បើទោះជាទីស្នាក់ការនានា របស់មហាយក្សទាំងពីរ គ្រោងនឹងបើកឡើងវិញ នៅរដូវក្ដៅនេះក៏ដោយ តែការធ្វើការ«ពីផ្ទះ» នៅតែជាជម្រើសដ៏ល្អ សម្រាប់រយៈពេល ពីពេលនេះ រហូតដល់ចប់ ឆ្នាំ២០២០។
លោក «Sundar Pichai» អគ្គនាយកក្រុមហ៊ុន ហ្គូហ្គ័ល (Google) បានប្រកាសកាលពីថ្ងៃព្រហស្បត្តិ៍ នៅក្នុងកិច្ចប្រជុំធំ ដែលធ្វើតាមបណ្ដាញវីដេអូ ប្រចាំសប្ដាហ៍ បានពន្យល់ថា បុគ្គលិកដែលចាំបាច់ ត្រូវវិលទៅធ្វើការ នៅការិយាល័យវិញ នឹងអាចធ្វើបាន ចាប់ពីខែមិថុនា ឬខែកក្កដា តែត្រូវអនុវត្តន៍ តាមវិធានការពារសុវត្ថិភាព ដែលកំណត់ឡើង ជាកំហិត។
តែបើពួកគេគ្មានភាពចាំបាច់ទេ ពួកគេអាចបន្តធ្វើការ ពីលំនៅដ្ឋាន រហូតដល់បណ្ដាច់ឆ្នាំ២០២០។
ក្រុមហ៊ុន ហ្គូហ្គ័ល ស្ថិតក្រោមក្រុមហ៊ុនមេ ឈ្មោះ «Alphabet» ដែលដឹកនាំដោយលោក «Sundar Pichai» តែម្នាក់។ ក្រុមហ៊ុន «Alphabet» មានបុគ្គលិកប្រមាណជា ១០០ ០០០នាក់ នៅក្នុងពិភពលោក។
សម្រាប់ក្រុមហ៊ុន ហ្វេសប៊ុក (Facebook) វិញ ក៏បានប្រកាសប្រហាក់ប្រហែលគ្នានេះដែរ។ ក្រុមហ៊ុនយក្ស ខាងបណ្ដាញសង្កមមួយនេះ គ្រោងនឹងបើក ការិយាល័យរបស់ខ្លួន ចាប់ពីថ្ងៃទី៦ ខែកក្កដាខាងមុខ តែបើបណ្ដាបុគ្គលិក នៅតែអាចធ្វើការ ពីផ្ទះរបស់ពួកគេ រហូតដល់ឆ្នាំ២០២១ បើសិនជាពួកគេមានបំណងដូច្នេះ។
ហ្វេសប៊ុក មានបុគ្គលិកប្រមាណជា ៤៥ ០០០នាក់ នៅជុំវិញពិភពលោក (តួលេខនៅចុងឆ្នាំ២០១៩)។ នេះ គេមិនរាប់បញ្ចូល ពីបុគ្គលិកច្រើនពាន់នាក់ផ្សេងទៀត ដែលធ្វើការ ជាមួយក្រុមហ៊ុនផ្សេង តែមានកិច្ចសន្យា ជាមួយហ្វេសប៊ុកនោះផងទេ។
កាលពីខែមុន លោក «Mark Zuckerberg» អគ្គនាយកក្រុមហ៊ុន ហ្វេសប៊ុក បានបញ្ជាក់ថា ក្រុមហ៊ុនលោក នឹងមិនរំពឹង ឲ្យមានការជួបជុំបុគ្គលិក ចាប់ពី៥០នាក់ឡើងទៅ នៅមុនខែកក្កដា ឆ្នាំ២០២១នោះឡើយ៕
