អ្នកចាំទីជាតិអ៊ីតាលី កីឡាករ«Gianluigi Donnarumma» ដែលត្រូវបានជ្រើសតាំង ជា«កីឡាករឆ្នើមបំផុត» ក្នុងព្រឹត្តិការណ៍ដណ្ដើមពាន«Euro 2020» ក្នុងប៉ុន្មានសប្ដាហ៍កន្លងមក បានចុះកិច្ចសន្យាមានរយៈពេល៥ឆ្នាំ ដើម្បីលេងឲ្យក្រុមបាល់ទាត់យក្សបារាំង នៅថ្ងៃពុធទី១៤ ខែកក្កដា ឆ្នាំ២០២១នេះ។
សេចក្ដីប្រកាសព័ត៌មាន របស់ក្រុមប៉ារីស (Paris Saint-Germain) ដែលចេញផ្សាយនៅប៉ុន្មាននាទីមុន បានឲ្យដឹងថា កីឡាករចាំទីអាយុ២២ឆ្នាំ បានក្លាយជាកីឡាករ របស់ក្រុមប៉ារីស រហូតដល់ចុងរដូវកាល ឆ្នាំ២០២៦។
នៅក្នុងកិច្ចចុះហត្ថលេខានេះ ក្រុមប៉ារីសមិនបានបង់ប្រាក់មួយសេនណា ដើម្បីទិញកីឡាកររូបនេះទេ ដោយហេតុថា កីឡាករបានបញ្ចប់កិច្ចសន្យា ជាមួយក្រុមមីឡង់ (AC Milan) ដែលខ្លួនបានហ្វឹកហាត់ជាមួយ និងលេងឲ្យជាលក្ខណៈអាជីព តាំងពីអាយុ១៦ឆ្នាំមក។
បន្ទាប់ពីចុះហត្ថលេខារួច កីឡាករនឹងចេញទៅលំហែកាយ ប្រមាណជា២សប្ដាហ៍ ក្នុងក្របខណ្ឌនៃវិសមកាលរដូវក្ដៅ ដែលកីឡាករទើបនឹងទទួលបាន បន្ទាប់ពីបញ្ចប់ព្រឹត្តិការណ៍ «Euro 2020» និងទទួលជ័យជំនះ ដោយបានលើកពាន ជាប់ជាជើងឯករួចរាល់ ជាមួយក្រុមជម្រើសជាតិអ៊ីតាលី៕
