ខ្សែប្រយុទ្ធរបស់ក្រុមអ្នកមានបុណ្យ កីឡាករ អង់ទ័ន គ្រីស្មាន់ (Antoine Griezmann) បានប្រកាសឈប់សហការ ជាមួយក្រុមហ៊ុន «Huawei» ដើម្បីបង្ហាញសាមគ្គីភាព ជាមួយបណ្ដាជនអ៊ួរហ្គ័រ ដែលរស់នៅភាគខាងលិចប្រទេសចិន។ ការប្រកាសរបស់កីឡាករ ធ្វើឡើងបន្ទាប់ពីភស្ដុតាងជាច្រើន ត្រូវបានបែកធ្លាយ និងបង្ហាញថា សហគ្រាសយក្សរបស់ចិនមួយនេះ បានឃុបឃិត​ជាមួយអាជ្ញាធរ​កុម្មុយនីស ដើម្បីធ្វើទុក្ខបុកម្នេញ និងឃ្លាំមើលជាប្រចាំ ទៅលើបណ្ដាជន​អ៊ួរហ្គ័រ ដែលកាន់សាសនាអ៊ីស្លាម។

ប៉ុន្តែក្រុមហ៊ុន «Huawei» បានច្រានចោល រាល់ការជាប់ពាក់ព័ន្ធរបស់ខ្លួន  ជាមួយនឹង​ការធ្វើទុក្ខបុកម្នេញ ទៅលើបណ្ដាជនភាគតិច ខណៈក្រុងប៉េកាំងវិញ បានបដិសេធ​ការធ្វើអត្ថាធិប្បាយ ជុំវិញសំនុំរឿងដ៏រសើប។

បណ្ដាសារព័ត៌មានធំៗ នៅបស្ចឹមលោក ដូចយ៉ាង «Washington Post» និងភ្នាក់ងារអន្តរជាតិ ជំនាញខាង​កាម៉េរ៉ាសុវត្ថិភាព ហៅកាត់ថា «IPVM» បានទម្លាយឲ្យដឹងថា ក្រុមហ៊ុន «Huawei» បានចូលរួមចំណែក ក្នុងយុទ្ធនាការ​របស់រដ្ឋាភិបាលចិន ដើម្បីធ្វើការបង្ក្រាប និងឃ្លាំមើល​ជាអចិន្ត្រៃយ៍ ទៅលើបណ្ដាជនអ៊ួរហ្គ័រ។

របាយការណ៍មួយរបស់​សារព័ត៌មាន​អាមេរិក ដែលចេញផ្សាយ កាលពីថ្ងៃពុធទី៩ ខែធ្នូ ឆ្នាំ២០២០នេះ បានស្រង់ឯកសារជាច្រើន មកអះអាងថា សហគ្រាស «Huawei» បានប្រើប្រាស់បច្ចេកទេស​ស្គាល់មុខមនុស្ស ដោយតម្រង់មុខសញ្ញា ទៅលើបណ្ដាជនអ៊ួរហ្គ័រ ដើម្បីធានាថា ពួកគេទាំងនេះ នឹងមិនចាកចេញ ពីបរិវេណនៃ «មណ្ឌលស្ដារនីតិសម្បទា និងបណ្ដុះបណ្ដាលវិជ្ជាជីវៈ(*)» ដែលស្ថិតក្នុង​តំបន់ស្វយ័ត នៃខេត្ត​«Xianjang» (ភាគខាងលិចប្រទេសចិន) នោះទេ។

ក្នុងសារដ៏វែងអន្លាយ ដែលកីឡាករ អង់ទ័ន គ្រីស្មាន់ បង្ហោះនៅលើបណ្ដាញសង្គម អ៊ីស្តាហ្គ្រាម (Instagram) ខ្សែប្រយុទ្ធរបស់ក្រុម បាសឺឡូន (FC Barcelone – អេស្ប៉ាញ) បានសម្រេចបញ្ឈប់​កិច្ចសហការរបស់ខ្លួន ជាមួយក្រុមហ៊ុនយក្ស និងបានដាក់​ការសម្រេច​នេះ ឲ្យចូលជាធរមានភ្លាមៗ។

កីឡាករបានសរសេរបន្តថា៖

«ខ្ញុំឆ្លៀតយកឱកាសនេះ ដើម្បីស្នើក្រុមហ៊ុន “Huawei” កុំបដិសេធ​ ទៅលើភស្ដុតាងចោទប្រកាន់ តែត្រូវចាត់វិធានការ​ជាក់ស្តែង ឱ្យបានឆាប់បំផុត ដើម្បីថ្កោលទោសការបង្ក្រាប​ដ៏ធំនេះ និងប្រើឥទ្ធិពលរបស់ខ្លួន ដើម្បីចូលរួមគោរពសិទ្ធិ បុរស-ស្ត្រីនៅក្នុងសង្គម។»

សម្រាប់រដ្ឋាភិបាលចិន ដែលបានបដិសេធធ្វើអត្ថាធិប្បាយ ចំពោះសំនុំរឿងដ៏រសើប បានបញ្ជាក់មកវិញយ៉ាងខ្លី ចាត់ទុកការប្រកាស​របស់កីឡាករ គ្រីស្មាន់ ថាជារឿងផ្ទាល់ខ្លួន រវាងកីឡាករ និងក្រុមហ៊ុន «Huawei»។ អ្នកស្រី «Hua Chunying» អ្នកនាំពាក្យ​ក្រសួង​ការបរទេសចិន បានថ្លែងដូច្នេះ ក្នុងសន្និសីទសារព័ត៌មាន កាលពីចុងសប្ដាហ៍កន្លងមកថា៖

«រាល់ស្ថាប័នឯករាជ្យទាំងអស់ មានសិទ្ធិក្នុងការធ្វើកិច្ចសហការ ជាមួយនរណាក៏ដោយ ដែលពួកគេព្រមព្រៀង ជាមួយគ្នា។ វាជារឿងផ្ទាល់ខ្លួន របស់ពួកគេ។»

បើសិនជាប្រព័ន្ធឃោសនា របស់ចិន មិនសូវជារវីរវល់ប៉ុន្មាន ចំពោះការប្រកាស របស់កីឡាករ គ្រីស្មាន់ នោះ តែនៅលើបណ្ដាញសង្គម «Weibo» វិញ បណ្ដាជនចិនជាច្រើន បានបញ្ចេញមតិវាយប្រហារធ្ងន់ៗ ទៅលើខ្សែប្រយុទ្ធជាតិបារាំង ដោយហៅកីឡាកររូបនេះ ថា«កំពុងធ្វើឫក ជាតារាបាល់ទាត់ ដ៏អស្ចារ្យ» ហើយ«គាំទ្រក្រុមភេរវជន»។

(*) «មណ្ឌលស្ដារនីតិសម្បទា និងបណ្ដុះបណ្ដាលវិជ្ជាជីវៈ» ក្នុងតំបន់នោះ ត្រូវបានក្រុមអ្នកជំនាញ របស់អង្គការសហប្រជាជាតិ និងអ្នកឃ្លាំមើលសិទ្ធិមនុស្ស ចាត់ទុកជាពន្ធនាគារដ៏អាក្រក់ ដើម្បីបំបាក់ទាំងស្មារតី និងទាំងរាងកាយ ទៅលើបណ្ដាជនអ៊ួរហ្គ័រ ដែលមានចំនួន ប្រមាណជា១លាននាក់ និងដែលត្រូវបានបញ្ជូន ទៅកាន់មណ្ឌលខាងលើ។

តែក្រុងប៉េកាំង បានអះអាងថា ជាមណ្ឌលបណ្ដុះបណ្ដាលវិជ្ជាជីវៈ ដែលមានបំណងឲ្យបណ្ដាជន ដែលជាប់ក្នុងនោះ ដកឃ្លាឲ្យឆ្ងាយ ចេញពីភាពជ្រុលនិយម តាមរយៈសាសនា និងភេរវនិយម៕



You may also like

កម្ពុជា

អ្នកនាំពាក្យថា កាសែតអាមេរិកប្រឌិត​ព័ត៌មាន​«ដ៏ឆ្កួត​លីលា តាម​អំពើចិត្ត»

លោក ឈុំ សុជាត អ្នកនាំពាក្យក្រសួងការពារជាតិ បានហៅសារព័ត៌មាន «The Wall Street Journal» ថាបានប្រឌិតព័ត៌មាន«ដ៏ឆ្កួតលីលា តាមអំពើចិត្ត» ជុំវិញ«កិច្ចព្រមព្រៀងសម្ងាត់» រវាងកម្ពុជា-ចិន ...
របាយការណ៍

នរណាខ្លះ​គាំទ្រ​ប្រធានាធិបតី​ទាំងពីរ​នៅ វេណេស៊ុយអេឡា

វិបត្តិនៅប្រទេស វេណេស៊ុយអេឡា បានបង្កឲ្យមានការប្រទាំងប្រទើស ផ្នែកការទូតអន្តរជាតិ យ៉ាងខ្លាំងក្លា ជាពិសេសនៅបន្ទាប់ពីលោក រ៉ន់ ហ្គេឌូ (Juan Guaido) មេដឹកនាំប្រឆាំង បានប្រកាសខ្លួន ឡើងធ្វើជាប្រធានាធិបតីស្តីទី ...
ដំណឹង

អាល្លឺម៉ង់ថា​ចិន​ដាក់សម្ពាធ ឲ្យ​និយាយល្អ ពី​ប៉េកាំង​ជុំវិញ​​«Covid-19»

មន្ត្រីការទូតចិន បានជួបជាមួយ​អ្នកទទួលខុសត្រូវមួយចំនួន នៃរដ្ឋាភិបាលអាល្លឺម៉ង់ ដើម្បីបញ្ចុះបញ្ចូលអ្នកទទួលខុសត្រូវទាំងនោះ ឲ្យ​និយាយល្អ អំពីការគ្រប់គ្រង របស់ក្រុងប៉េកាំង ទៅលើការរាតត្បាត នៃជំងឺ«Covid-19»។ នេះ បើតាមការអះអាង របស់ក្រសួងមហាផ្ទៃអាល្លឺម៉ង់ តាមរយៈលិខិតមួយ ...

Comments are closed.

កីឡា និងបច្ចេកវិទ្យា

អឹមបាពេ ប្រកាសជាផ្លូវការ ចាកចេញពីក្រុម ប៉ារីស

កីឡា និងបច្ចេកវិទ្យា

ថើបមាត់ ៖ ក្រុមកីឡាការិនី​ផ្អាកលេង​​បើប្រធានសហព័ន្ធ​មិនលាឈប់

រឿងអាស្រូវកើតចេញពី «ការចាប់ឱប-ថើបមាត់» របស់លោក Luis Rubiales ប្រធានសហព័ន្ធបាល់ទាត់អេស្ប៉ាញ កំពុងបន្តភាគទៅមុខ ដោយសារមេដឹកនាំរូបនេះ បដិសេធមិនលាឈប់ពីតំណែងរបស់ខ្លួន។ នោះគឺដល់វេនក្រុមកីឡាការិនី របស់ក្រុមជម្រើសជាតិអេស្ប៉ាញ ដែលបានប្រកាសផ្អាកលេង ឲ្យក្រុមជម្រើសជាតិ ...
កីឡា និងបច្ចេកវិទ្យា

FIFA ប្រកាសបើក​«នីតិវិធីវិន័យ»​ប្រឆាំងប្រធានសហព័ន្ធ​អេស្ប៉ាញ

សហព័ន្ធបាល់ទាត់អន្តរជាតិ «FIFA» បានប្រកាសបើក«នីតិវិធីវិន័យ»​ទៅលើលោក Luis Rubiales ប្រធានសហព័ន្ធបាល់ទាត់អេស្ប៉ាញ ជុំវិញការចាប់ឱប-ថើបមាត់​កីឡាការិនី Jennifer Hermoso ខ្សែប្រយុទ្ធរបស់ក្រុមជម្រើសជាតិអេស្ប៉ាញ ផ្នែកស្ត្រី បន្ទាប់ពីក្រុមកីឡាការិនីទាំងនេះ បានប្រកួតឈ្នះក្រុមអង់គ្លេស ...