ម្ចាស់បាល់មាស់៦ជំនាន់ កីឡាករ លីយ៉ូនែល ម៉េស៊ី (Lionel Messi) មិនបន្តនៅជាមួយ ក្រុម បាសឺឡូន (FC Barcelone) ទៀតទេ។ នេះ បើតាមសេចក្ដីប្រកាសព័ត៌មាន របស់ក្រុមអ្នកមានបុណ្យ ដែលចេញផ្សាយ នៅយប់​ថ្ងៃ​ព្រហស្បត្តិ៍ ទី៥ ខែសីហា ឆ្នាំ២០២១នេះ។

ក្រុម បាសឺឡូន បានសរសេរឲ្យដឹងថា៖

«បើទោះជាមានកិច្ចព្រមព្រៀង រវាងក្រុមបាល់ទាត់ បាសឺឡូន និងកីឡាករ ឡេអូ ម៉េស៊ី ព្រមទាំងឆន្ទះ​ដ៏ច្បាស់លាស់ នៃភាគីទាំងពីរ ដើម្បីចុះកិច្ចសន្យា​ថ្មីមួយ​ទៀតក៏ដោយ តែកិច្ចសន្យានេះ មិនអាចមានរូបរាងជាផ្លូវការបាន ដោយសារ​ឧបសគ្គ បណ្ដាលមកពីមូលហេតុសេដ្ឋកិច្ច និងលក្ខន្តិកៈ នៃស្ថាប័នរៀបចំការប្រកួតបាល់ទាត់អាជីព របស់ប្រទេស​អេស្ប៉ាញ។»

ក្រុមអ្នកមានបុណ្យ បន្តថា៖

«នៅចំពោះស្ថានភាពនេះ លីយ៉ូនែល ម៉េស៊ី នឹងមិននៅជាមួយក្រុម បន្តទៀតទេ។ ភាគីទាំងសងខាង សំដែង​ការសោកស្ដាយ យ៉ាងជ្រាលជ្រៅ ដែលទៅបំផុតទៅ បំណងរបស់កីឡាករ និងក្រុមបាល់ទាត់ មិនអាចសម្រេច​ចេញ ជារូបរាងបាន។»

បន្ទាប់ពីបញ្ចប់កិច្ចសន្យា ជាមួយក្រុម បាសឺឡូន កាលពីថ្ងៃទី៣០ ខែមិថុនា ឆ្នាំ២០២១ ទាំងភាគីកីឡាករ និងក្រុម​បាល់ទាត់ បានធ្វើការចរចាគ្នា​យ៉ាងស្វិតស្វាញ ដើម្បីឈានទៅចុះកិច្ចសន្យាថ្មីទៀត។ សារព័ត៌មានខ្លះ បាន​អះអាងថា ក្នុងការចរចានោះ កីឡាករ ម៉េស៊ី បានស្ម័គ្រចិត្ត​កាត់បន្ថយ​ប្រាក់ខែខ្លួន មកនៅត្រឹមតែពាក់កណ្ដាល។ តែនៅថ្ងៃ​ព្រហស្បត្តិ៍​នេះ កិច្ចសន្យាថ្មីដែលហៀបនឹងត្រូវបានចុះហត្ថលេខា ដោយភាគីទាំង​សងខាង​ទៅហើយ តែបែរជាបាន​«រលូត»បាត់ទៅវិញ។

កាសែត«Marca» បានបញ្ជាក់ថា នោះគឺដោយសារកីឡាករ ម៉េស៊ី មិនពេញចិត្តនឹងគម្រោងកីឡា ទៅអនាគត​របស់​ក្រុមអ្នកមានបុណ្យ។ រីឯកាសែត«Sport» បានលើកឡើងថា បញ្ហាបណ្ដាលមកពីក្រុម​ បាសឺឡូន មានកម្រិតប្រាក់​បៀវត្សរ៍សរុប រហូតដល់១៨៧លានអ៊ឺរ៉ូ ដែលច្រើនហួស ពីការកំណត់​របស់ស្ថាប័ន​រៀបចំការប្រកួតបាល់ទាត់អាជីព អេស្ប៉ាញ។

លីយ៉ូនែល ម៉េស៊ី កំពូលកីឡាករជាតិអាហ្សង់ទីន បានចូលមកទាត់ឲ្យក្រុម បាសឺឡូន នៅឆ្នាំ២០០០ នៅពេល​កីឡាករ​ទើបនឹង​មានអាយុ១៣ឆ្នាំ។ តាំងពីពេលនោះមក កីឡាករបានចេញប្រកួតសរុប មានចំនួន៧៧៨ប្រកួត ក្នុងនោះរកបានគ្រាប់បាល់ ៦៧២គ្រាប់ និងបញ្ជូនបាល់​ឲ្យទាត់បញ្ចូលទី មានចំនួន៣០៥ដង៕



You may also like

កីឡា និងបច្ចេកវិទ្យា

ម៉េស៊ី ព្រលះក្រុមខ្លួនឯងថា ការប្រកួតនេះ ជារូបភាព​នៃក្រុម​ដ៏ខ្សោយមួយ

ពិបាកទទួលណាស់ សម្រាប់ខ្សែប្រយុទ្ធដ៏ល្បី របស់ក្រុមអ្នកមានបុណ្យ។ ហើយនេះជាអ្វី ដែលកីឡាករ លីយ៉ូនែល ម៉េស៊ី (Lionel Messi) បានបង្ហាញឲ្យដឹង នៅក្នុងកិច្ចសម្ភាស នៅក្រោយបរាជ័យ របស់ក្រុមខ្លួន ...
កីឡា និងបច្ចេកវិទ្យា

Super Cup៖ ប៊ីលបៅ លើកពាន​បន្ទាប់ពី​បំបាក់ បាសា និង ម៉េស៊ី

រដូវកាលនេះ ពាន«Super Cup»​របស់ប្រទេសអេស្ប៉ាញ បានធ្លាក់ទៅក្នុងដៃ របស់ក្រុម អាត្លេទិក-ប៊ីលបៅ (Athletic Bilbao) បន្ទាប់ពីក្រុមនេះ បានប្រកួត​យកឈ្នះក្រុម បាសឺឡូន (Barcelone) នៅក្នុងការបន្ថែម​ម៉ោង ...

Comments are closed.

កីឡា និងបច្ចេកវិទ្យា

ថើបមាត់ ៖ ក្រុមកីឡាការិនី​ផ្អាកលេង​​បើប្រធានសហព័ន្ធ​មិនលាឈប់

កីឡា និងបច្ចេកវិទ្យា

FIFA ប្រកាសបើក​«នីតិវិធីវិន័យ»​ប្រឆាំងប្រធានសហព័ន្ធ​អេស្ប៉ាញ

សហព័ន្ធបាល់ទាត់អន្តរជាតិ «FIFA» បានប្រកាសបើក«នីតិវិធីវិន័យ»​ទៅលើលោក Luis Rubiales ប្រធានសហព័ន្ធបាល់ទាត់អេស្ប៉ាញ ជុំវិញការចាប់ឱប-ថើបមាត់​កីឡាការិនី Jennifer Hermoso ខ្សែប្រយុទ្ធរបស់ក្រុមជម្រើសជាតិអេស្ប៉ាញ ផ្នែកស្ត្រី បន្ទាប់ពីក្រុមកីឡាការិនីទាំងនេះ បានប្រកួតឈ្នះក្រុមអង់គ្លេស ...
កីឡា និងបច្ចេកវិទ្យា

បាល់ទាត់​ពិភពលោក​ផ្នែកស្ត្រី ៖ អេស្ប៉ាញ​ឈ្នះអង់គ្លេស​និងលើកពានដំបូង

ប្រទេសអេស្ប៉ាញ បានលើកពាន«បាល់ទាត់​ពិភពលោក​ផ្នែកស្ត្រី» ជាលើកដំបូង នៅក្នុងប្រវត្តិបាល់ទាត់របស់ខ្លួន បន្ទាប់បានបំបាក់ក្រុមបាល់ទាត់ជម្រើសជាតិផ្នែកស្ត្រី របស់ប្រទេសអង់គ្លេស ដោយពិន្ទុ១-០ ក្នុងការប្រកួតផ្ដាច់ព្រ័ត្រ នៅល្ងាច​ថ្ងៃអាទិត្យទី២០ ខែសីហា ឆ្នាំ២០២៣នេះ នាកីឡដ្ឋាន«Australia stadium» ...