សង្គ្រាមនៅ​អ៊ុយក្រែន៖ សហព័ន្ធបាល់ទាត់ពិភពលោក «FIFA» បានសម្រេចដកប្រទេសរ៉ុស្ស៊ី ចេញពីការប្រកួតបាល់ទាត់ ជាលក្ខណៈអន្តរជាតិទាំងឡាយ ជាពិសេសពីការប្រកួតបាល់ទាត់ពិភពលោក ២០២២ ដែលនឹងត្រូវរៀបចំធ្វើ នៅក្នុងប្រទេសកាតា។ មិនត្រឹមតែក្រុមបាល់ទាត់ជម្រើសជាតិរ៉ុស្ស៊ីប៉ុណ្ណោះទេ ដែលរងផលប៉ះពាល់ ក្រុមបាល់ទាត់អាជីពទាំងអស់ របស់ប្រទេសមហាអំណាច ក៏ទទួលទណ្ឌកម្មនេះ ពីស្ថាប័នបាល់ទាត់កំពូលខាងលើដែរ។

សេចក្ដីប្រកាសព័ត៌មាន របស់សហព័ន្ធបាល់ទាត់ពិភពលោក ដែលចេញផ្សាយ នៅល្ងាចថ្ងៃចន្ទ ទី២៨ ខែកុម្ភៈ ឆ្នាំ២០២២ បានបញ្ជាក់ថា ការដកប្រទេសរ៉ុស្ស៊ីចេញពីការប្រកួត ជាលក្ខណៈអន្តរជាតិ នឹងត្រូវចេូលជាធរមានភ្លាមៗ ចាប់ពីពេលនេះ រហូតដល់មាន«បទបញ្ជាជាថ្មី» ដើម្បីប្រតិកម្មតប នឹងការធ្វើសង្គ្រាមឈ្លានពាន​ប្រទេសអ៊ុយក្រែន ដោយកងទ័ពរ៉ុស្ស៊ី តាំងពី៥ថ្ងៃកន្លងមក។

ក្រុមបាល់ទាត់រ៉ុស្ស៊ី ដែលរងផលប៉ះពាល់ រួមមាន៖

  • ក្រុមជម្រើសជាតិផ្នែកបុរស ដែលនឹងត្រូវផាត់ចេញ ពីបាល់ទាត់ពិភពលោក ឆ្នាំ២០២២ នៅប្រទេសកាតា។ ក្រុមរ៉ុស្ស៊ីនឹងត្រូវជម្រុះចេញជាស្វ័យប្រវត្តិ ដោយត្រូវអាក់ខានការប្រកួត នៅថ្ងៃទី២៤ ខែមិនា ឆ្នាំ២០២២ ទល់នឹងប្រទេសប៉ូឡូញ។ មកដល់ថ្ងៃនេះ ក្រុមជម្រើសជាតិប៉ូឡូញបានបដិសេធ​យ៉ាងដាច់អហង្កា ក្រោមហេតុផលសង្គ្រាម​ឈ្លានពាន​នៅអ៊ុយក្រែន ថាខ្លួនមិនប្រកួតជាមួយក្រុមរ៉ុស្ស៊ីទេ ទោះជាធ្វើនៅលើប្រទេសណាក្ដី (ក្រៅពីរ៉ុស្ស៊ី និងប៉ូឡូញ)។
  • ក្រុមជម្រើសជាតិផ្នែកស្ត្រី ដែលត្រូវផាត់ចេញ ពីបាល់ទាត់អ៊ឺរ៉ុប ឆ្នាំ២០២២ ដែលត្រូវប្រព្រឹត្តិទៅក្នុងខែកក្កដា នៅប្រទេសអង់គ្លេស។
  • ក្រុមបាល់ទាត់អាជីពរ៉ុស្ស៊ី ដែលត្រូវផាត់ចេញ ពីការប្រកួតអន្តរជាតិ ជាពិសេសពីការដណ្ដើមពានរង្វាន់អ៊ឺរ៉ុប មាន«Champions League» និង«Europa League»ជាដើម។ សម្រាប់ឆ្នាំនេះ ប្រទេសរ៉ុស្ស៊ីនៅសល់តែក្រុម ​«Spartak Moscou» មួយប៉ុណ្ណោះ ដែលកំពុងត្រៀមប្រកួត ក្នុងវគ្គ១ភាគ៨ ក្របខណ្ឌ«Europa League» ទល់នឹងក្រុម«RB Leipzig» របស់ប្រទេសអាល្លឺម៉ង់។

សេចក្ដីប្រកាសព័ត៌មាន ដែលធ្វើរួមរវាងសហព័ន្ធបាល់ទាត់ពិភពលោក «FIFA» និងសហភាពបាល់ទាត់អ៊ឺរ៉ុប «UEFA» បានសរសេរឡើងថា៖

«ខណៈនេះ កីឡាបាល់ទាត់បានរួមគ្នាតែមួយ ក្នុងការបង្ហាញសាមគ្គីភាពទាំងស្រុង ចំពោះបណ្ដាជនទាំងឡាយ ដែលរងគ្រោះក្នុងប្រទេសអ៊ុយក្រែន។ នាយកស្ថាប័នទាំងពីរ (Gianni Infantino នាយក FIFA និង Aleksander Ceferin នាយក UEFA) សង្ឃឹមថា ស្ថានភាពក្នុងប្រទេសអ៊ុយក្រែន នឹងមានភាពប្រសើរគួឲ្យកត់សម្គាល់ និងយ៉ាងឆាប់រហ័ស ដើម្បីអនុញ្ញាតឲ្យកីឡាបាល់ទាត់ អាចក្លាយជាទិសដៅ​ជាថ្មីទៀត នៃការបង្រួបបង្រួម និងការរឹតចំណងសន្តិភាព រវាងប្រជាជននិងប្រជាជន។»

ភ្លាមៗ ក្រោយការប្រកាស​របស់សហព័ន្ធបាល់ទាត់ពិភពលោក សហព័ន្ធបាល់ទាត់រ៉ុស្ស៊ីបានបានចេញមកធ្វើប្រតិកម្មវិញដែរ ដោយបញ្ជាក់ពី«ការមិនយល់ស្របទាំងស្រុង»ឡើយ ទល់នឹងការដកក្រុមបាល់ទាត់រ៉ុស្ស៊ី ចេញពីការប្រកួតទាំងឡាយ ជាលក្ខណៈអន្តរជាតិ និងដោយគ្មានពេលកំណត់។

សេចក្ដីប្រកាសព័ត៌មាន របស់សហព័ន្ធបាល់ទាត់រ៉ុស្ស៊ី បានឲ្យដឹងថា សហព័ន្ធរក្សាសិទ្ធិ ក្នុងការប្ដឹងជំទាស់ ទល់នឹងការសម្រេចខាងលើ។ សេចក្ដីប្រកាសព័ត៌មាន​បានសរសេរថា៖

«វិធានការខាងលើ នឹងបង្ហាញពីភាពរើសអ៊ើង យ៉ាងច្បាស់ក្រឡែត ចំពោះកីឡាករ គ្រូបង្វឹក បុគ្គលិកដ៏ច្រើននាក់ នៃបណ្ដាក្រុមបាល់ទាត់អាជីព ក៏ដូចជាក្រុមបាល់ទាត់ជម្រើសជាតិ និងជាពិសេសចំពោះអ្នកគាំទ្រជាតិរ៉ុស្ស៊ី និងនៅបរទេស រាប់លាននាក់៕»



You may also like

ដំណឹង

បៃដិន៖ ការវាយប្រហារ​តាមអ៊ិនធើណែត​ពីរ៉ុស្ស៊ី នឹងទទួល​«ការឆ្លើយតប»

ការវាយប្រហារផ្នែកបច្ចេកវិទ្យា តាមបណ្ដាញអ៊ិនធើណែត ពីសំណាក់ប្រទេសរ៉ុស្ស៊ី ទៅលើបណ្ដាភ្នាក់ងាររដ្ឋាភិបាលអាមេរិក នឹង​មិនអាច​បន្តនៅ​ដោយគ្មាន​«ការឆ្លើយតប»ឡើយ។ ប្រធានាធិបតីជាប់ឆ្នោតថ្មី របស់សហរដ្ឋអាមេរិក លោក ចូ បៃដិន (Joe Biden) បានអះអាងឡើងយ៉ាងដូច្នេះ ...
ដំណឹង

សង្គ្រាមនៅ​អ៊ុយក្រែន៖ កុមារអាយុ១១ឆ្នាំ ភៀសខ្លួន​ឆ្លងប្រទេស​តែម្នាក់ឯង

កុមារអាយុ១១ឆ្នាំ បានធ្វើដំណើរតែម្នាក់ឯង ដើម្បីភៀសខ្លួន ចេញពីសង្គ្រាមឈ្លានពាន បង្កឡើងដោយប្រទេសរ៉ុស្ស៊ី។ កុមារ បានចាកចេញពីលំនៅដ្ឋានខ្លួន ដែលស្ថិតក្នុងក្រុង«Zaporijjia» ភាគខាងកើតអ៊ុយក្រែន និងធ្វើដំណើរឆ្លងព្រំដែនអ៊ុយក្រែន-ស្លូវ៉ាគី (ភាគខាងលិច) ដោយមាននឹងខ្លួនត្រឹមតែសម្ពាយមួយ លិខិតឆ្លងដែន​របស់កុមារ ...
កីឡា និងបច្ចេកវិទ្យា

«FIFA» មិនទទួលស្គាល់ «SuperLeague» និងគម្រាម​ដាក់ទណ្ឌកម្ម

សហព័ន្ធបាល់ទាត់ពិភពលោក «FIFA» បានប្រកាសនៅថ្ងៃព្រហស្បត្តិ៍ ទី២១ ខែមករានេះ មិនទទួលស្គាល់ក្របខណ្ឌ «SuperLeague» ដែលត្រូវបានសារព័ត៌មាន យកមកផ្សាយថា ជាការផ្ដួចផ្ដើមឡើង របស់ក្រុមបាល់ទាត់យក្សមួយចំនួន នៅអ៊ឺរ៉ុប។ ស្ថាប័នអន្តរជាតិ ...

Comments are closed.

កីឡា និងបច្ចេកវិទ្យា

ថើបមាត់ ៖ ក្រុមកីឡាការិនី​ផ្អាកលេង​​បើប្រធានសហព័ន្ធ​មិនលាឈប់

កីឡា និងបច្ចេកវិទ្យា

FIFA ប្រកាសបើក​«នីតិវិធីវិន័យ»​ប្រឆាំងប្រធានសហព័ន្ធ​អេស្ប៉ាញ

សហព័ន្ធបាល់ទាត់អន្តរជាតិ «FIFA» បានប្រកាសបើក«នីតិវិធីវិន័យ»​ទៅលើលោក Luis Rubiales ប្រធានសហព័ន្ធបាល់ទាត់អេស្ប៉ាញ ជុំវិញការចាប់ឱប-ថើបមាត់​កីឡាការិនី Jennifer Hermoso ខ្សែប្រយុទ្ធរបស់ក្រុមជម្រើសជាតិអេស្ប៉ាញ ផ្នែកស្ត្រី បន្ទាប់ពីក្រុមកីឡាការិនីទាំងនេះ បានប្រកួតឈ្នះក្រុមអង់គ្លេស ...
កីឡា និងបច្ចេកវិទ្យា

បាល់ទាត់​ពិភពលោក​ផ្នែកស្ត្រី ៖ អេស្ប៉ាញ​ឈ្នះអង់គ្លេស​និងលើកពានដំបូង

ប្រទេសអេស្ប៉ាញ បានលើកពាន«បាល់ទាត់​ពិភពលោក​ផ្នែកស្ត្រី» ជាលើកដំបូង នៅក្នុងប្រវត្តិបាល់ទាត់របស់ខ្លួន បន្ទាប់បានបំបាក់ក្រុមបាល់ទាត់ជម្រើសជាតិផ្នែកស្ត្រី របស់ប្រទេសអង់គ្លេស ដោយពិន្ទុ១-០ ក្នុងការប្រកួតផ្ដាច់ព្រ័ត្រ នៅល្ងាច​ថ្ងៃអាទិត្យទី២០ ខែសីហា ឆ្នាំ២០២៣នេះ នាកីឡដ្ឋាន«Australia stadium» ...