ក្នុងប្រទេសបារាំង ថ្ងៃបុណ្យដែលត្រូវឈប់សម្រាក មាន១១ថ្ងៃ ស្របតាមច្បាប់ការងារ ជាធរមាន របស់ប្រទេសនេះ។ ពីចំណោមនោះ ថ្ងៃបុណ្យចំនួន៥ គឺជាទិវាបុណ្យជាតិ-អន្តរជាតិ សម្រាប់ឧទ្ទិសឲ្យការរំលឹកឡើងវិញ នៃប្រវត្តិនានា ដែលជាការតស៊ូ ដើម្បីសេរីភាព ឬបុព្វហេតុរួម ខណៈថ្ងៃបុណ្យចំនួន៦ទៀត គឺជាទិវាបុណ្យរបស់សាសនាគ្រឹស្ទិ៍។
ថ្ងៃបុណ្យសម្រាកទាំងនេះ មានន័យស្មើនឹងឲ្យស្ថាប័នរដ្ឋ និងឯកជនទាំងឡាយ បិទទ្វារឈប់សម្រាក។ ផ្ទុយទៅវិញ មានតែថ្ងៃបុណ្យការងារ ទី១ ខែឧសភា ប៉ុណ្ណោះ ដែលច្បាប់តម្រូវឲ្យនយោជក ត្រូវផ្ដល់ប្រាក់កម្រៃទ្វេដង ទៅឲ្យបុគ្គលិករបស់ខ្លួន បើស្ថាប័ន-សហគ្រាសនោះ ចាំបាច់ត្រូវបើកទ្វាធ្វើការ (ដូចជាមន្ទីរពេទ្យ នគរបាលសង្គ្រោះ សហគ្រាសដឹកជញ្ជូនសាធារណៈ សណ្ឋាគារ ភោជនីយដ្ឋាន…)។
យ៉ាងណា នៅក្នុងតំបន់ខ្លះ នៅក្នុងប្រទេស និងនៅលើទឹកដី ឯនាយសមុទ្រ ថ្ងៃបុណ្យដែលត្រូវឈប់សម្រាក អាចមានចំនួនច្រើនជាងនេះ។ ហើយការផ្ដល់កម្រៃបន្ថែម សម្រាប់បុគ្គលិក ដែលធ្វើការថ្ងៃបុណ្យឈប់សម្រាកផ្សេងទៀត (ក្រៅពីថ្ងៃទី១ ខែឧសភា) ត្រូវអនុលោមតាមលក្ខន្តិកៈ នៃក្របខណ្ឌការងារ ក្នុងវិស័យដែលទាក់ទង។
ខាងក្រោមនេះ ជាថ្ងៃបុណ្យដែលត្រូវឈប់សម្រាក ទាំង១១៖
– ថ្ងៃពុធ ទី០១ ខែមករា៖ ថ្ងៃចូលឆ្នាំថ្មី ឆ្នាំសាកល
– ថ្ងៃចន្ទ ទី១៣ ខែមេសា៖ ថ្ងៃបុណ្យសាសនាគ្រឹស្ទិ៍ «Pâques (Easter)»
– ថ្ងៃសុក្រ ទី០១ ខែឧសភា៖ ថ្ងៃបុណ្យការងារ ឬទិវាពលកម្មអន្តរជាតិ
– ថ្ងៃសុក្រ ទី៨ ខែឧសភា៖ ទិវាជ័យជំនះ នៃកងទ័ពសម្ព័ន្ធមិត្ត ឆ្នាំ១៩៤៥ នៃសង្គ្រាមលោកលើកទី២
– ថ្ងៃព្រហស្បត្តិ៍ ទី២១ ខែឧសភា៖ ថ្ងៃបុណ្យសាសនាគ្រឹស្ទិ៍ «Ascension»
– ថ្ងៃចន្ទ ទី១ ខែមិថុនា៖ ថ្ងៃបុណ្យសាសនាគ្រឹស្ទិ៍ «Pentecôte»
– ថ្ងៃអង្គារ ទី១៤ ខែកក្កដា៖ ថ្ងៃបុណ្យជាតិដើម្បីសេរីភាព
– ថ្ងៃសៅរ៍ ទី១៥ ខែសីហា៖ ថ្ងៃបុណ្យសាសនាគ្រឹស្ទិ៍ «Assomption»
– ថ្ងៃអាទិត្យ ទី០១ ខែវិច្ឆិកា៖ ថ្ងៃបុណ្យសាសនាគ្រឹស្ទិ៍ «Toussaint»
– ថ្ងៃពុធ ទី១១ ខែវិច្ឆិកា៖ ថ្ងៃបុណ្យផ្អាកសង្គ្រាមលោក លើកទី១ ឆ្នាំ១៩១៨ (កិច្ចព្រមព្រៀងឈប់បាញ់ ក្រោយពីអាល្លឺម៉ង់ ទទួលស្គាល់ជ័យជំនះ របស់កងទ័ពសម្ព័ន្ធមិត្ត)
– ថ្ងៃសុក្រ ទី២៥ ខែធ្នូ៖ ថ្ងៃបុណ្យសាសនាគ្រឹស្ទិ៍ «Noël (Christmas)»៕
