ដំណឹងពិភពលោក

អូទ្រីស៖ ផ្ទុះអំពើភេរវកម្ម​៦កន្លែង ក្នុងរដ្ឋធានី​វីយែន យប់ថ្ងៃចន្ទនេះ

ទិដ្ឋភាពកងកម្លាំងនគរបាល កំពុងធ្វើប្រតិបត្តិការ បង្ក្រាបភេរវកម្ម នៅកណ្ដាលរដ្ឋធានីវីយែន ប្រទេសអូទ្រីស ក្នុងយប់ថ្ងៃចន្ទទី២ ខែវិច្ឆិកា ឆ្នាំ២០២០។ (រូបថតសហការីលើទ្វីសធើរ)
ទិដ្ឋភាពកងកម្លាំងនគរបាល កំពុងធ្វើប្រតិបត្តិការ បង្ក្រាបភេរវកម្ម នៅកណ្ដាលរដ្ឋធានីវីយែន ប្រទេសអូទ្រីស ក្នុងយប់ថ្ងៃចន្ទទី២ ខែវិច្ឆិកា ឆ្នាំ២០២០។ (រូបថតសហការីលើទ្វីសធើរ)

ការផ្ទុះអាវុធជាច្រើន បានកើតឡើង ក្នុងរដ្ឋធានី​វីយែន (Vienne) នៃប្រទេសអូទ្រីស យប់ថ្ងៃចន្ទនេះ។ របាយការណ៍ដំបូង ផ្សាយដោយសារព័ត៌មានក្នុងស្រុក ឲ្យដឹងថា នគរបាលម្នាក់ និងខ្មាន់កាំភ្លើងម្នាក់ទៀត បានស្លាប់ ខណៈមនុស្សច្រើននាក់ បានរងរបួស។ ខ្មាន់កាំភ្លើងម្នាក់ផ្សេង បានរត់គេចខ្លួន។

តែតុល្យភាពក្នុងនាទីចុងក្រោយ ទំនងជាមានសភាពធ្ងន់ធ្ងរ ជាងអ្វីដែលបានផ្សាយ​មុនៗ។

សារព័ត៌មានទាំងនោះ បានលើកឡើងថា នោះជាការវាយប្រហារ ប្រឆាំងព្រះវិហារ​សាសនាជីហ្វ ដែលស្ថិតនៅកណ្ដាលរដ្ឋធានី និងមានការចាប់ចំណាប់ខ្មាំង នៅក្នុង​សង្កាត់មួយទៀត ដែលស្ថិតនៅចំងាយ ១គីឡូម៉ែត្រ ពីព្រះវិហារនោះ។ មកដល់ម៉ោងនេះ សេចក្ដីរាយការណ៍ បានបញ្ជាក់ថា ការវាយប្រហារបានធ្វើឡើង ទៅលើ៦កន្លែងខុសគ្នា និងក្នុងពេលតែមួយ។

នគរបាលអូទ្រីស បានស្នើឲ្យពលរដ្ឋកុំធ្វើការចែកចាយ រូបថតឬវីដេអូ ជុំវិញហេតុការណ៍​ទាំងនេះ ដែលអាចធ្វើឲ្យប៉ះពាល់ ដល់ចំណាត់ការ របស់អាជ្ញាធរ។

នៅលើបណ្ដាញសង្គម​ទ្វីសធើរ (Twitter) នគរបាលបានបញ្ជាក់ថា ប្រតិបត្តិការដ៏សំខាន់ កំពុងប្រព្រឹត្តិទៅ​នៅឡើយ ក្នុងពេលអត្ថបទកំពុងសរសេរ និងបានអំពាវនាវ​ទៅកាន់​ពលរដ្ឋ កុំឲ្យធ្វើដំណើរទៅកាន់តំបន់កើតហេតុ។

អ្នកសារព័ត៌មានក្នុងស្រុកមួយរូប ដែលអះអាងថា មានរូបភាពពីខ្មាន់កាំភ្លើង បានរៀបរាប់ថា ជននោះបានស្លៀកពាក់ សម្លៀកបំពាក់ប្រយុទ្ធ បានធ្វើការបាញ់ប្រហារ ទៅលើនរណាក៏ដោយ ដែលនៅពីមុខខ្លួន ក្នុងជុំវិញព្រះវិហារ។ តែអ្នកសារព័ត៌មានរូបនោះ បញ្ជាក់ថា លោកមិនទាន់បញ្ចេញរូបភាពនោះ ដើម្បីគោរពដល់បទបញ្ជារ និងការងារ របស់អាជ្ញាធរ។

ស្រង់សំដីដោយទីភ្នាក់ងារព័ត៌មានអូទ្រីស «APA» អ្នកនាំពាក្យនៃក្រុមជួយសង្គ្រោះ បានបង្ហើបឲ្យដឹងថា តុល្យភាពនៃជនរងគ្រោះដល់ជីវិត ទំនងកើនឡើង រវាងពី៣នាក់ ទៅដល់៨នាក់។

ទស្សនាវដ្ដីមនោរម្យ.អាំងហ្វូ កំពុងតាមដានហេតុការណ៍នេះ នឹងផ្សាយ​ព័ត៌មាន​បន្ថែមទៀត ក្នុងអត្ថបទក្រោយៗរបស់ខ្លួន៕



You may also like

គំនូរ ចម្លាក់

«អាថ៌កំបាំង» នៃប្រអប់ពីរ៉ាមីដ របស់​សារមន្ទីរ​លូវ្រ៍ រដ្ឋធានី​ប៉ារីស

ដើម្បីចូលរួមខួបទី៣០ នៃការសាងសង់កោនកញ្ចក់ កណ្តាលសារមន្ទីរលូវ្រ៍ (Louvre) របស់រដ្ឋធានីប៉ារីស វិចិត្រករ «JR Art» បានបង្កើតស្នាដៃ ដ៏អស្ចារ្យមួយនេះឡើង។ ផ្ទាំងរូបភាព បែប «3D» ...
ដំណឹង

Covid-19៖ ម៉ាក្រុង ត្រៀម​ឲ្យ​ប្រទេស​«ងើប​ឡើងវិញ»​ក្រោយថ្ងៃ​១១ឧសភា

វិធានការជាច្រើន នឹងត្រូវរដ្ឋាភិបាលបារាំង សម្រេចឲ្យអនុវត្ត ដើម្បីត្រៀមឲ្យប្រទេស​«ងើប​ឡើងវិញ» នៅក្រោយថ្ងៃទី១១ ខែឧសភា។ នេះ បើតាមប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) ...
ដំណឹង

ហ្សាក់ ឈៀរ៉ាក់ អតីតប្រធានាធិបតីបារាំងបានទទួលមរណភាព

ប្រធានាធិបតីជំនាន់ទី២២ នៃសាធារណរដ្ឋបារាំង លោក ហ្សាក់ ឈៀរ៉ាក់ (Jacques Chirac) បានទទួលមរណភាពហើយ ក្នុងជន្មាយុ៨៦ឆ្នាំ។ លោកបានលាចាកលោក ក្នុងព្រឹកថ្ងៃព្រហស្បត្តិ៍ ទី២៦ ខែកញ្ញា ...

Comments are closed.

ដំណឹង

សង្គ្រាមនៅអ៊ុយក្រែន ៖ អាមេរិកផ្ដល់ភ្លើងខៀវបញ្ជូនយន្តហោះ«F-16»

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

អ្នកជំនាញមួយក្រុមរបស់អង្គការសហប្រជាជាតិ បានអំពាវនាវទៅ​របបដឹកនាំរបស់លោក ហ៊ុន សែន ឲ្យដោះលែងអ្នកស្រី សេង ធារី មេធាវីខ្មែរអាមេរិកាំង ដែលគេស្គាល់ក្នុងពេលកន្លងមក ថាជា«ស្ត្រីសេរីភាព» តាមរយៈសម្លៀកបំពាក់តែងខ្លួនសម្ដែងមតិរបស់អ្នកស្រី នៅខាងមុខសាលាដំបូងរាជធានីភ្នំពេញ។ ក្រុមអ្នកជំនាញប្រឆាំងការឃុំឃាំងតាមទំនើងចិត្ត ...
កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...