យន្ដហោះចុះចតខុសផ្លូវ ហើយធ្លាក់ចូលទន្លេ នៅផ្លរីដា
ការភ័យតក់ស្លុត បានកើតឡើងនៅភាគអាគ្នេយ៍ នៃសហរដ្ឋអាមេរិក៖ យន្ដហោះប្រភេទ ប៊ូអីង (Boeing 737) មួយគ្រឿងបានបញ្ចប់ការហោះហើររបស់ខ្លួន នៅក្នុងទឹកទន្លេ ដែលនៅក្បែរព្រលានយន្ដហោះយោធា «Jacksonville» ក្នុងរដ្ឋផ្លរីដា ។ ជាសំណាងល្អ នៅក្នុងគ្រោះថ្នាក់នេះ មិនមានអ្នករងគ្រោះដល់ជីវិតទេ។
ហេតុការណ៍បានកើតឡើង នៅម៉ោង៩ និង៤០នាទី យប់ថ្ងៃសុក្រទី៣ ខែឧសភា ឆ្នាំ២០១៩ នៅខណៈពេលដែលយន្ដហោះ ដែលមានមនុស្សជិះ១៤៣នាក់ (រួមទាំងបុគ្គលិកបម្រើការ ក្នុងយន្តហោះ) បានចុះចត។
នគរបាលតំបន់បានអះអាងថា ក្រុមអ្នកជួយសង្គ្រោះ បានធ្វើអន្តរាគមន៍ភ្លាមៗ ដើម្បីជម្លៀសអ្នកដំណើរចេញពីយន្ដហោះ ហើយអ្នករបួស២១នាក់ ត្រូវបានបញ្ជូនទៅកាន់មន្ទីរពេទ្យ។
យន្តហោះប៊ូអ៊ីងមួយនេះ បានហោះចេញ ពីមូលដ្ឋានយោធា «Guantanamo» ដែលស្ថិតនៅភាគខាងត្បូងកោះគុយបា។ អ្នកដំណើរនៅក្នុងយន្តហោះ សុទ្ធសឹងជាបុគ្គលិកក្នុងមូលដ្ឋានយោធា និងក្រុមគ្រួសាររបស់ពួកគេ។
អាជ្ញាធរអាកាសចរណ៍ស៊ីវិលសហព័ន្ធ បានប្រកាសបើកការស៊ើបអង្កេត ដើម្បីស្វែងរកការពិត ពីមូលហេតុដែលបានកើតឡើង ទៅលើគ្រោះថ្នាក់ខាងលើ៕
