អ្នកវិភាគថ្លែងពីការទទួលខុសត្រូវរបស់រដ្ឋាភិបាល ចំពោះពលករនៅក្រៅប្រទេស
ភាពប្រឈម របស់ពលករខ្មែរ នៅក្រៅប្រទេស នៅតែជាបញ្ហាចោទមួយ។ សម្រាប់លោក មាស នី អ្នកវិភាគនយោបាយ និងសង្គម បានទម្លាក់ការទទួលខុសត្រូវ ជុំវិញបញ្ហាប្រឈមទាំងនេះ ទៅលើរដ្ឋាភិបាលកម្ពុជា ដោយលោកអះអាងថា ពលករខ្មែរទាំងនោះ មិនគួរត្រូវបានគេយកទៅប្រើ ដូចជាសត្វធាតុនោះឡើយ។
លោក មាស នី បានថ្លែង នៅលើបណ្ដាញសង្គមថា ការបញ្ជូនពលករទៅបរទេស ជាដំណឹងល្អមួយ សំរាប់រដ្ឋាភិបាល។ តែលោកថា៖ «យើងចង់ឃេីញរដ្ឋាភិបាលធ្វេីការរនេះ ដោយប្រុងប្រយ័ត្ន បេីស្រឡាញ់ញ់ និងអាណិតពលរដ្ឋរបស់ខ្លួន ជាពិសេសគឺការបញ្ជូនពលករ ទៅកាន់ប្រទេស ដែលមានវប្បធម៌ សាសនា និងប្រពៃណីខុសគ្នាពីយេីង»។
អ្នកវិភាគរូបនេះ បានបញ្ជាក់ជាពិសេស សម្រាប់ការងារ«បំរេីការនៅតាមផ្ទះ» ដែលលោកគិតថា អាចជួបនឹងបញ្ហាប្រឈមខ្លាំង ជាងការងារដទៃទៀត។ លោកពន្យល់ថា៖ «ការយល់ដឹងពីច្បាប់ ទម្លាប់ ប្រពៃណីយ សំរាប់ពលករ និងយន្តការ សំរាប់គាំពារ តាមដានលេីសុវត្តិភាព សិទ្ធការងារ ជាកត្តាសំខាន់បំផុត ហេីយវាជាការទទួលខុសត្រូវទាំងស្រុង របស់រាជរដ្ឋាភិបាល»។
របាយការណ៍រួមគ្នាមួយ របស់អង្គការពលកម្មអន្តរជាតិ (ILO) និងអង្គការទេសន្តរប្រវេសន៍អន្តរជាតិ (IOM) ដែលចេញផ្សាយ កាលពីខែធ្នូឆ្នាំកន្លងទៅ បានរកឃើញថា ពលករចំណាកស្រុកខ្មែរ៨នាក់ ពីក្នុងចំណោម១០នាក់ ត្រូវបានរំលោភបំពានសិទ្ធិការងារ ដែលស្មើនឹង៨០ភាគរយ។ របាយការណ៍ បន្តរកឃើញទៀតថា ពលករ៧នាក់ ពីក្នុងចំណោម១០នាក់ មានបញ្ហាជំងឺផ្លូវចិត្ត ដែលស្មើនឹង៦៦ភាគរយ។
ពលករខ្មែរទៅធ្វើនៅប្រទេសក្រៅប្រទេស ភាគច្រើនលើវិស័យសំណង កសិកម្ម នេសាទ និងជំនួយការមេផ្ទះ។ របាយការអង្គការរួមគ្នានេះ បានបង្ហាញទៀតថាពលករខ្មែរភាគច្រើន ដែលធ្វើការលើវិស័យសំណង និងនេសាទ ទទួលរងការរំលោភសិទ្ធិការងារ និងប្រឈមនឹងបញ្ហាសុខាភាព។ ខណៈពលករខ្មែរ ដែលបម្រើការងារតាមផ្ទះ ត្រូវបានរំលោភសិទ្ធិការងារ និងជួបប្រទះបញ្ហាជំងឺផ្លូវចិត្តធ្ងន់ធ្ងរ។
លោក មាស នី បានបញ្ចប់ថា៖ «យេីងមិនចង់ឃេីញពលករខ្មែរ ត្រូវបានគេយកទៅប្រេី ដូចជាសត្វធាតុនោះឡេីយ»។
របាយការណ៍ឆ្នាំ ២០១៦ របស់ក្រសួងការងារបណ្តុះបណ្តាល វិជ្ជាជីវៈ បានលើកឡើង ពីតួលេខពលករខ្មែរចំណាកស្រុក ទៅក្រៅប្រទេស ថាមានចំនួនប្រមាណជា ១,១៥លាននាក់ ក្នុងនោះពលករចំណាកស្រុក ទៅធ្វើការនៅក្នុងប្រទេសថៃ មានជាង១លាននាក់៕
