ដំណឹងពិភពលោក

១១ប្រទេស​នៃក្រុម លីម៉ា ចង់ឃើញ​ការប្ដូរ​របបដឹកនាំ​នៅ​វេណេស៊ុយអេឡា

១១ប្រទេស​នៃក្រុម លីម៉ា (សេចក្ដីប្រកាសក្រុង Lima – ប្រទេសប៉េរូ) ក្នុងទ្វីបអាមេរិក បានចេញសេចក្ដីអំពាវនាវមួយ ក្នុងដើមសប្ដាហ៍នេះ ទៅកងទ័ពវេណេស៊ុយអេឡា ឲ្យឈប់គាំទ្រលោក នីកូឡា ម៉ាឌូរ៉ូ (Nicolas Maduro) ហើយងាកមកគាំទ្រមេដឹកនាំប្រឆាំង លោក រ៉ន់ ហ្គេដូ (Juan Guaido) វិញ។

សេចក្ដីអំពាវនាវនោះ បានស្នើឡើងទៀត ដើម្បីឲ្យមានការផ្លាស់ប្ដូររបបដឹកនាំ នៅក្នុងប្រទេសវេណេស៊ុយអេឡា «ដោយគ្មានការប្រើប្រាស់កម្លាំង»។

ដោយបដិសេធការអន្តរាគមន៍យោធាណាមួយ ពីប្រទេសខាងក្រៅនោះ ក្រុមប្រទេសទាំង១១ (១០ប្រទេសក្នុងទ្វីបអាមេរិកខាងត្បូង និងកាណាដា) ពីចំណោមប្រទេសទាំង១៤ នៃសេចក្ដីប្រកាសក្រុង លីម៉ា បានប្រកាសក្នុងសេចក្ដីថ្លែងការណ៍រួមមួយ ដែលចេញផ្សាយ កាលពីថ្ងៃចន្ទ បន្ទាប់ពីបញ្ចប់កិច្ចប្រជុំបន្ទាន់ ក្នុងក្រុង អ៊ុតាវ៉ា (ប្រទេសកាណាដា) ជុំវិញវិបត្តិនៅវេណេស៊ុយអេឡា អំពាវនាវឲ្យកងទ័ពនៃប្រទេសនេះ ឲ្យបង្ហាញភក្ដីភាពទៅលោក រ៉ន់ ហ្គេដូ។

សេចក្ដីថ្លែងការណ៍រួមបានអះអាងចង់ឃើញ ការផ្ទេរអំណាចតាមបែបប្រជាធិបតេយ្យ នៅក្នុងប្រទេសវេណេស៊ុយអេឡា ត្រូវបានធ្វើយ៉ាងឆាប់បំផុត តែគ្មានអំពើហិង្សា និងគ្មានអន្តរាគមន៍យោធា ពីប្រទេសខាងក្រៅ។

ការអះអាងរបស់ក្រុមប្រទេសទាំងនេះ បានធ្វើឡើងតែមួយថ្ងៃ ក្រោយការអះអាងរបស់ប្រធានាធិបតីអាមេរិក លោក ដូណាល់ ត្រាំ (Donald Trump) ដែលអះអាង កាលពីថ្ងៃអាទិត្យថា ការបញ្ជូនទ័ពទៅកាន់ប្រទេសវេណេស៊ុយអេឡា នឹងជាជម្រើសមួយ។

បន្ថែមពីលើនេះ ក្រុមប្រទេសទាំង១១ បានស្នើទៅកាន់កងទ័ពវេណេស៊ុយអេឡា កុំឲ្យរាំងខ្ទប់ជំនួយមនុស្សធម៌ ដែលត្រូវបានបញ្ជូនទៅកាន់ទីនោះ ដើម្បីសង្គ្រោះពលរដ្ឋ​វេណេស៊ុយអេឡា ដែលកំពុងទន្ទឹងរង់ចាំ«យ៉ាងអន្ទះសារ»។

រដ្ឋមន្ត្រីក្រសួងការបរទេសកាណាដា អ្នកស្រី គ្រីស្ទីយ៉ា ហ្វ្រីឡែន (Chrystia Freeland) បានអះអាងថា ចាប់ពីថ្ងៃនេះតទៅ ក្រុមប្រឆាំងដឹកនាំដោយលោក រ៉ន់ ហ្គេដូ បានក្លាយជាសមាជិក នៅក្នុងក្រុម លីម៉ា ក្នុងនាមជាអ្នកតំណាងស្របច្បាប់ របស់ប្រទេស​វេណេស៊ុយអេឡា។ ប្រមុខការទូតនៃប្រទេសម្ចាស់ផ្ទះ សម្រាប់កិច្ចប្រជុំ បានបញ្ជាក់ថាទៀតថា ក្រុមប្រទេសទាំង១១ បានអំពាវនាវទៅសហគមន៍អន្តរជាតិ ឲ្យបង្កកទ្រព្យសម្បត្តិនៅបរទេស របស់«របបផ្ដាច់ការ»របស់លោក នីកូឡា ម៉ាឌូរ៉ូ ហើយបង្វិលទ្រព្យសម្បត្តិទាំងនេះ ទៅឲ្យក្រុមប្រឆាំង។

ការប្រកាសរបស់«១១ប្រទេស​នៃក្រុម លីម៉ា» បានទទួលប្រតិកម្មភ្លាមៗ ពីលោក នីកូឡា ម៉ាឌូរ៉ូ ដោយបាហៅសេចក្ដីថ្លែងការណ៍នោះ ថា«គួរឲ្យស្អប់ និងអស់សំណើច»។ ប្រធានាធិបតីក្នុងតំណែង របស់ប្រទេសវេណេស៊ុអេឡា បានថ្លែងចេញពីពិធីមួយ ក្នុងរដ្ឋធានី ការ៉ាកាស (Caracas) ថា៖

«សេចក្ដីប្រកាសចុងក្រោយនោះ គឺពិតជាគួរឲ្យស្អប់ខ្ពើមណាស់ គួរឲ្យស្អប់ និងអស់សំណើច។ គេមិនដឹងថា តើត្រូវសើច ឬត្រូវក្អួត ឬយ៉ាងម៉េច?»៕



You may also like

ដំណឹង

បាតុកម្ម​នៅ​វេណេហ្សុយអេឡា៖ «រថពាសដែក»បើក​បុកហ្វូងបាតុករ

ការប៉ះទង្គិចគ្នា បានកើតឡើងក្នុងថ្ងៃអង្គារទី៣០ ខែមេសានេះ នៅតាមដងផ្លូវនានា ក្នុងរដ្ឋធានីការ៉ាកាស ដែលក្រុមបាតុករប្រឆាំង បានជួបប្រជុំគ្នា។ រថពាសដែក បានបើកបុកចូលហ្វូងបាតុករ និងបានធ្វើមនុស្សជាច្រើន ដួលដេកនៅលើថ្នល់ ខណៈទាហានម្នាក់ ដែលស្និតរដ្ឋអំណាចសព្វថ្ងៃ ...
ដំណឹង

ឧត្ដមសេនីយ៍​ម្នាក់ទៀត​ ប្រកាសលែងនៅក្រោម​«អំណាចផ្ដាច់ការ»​របស់ ម៉ាឌូរ៉ូ

ឧត្តមសេនីយ៍យោធាម្នាក់នៃកងទ័ពអាកាស របស់ប្រទេស វេណេស៊ុយអេឡា បានប្រកាសក្នុងថ្ងៃសៅរ៍នេះ ថាលោកឈប់ទទួលស្គាល់ «អំណាចផ្ដាច់ការ» នៃលោក នីកូឡា ម៉ាឌូរ៉ូ (Nicolas Maduro) ប្រធានាធិបតីក្នុងតំណែងតទៅទៀត។ លោកឧត្តមសេនីយ៍ ...
ដំណឹង

យ៉ាងតិច៧ប្រទេសនៅអ៊ឺរ៉ុបទទួលស្គាល់ ហ្គេដូ ជាប្រធានាធិបតីស្ដីទី

បន្ទាប់ពីឱសានវាទបានផុតកំណត់ ប្រទេសនានានៅអ៊ឺរ៉ុប ចាប់ផ្ដើមប្រកាសជាផ្លូវការ និងជាបន្តបន្ទាប់ ទទួលស្គាល់លោក រ៉ន់ ហ្គេដូ (Juan Guaido) មេដឹកនាំប្រឆាំង និងជាប្រធានរដ្ឋសភា ក្នុងប្រទេសវេណេស៊ុយអេឡា ជាប្រធានាធិបតីស្ដីទី ...

Comments are closed.

ដំណឹង

សង្គ្រាមនៅអ៊ុយក្រែន ៖ អាមេរិកផ្ដល់ភ្លើងខៀវបញ្ជូនយន្តហោះ«F-16»

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

អ្នកជំនាញមួយក្រុមរបស់អង្គការសហប្រជាជាតិ បានអំពាវនាវទៅ​របបដឹកនាំរបស់លោក ហ៊ុន សែន ឲ្យដោះលែងអ្នកស្រី សេង ធារី មេធាវីខ្មែរអាមេរិកាំង ដែលគេស្គាល់ក្នុងពេលកន្លងមក ថាជា«ស្ត្រីសេរីភាព» តាមរយៈសម្លៀកបំពាក់តែងខ្លួនសម្ដែងមតិរបស់អ្នកស្រី នៅខាងមុខសាលាដំបូងរាជធានីភ្នំពេញ។ ក្រុមអ្នកជំនាញប្រឆាំងការឃុំឃាំងតាមទំនើងចិត្ត ...
កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...