បន្ទាប់ពីបាន«លា»ក្រុមបាសឺឡូន (FC Barcelone) នៅក្នុងសន្និសីទសារព័ត៌មាន កាលពីវេលាថ្ងៃត្រង់នេះរួច កំពូលខ្សែប្រយុទ្ធជាតិអាហ្សង់ទីន កីឡាករ លីយ៉ូនែល ម៉េស៊ី (Lionel Messi) នឹងធ្វើដំណើរមកដល់រដ្ឋធានី ប៉ារីស ក្នុងល្ងាចថ្ងៃដដែល ដើម្បីធ្វើការត្រួតពិនិត្យសុខភាព មុននឹងចុះហត្ថលេខា ទៅលើកិច្ចសន្យាជាមួយក្រុម ប៉ារីស។
សារព័ត៌មាន«L’Equipe» ជំនាញខាងកីឡារបស់ប្រទេសបារាំង បានបញ្ជាក់ពីព័ត៌មាននេះ ដោយសរសេរឡើងថា «នេះ មិនមែនជាក្ដីសុបិន្តទេ»។ សារព័ត៌មានសរសេរថា ភាគីតំណាងឲ្យកីឡាករ និងមេដឹកនាំក្រុម ប៉ារីស បានព្រមព្រៀងគ្នារួចហើយ នៅថ្ងៃអាទិត្យនេះ ទៅលើសឹងគ្រប់ចំណុចលំអិតទាំងអស់ នៅក្នុងកិច្ចសន្យាដែលនឹងត្រូវចុះហត្ថលេខា។
ប្រព័ន្ធផ្សព្វផ្សាយដ៏ធំមួយនេះ បានស្រង់ប្រភពស្និតនឹងសំនុំរឿង មកបញ្ជាក់ថា កីឡាករម្ចាស់បាល់មាស់៦ជំនាន់ នឹងមកដល់រដ្ឋធានីប៉ារីស នៅល្ងាចថ្ងៃអាទិត្យទី៨ ខែសីហានេះ ហើយអាចនឹងធ្វើការត្រួតពិនិត្យសុខភាព នៅវេលាយប់ថ្ងៃអាទិត្យ ឬយូរបំផុតនៅព្រឹកថ្ងៃចន្ទស្អែក។
សូមរំឭកជូនថា កីឡាករ លីយ៉ូនែល ម៉េស៊ី ដែលបានបញ្ចប់កិច្ចសន្យា ជាមួយក្រុមអ្នកមានបុណ្យ កាលពីចុងខែមិថុនាកន្លងមក បានព្យាយាមចរចាជាមួយក្រុមយក្សមួយនេះ ដើម្បីចុះកិច្ចសន្យាជាថ្មីមួយទៀត។ សារព័ត៌មានខ្លះបានអះអាងថា ក្នុងការចរចានោះ កីឡាករ ម៉េស៊ី បានស្ម័គ្រចិត្តកាត់បន្ថយប្រាក់ខែខ្លួន មកនៅត្រឹមតែពាក់កណ្ដាល។
តែនៅថ្ងៃព្រហស្បត្តិ៍កន្លងមក កិច្ចសន្យាថ្មីដែលហៀបនឹងត្រូវបានចុះហត្ថលេខា ដោយក្រុមបាសឺឡូន និងកីឡាករ តែបែរជាបាន«រលូត»បាត់ទៅវិញ។
នៅក្នុងប្រទេសអេស្ប៉ាញ កាសែត«Marca»បានបញ្ជាក់ថា នោះគឺដោយសារកីឡាករ ម៉េស៊ី មិនពេញចិត្តនឹងគម្រោងកីឡា ទៅអនាគតរបស់ក្រុមអ្នកមានបុណ្យ។ រីឯកាសែត«Sport»វិញ បានលើកឡើងថា បញ្ហាបណ្ដាលមកពីក្រុម បាសឺឡូន មានកម្រិតប្រាក់បៀវត្សរ៍សរុប រហូតដល់១៨៧លានអ៊ឺរ៉ូ ដែលច្រើនហួស ពីការកំណត់របស់ស្ថាប័នរៀបចំការប្រកួតបាល់ទាត់អាជីព អេស្ប៉ាញ។
ដំណឹងស្ដីពី«កិច្ចសន្យារលូត» បានបើកទ្វាចំហរយ៉ាងធំ ឲ្យក្រុមបាល់ទាត់យក្សផ្សេងទៀត នៅទ្វីបអ៊ឺរ៉ុប ដើម្បីឆក់ទាញយកកំពូលកីឡាករម្ចាស់បាល់មាស៦ជំនាន់ មកទាត់ឲ្យផងខ្លួន ក្នុងនោះមានទាំងក្រុមប៉ារីសមួយផង។
បើតាមសារព័ត៌មាន«L’Equipe»របស់ប្រទេសបារាំង បានបញ្ជាក់ទៀតថា គ្រូបង្វឹករបស់ក្រុម ប៉ារីស លោក ម៉ូរីស្យូ ប៉ូឆិនទីណូ (Mauricio Pochettino) ថែមទាំងបានទូរស័ព្ទដោយផ្ទាល់ ទៅកាន់កីឡាករ លីយ៉ូនែល ម៉េស៊ី ដែលជាជនរួមជាតិអាហ្សង់ទីនដូចគ្នា ដើម្បីបង្ហាញពីគម្រោងកីឡារបស់លោក នៅជាមួយក្រុមប៉ារីស៕
