យប់ថ្ងៃអង្គារ ទី១១ ខែធ្នូ ឆ្នាំ២០១៨នេះ ជាថ្ងៃដំបូង នៃការប្រកួតជុំចុងក្រោយ ក្នុងវគ្គជម្រុះ ក្របខណ្ឌដណ្ដើមជើងឯកអ៊ឺរ៉ុប «Champions League» ហើយលទ្ធផលជាផ្លូវការបានចេញមកមួយភាគធំហើយ អំពីក្រុមដែលទទួលបានសំបុត្រ សម្រាប់ឡើងទៅទាត់ នៅវគ្គ១ភាគ៨ផ្ដាច់ព្រ័ត្រ។
នៅសល់តែក្រុមពីរប៉ុណ្ណោះ គឺក្រុម លីយ៉ុង (Olympique Lyonnais – បារាំង) និងក្រុម ដូនីស្ត (Chakhtior Donestk – អ៊ុយក្រែន) ដែលត្រូវរង់ចាំ លទ្ធផលនៃការប្រកួត នៅថ្ងៃស្អែកមួយទៀត ដើម្បីដឹងថា ខ្លួននឹងឆ្លងវគ្គ ឬយ៉ាងណា។
ប៉ុន្តែ សម្រាប់ការប្រកួត (ជុំចុងក្រោយ នៃវគ្គជម្រុះ) ក្នុងយប់ថ្ងៃនេះ ក្រុមមួយចំនួន បានសើចសប្បាយ និងទុកឲ្យក្រុមខ្លះទៀតយំមិនចេញ ព្រោះការបានឡើង ឬមិនបាន ត្រូវអាស្រ័យ ទៅលើលទ្ធផល នៃការប្រកួតមួយទៀត នៅក្នុងពូល។
ដូចយ៉ាង ក្នុងពូល «B» ក្រុម ថូទេនហាម (Tottenham – អង់គ្លេស) បានឆ្លងផុតវគ្គជម្រុះនេះ ដោយសារលទ្ធផលស្មើ ១-១ នៃការប្រកួតរវាងក្រុមខ្លួន ទល់នឹងក្រុមបាសឺឡូន (Barcelone – អេស្ប៉ាញ) និងលទ្ធផលស្មើ ១-១ នៃការប្រកួតរវាងក្រុម មីឡង់ (Inter Milan – អ៊ីតាលី) និងក្រុម «PSV – ហូឡង់»។
រីឯក្រុម ណាប៉ូលី (SSC Napoli – អ៊ីតាលី) វិញ ដែលធ្លាប់មានពិន្ទុខ្ពស់ជាងគេ និងឈរនៅលេខមួយ ក្នុងពូល «C» បែរជាត្រូវ«ហាលអាវ» បន្ទាប់ពីប្រកួតចាញ់ (០-១) ក្រុម លីវើភូល (Liverpool – អង់គ្លេស) ហើយក្រុម ប៉ារីស (Paris Saint-Germain – បារាំង) បានបំបាក់ (៤-១) ក្រុមផ្កាយក្រហម (Red Star Belgrade – ស៊ែរប៊ី) នៅឯពហុកីឡាដ្ឋាន នៃរដ្ឋធានីប៊ែលក្រាត។
ខាងក្រោមនេះ ជាក្រុមទាំង១៥ ដែលទទួលបានសំបុត្ររួចរាល់ ដើម្បីឡើងទៅវគ្គ១ភាគ៨៖
ពូល A
Borussia Dortmund
Atlético de Madrid
ពូល B
FC Barcelone
Tottenham
ពូល C
PSG
Liverpool
ពូល D
FC Porto
Schalke 04
ពូល E
Bayern Munich
Ajax Amsterdam
ពូល F
Manchester City
(ក្រុម “Chakhtior Donestk” និងជួបជាមួយក្រុម “Olympique Lyonnais” នៅថ្ងៃស្អែក ដើម្បីដណ្ដើមសំបុត្រចុងក្រោយ)
ពូល G
Real Madrid
AS Rome
ពូល H
Juventus Turin
Manchester United
