាក់ស្ដែង។
អត្ថបទខ្លីៗ របស់វិមានប៊ែរស៊ី (Bercy – គឺក្រសួងសេដ្ឋកិច្ច និងហិរញ្ញវត្ថុបារាំង) បានសរសេរថា៖
«អង្គភាពស៊ើបការណ៍ហិរញ្ញវត្ថុកម្ពុជា (CAFIU) គ្រោងជំរុញឲ្យគ្រប់សហគ្រាស និងក្រុមហ៊ុនទាំងអស់ ឲ្យបង្កើតការប្រុងប្រយ័ត្នខ្ពស់ ក្នុងការកំណត់ហានិភ័យ នៃការលាងលុយកខ្វក់ និងហិរញ្ញប្បទានភេរវកម្ម និងជាពិសេសអនុវត្ត នូវវិធានការណ៍ទប់ទល់ ប្រកបដោយប្រសិទ្ធភាព និងទាន់ពេលវេលា៕»
