ប្រធានាធិបតីអាមេរិក លោក ដូណាល់ ត្រាំ (Donald Trump) បានអះអាង ក្នុងថ្ងៃអង្គារនេះថា រដ្ឋាភិបាលរបស់លោក មិនជាប់ពាក់ព័ន្ធនឹង«ការឈ្លានពាន» ឬ«ការប៉ុនប៉ងឈ្លានពាន»ណាមួយ តាមផ្លូវសមុទ្រ នៅប្រទេសវេណេហ្ស៊ុយអេឡានោះទេ។
កាលពីថ្ងៃចន្ទ លោក នីកូឡា ម៉ាឌូរ៉ូ (Nicolas Maduro) ប្រធានាធិបតីក្នុងតំណែង របស់ប្រទេសវេណេហ្ស៊ុយអេឡា បានបង្ហាញទាហានអាមេរិកាំងពីររូប ពីក្នុងចំណោមទាហានចំនួន១៥នាក់ ដែលត្រូវបានកងទ័ពវេណេហ្ស៊ុយអេឡាចាប់ខ្លួន។
ទាហានទាំងពីរនោក់ ត្រូវបានប្រទេសវេណេហ្ស៊ុយអេឡាចាត់ទុកថា ជាសមាជិកកងកម្លាំងការពារសន្តិសុខ របស់លោក ដូណាល់ ត្រាំ។ ពួកគេត្រូវបានបង្ហាញ ថាមានឈ្មោះ «Luke Denman» អាយុ៣៤ឆ្នាំ និងឈ្មោះ «Airan Berry» អាយុ៤១ឆ្នាំ។
តែនៅថ្ងៃអង្គារនេះ លោក ដូណាល់ ត្រាំ បានថ្លែងពីសេតវិមានមកថា លោកទើបនឹងត្រូវបានគេជូនដំណឹង ពីបញ្ហាខាងលើ។ លោកអះអាងបន្តថា៖
«បើយើងមានជាប់ពាក់ព័ន្ធ យើងនឹងប្រកាសទទួលស្គាល់ តែករណីនេះ មិនមានជាប់ពាក់ព័ន្ធអ្វី ជាមួយនឹងរដ្ឋាភិបាលយើងទេ។»
ក្នុងថ្ងៃចន្ទដដែល ស្ថាប័នអយ្យការនៃប្រទេសវេណេហ្ស៊ុយអេឡា បានធ្វើការចោទប្រកាន់ មេដឹកនាំប្រឆាំង លោក រ៉ន់ ហ្គេដូ (Juan Guaido) ថាបានប្រើប្រាក់ ពីប្រទេសប្រេងកាតមួយចំនួន ដែលរងទណ្ឌកម្មអាមេរិក ដើម្បីជ្រើសរើស «ទាហានស៊ីឈ្នួល» ឲ្យប៉ុនប៉ងធ្វើ «ការឈ្លានពាន»តាមដែនសមុទ្រ ប្រឆាំងនឹងប្រទេសវេណេហ្ស៊ុយអេឡា។
ការចោទប្រកាន់នេះ ធ្វើឡើងជាងមួយឆ្នាំ ក្រោយការអំពាវនាវរបស់លោក រ៉ន់ ហ្គេដូ កាលពីថ្ងៃទី៣០ ខែមេសា ឆ្នាំ២០១៩ ឲ្យស្នើឲ្យកងទ័ពងើបបះបោរ ប្រឆាំងនឹងលោក នីកូឡា ម៉ាឌូរ៉ូ ដែលមេដឹកនាំប្រឆាំង ហៅថាជា«ចោរប្លន់អំណាច»។
ក្នុងរយៈពេលចុងក្រោយនេះ លោក នីកូឡា ម៉ាឌូរ៉ូ បានសំដែងការពេញចិត្ត ពេញថ្លើមរបស់លោក នៅចំពោះការគាំទ្រ ពីសំណាក់មេបញ្ជាការកងទ័ព វេណេហ្ស៊ុយអេឡា ដែលគ្មាននរណាផ្សេង ក្រៅពីមនុស្សជំនិតរបស់លោក ដែលត្រូវបានលោកតែងតាំងឡើង។ មេដឹកនាំក្រាញអំណាចរូបនេះ នៅបានអបអរសាទរផងដែរ ចំពោះការគាំទ្រទាំងឡាយ ដែលលោកទទួលបាន ពីប្រទេសចិន រ៉ុស្ស៊ី និងប្រទេសគុយបា៕
