ដំណឹងពិភពលោក

អ៊ឺរ៉ុបប្រកាស«ឱសានវាទ» ខណៈ​ចិន​និង​រ៉ុស្ស៊ី ខ្ទប់ដំណោះស្រាយនៅ អ.ស.ប

ប្រទេសធំៗនៅអ៊ឺរ៉ុប បានប្រកាស​ប្រហាក់ប្រហែល​គ្នា ដាក់«ឱសានវាទ»​ទៅលោក នីកូឡា ម៉ាឌូរ៉ូ (Nicolas Maduro) ប្រធានាធិបតីក្នុងតំណែង​របស់ប្រទេស​វេណេស៊ុយអេឡា ថានឹងទទួល​ស្គាល់​​មេដឹកនាំប្រឆាំង លោក រ៉ន់ ហ្គេឌូ (Juan Guaido) ជាប្រធានាធិបតីស្របច្បាប់ របស់ប្រទេសនេះ ប្រសិនជាការរៀបចំ​ការបោះឆ្នោត​ជាថ្មីមួយ មិនត្រូវបាន​កំណត់ឡើង ក្នុង​រយៈពេល​៨ថ្ងៃ ខាងមុខទេ។

ឱសានវាទ​ត្រូវបានប្រកាសដំបូងឡើយ ដោយប្រទេសអេស្ប៉ាញ។ លោក ប៉េត្រូ សនឆេស (Pedro Sanchez) នាយករដ្ឋមន្ត្រីអេស្ប៉ាញ បានឲ្យដឹងថា ប្រសិនជាការរៀបចំការបោះឆ្នោតឡើងវិញ ដែលមានលក្ខណៈយុត្តិធម៌ សេរី និងតម្លាភាព មិនត្រូវបានកំណត់ឡើង នៅក្នុងរយៈពេល៨ថ្ងៃ​ខាងមុខទេ អេស្ប៉ាញនឹងទទួលស្គាល់លោក រ៉ន់ ហ្គេឌូ ថាជាប្រធានាធិបតីស្របច្បាប់ របស់ប្រទេសវេណេស៊ុយអេឡា។

នៅប៉ុន្មាននាទីក្រោយមក ក្រុង ប៉ារីស និងក្រុង ប៊ែរឡាំង ក៏បានប្រកាស«ឱសានវាទ» ប្រហាក់ប្រហែលគ្នា នឹងក្រុង ម៉ាឌ្រីត ដែរ។ សារទាំងអស់នោះ ត្រូវបានសាទរភ្លាមៗ ដោយមេដឹកនាំប្រឆាំង លោក រ៉ន់ ហ្គេឌូ ដែលបានប្រកាសខ្លួន កាលពីថ្ងៃពុធ ជាប្រធានាធិបតីស្ដីទី នៃប្រទេសវេណេស៊ុយអេឡា។

«ឱសានវាទ»ខាងលើ អាចនឹងត្រូវសហភាពអ៊ឺរ៉ុប ប្រកាសតាមក្នុងពេលខាងមុខ បើទោះជាកាលពីថ្ងៃសុក្រ បណ្ដារដ្ឋសមាជិកទាំង២៨ នៅមានការខ្វែងគំនិតគ្នា ជុំវិញវិបត្តិនៅប្រទេស​វេណេស៊ុយអេឡា នេះក៏ដោយ។ ប្រទេសមួយចំនួន ក្នុងសហភាពអ៊ឺរ៉ុប គិតថា គួរត្រូវចេញសេចក្ដីប្រកាស ឲ្យបានខ្លាំងក្លា ដើម្បីបញ្ជូនសារ ទៅឲ្យលោក ម៉ាឌូរ៉ូ ខណៈប្រទេសក្រិច​បានជំទាស់គម្រោងនេះ។

នៅអង្គការសហប្រជាជាតិ កិច្ចប្រជុំបន្ទាន់មួយ ដែលស្នើឡើង​ដោយសហរដ្ឋអាមេរិក ត្រូវបានរៀបចំធ្វើ ក្នុងរសៀលថ្ងៃសៅរ៍នេះ ដោយមានការចូលរួម ពីប្រទេសជាច្រើន ជាពិសេសពីបណ្ដាប្រទេស នៅក្នុងតំបន់។ រដ្ឋមន្ត្រីការបរទេសវេណេសុយអេឡា លោក «Jorge Arreaza» ដែលស្និតលោក នីកូឡា ម៉ាឌូរ៉ូ ត្រូវបានអញ្ជើញឲ្យចូលរួម ក្នុងកិច្ចប្រជុំនេះ ហើយគ្រោងឡើង​ថ្លែង​សុន្ទរកថា អំពី«ការពិត»មួយ។

កាលពីព្រឹកថ្ងៃសៅរ៍ សហរដ្ឋអាមេរិកបានស្នើ​សេចក្ដីប្រកាសមួយ ឡើងទៅក្រុមប្រឹក្សាសន្តិសុខ ដើម្បីផ្ដល់នូវ«ការគាំទ្រទាំងស្រុង» ចំពោះរដ្ឋសភា​​របស់ប្រទេស​វេណេស៊ុយអេឡា ដែលគ្រប់គ្រងដឹកនាំ ដោយគណបក្សប្រឆាំង។ សេចក្ដីប្រកាសនោះ នឹងផ្ដល់តួនាទីឲ្យអង្គការ​សហប្រជាជាតិ ដើម្បីនាំមកឲ្យប្រទេសនេះវិញ នូវលិទ្ធិប្រជាធិបតេយ្យ​ពេញលេញ។

ប៉ុន្តែសេចក្ដីប្រកាសនោះ ត្រូវបានរាំងខ្ទប់ភ្លាមៗ ដោយប្រទេសចិន និងរ៉ុស្ស៊ី។

មកដល់ម៉ោងនេះ មានតែសហរដ្ឋអាមេរិកតែមួយគត់ ពីក្នុងចំណោមសមាជិកអចិន្ត្រៃយ៍ អ.ស.ប ទាំងប្រាំ ដែលទទួលស្គាល់លោក រ៉ន់ ហ្គេឌូ ជាប្រធានាធិបតីស្របច្បាប់ ខណៈសមាជិកអចិន្ត្រៃយ៍ចំនួនពីរ គឺចិន និងរ៉ុស្ស៊ី បានបង្ហាញជំហររបស់ផងខ្លួន យ៉ាងច្បាស់ ថានៅតែគាំទ្រ ដល់របបដឹកនាំរបស់លោក នីកូឡា ម៉ាឌូរ៉ូ ដដែល។

គម្រោងដំណោះស្រាយមួយទៀត ដែលស្នើឡើងដោយប្រទេសរ៉ុស្ស៊ី ក្នុងបំណងចងឲ្យមានការជជែក រវាងភាគីនយោបាយ នៅប្រទេសវេណេស៊ុយអេឡា ត្រូវបានសហរដ្ឋអាមេរិកច្រានចោលដូចគ្នា ដោយវាយតម្លៃដំណោះស្រាយនោះ ថា«មិនអាចទទួលយកបាន»៕



You may also like

កម្ពុជា

សម រង្ស៊ី៖ «នីកូឡា ម៉ាឌូរ៉ូ ដូច ហ៊ុន សែន»

គូបដិបក្ខផ្នែកនយោបាយដ៏ស្រួចស្រាវ របស់លោកនាយករដ្ឋមន្ត្រី ហ៊ុន សែន បានប្រដូចបុរសខ្លាំងកម្ពុជារូបនេះ ទៅនឹងប្រធានាធិបតីវេណេស៊ុយអេឡា លោក នីកូឡា ម៉ាឌូរ៉ូ (Nicolas Maduro) ដោយពន្យល់ឡើងថា ករណីមេដឹកនាំទាំងពីរ ...
ដំណឹង

ហ្គេដូ៖ «ភារកិច្ចខ្ញុំ គឺត្រូវ​នៅក្នុង​ស្រុក ទោះ​ត្រូវមាន​គ្រោះថ្នាក់​បែបណាក្ដី»

«ក្លាយជាអ្នកទោសម្នាក់ មិនមានប្រយោជន៍អ្វីទេ ហើយធ្វើជាប្រធានាធិបតីនិរទេសខ្លួនមួយរូប ក៏មិនខុសគ្នាដែរ។ យើងកំពុងស្ថិតក្នុងស្ថានភាព ដែលមិនធ្លាប់មានពីមុនមក (…) តួនាទីរបស់ខ្ញុំ និង ភារកិច្ចខ្ញុំ គឺត្រូវនៅក្នុងរដ្ឋធានី ការ៉ាកាស ទោះជាត្រូវប្រឈមនឹងគ្រោះថ្នាក់បែបណាក្ដី។» ...
ដំណឹង

អាមេរិកដាក់«ទណ្ឌកម្មហិរញ្ញវត្ថុ» ប្រឆាំងមេដឹកនាំយោធា​វេណេស៊ុយអេឡា

ក្រុងវ៉ាស៊ីនតោន បានសម្រេចជាផ្លូវការ ក្នុងថ្ងៃសុក្រទី១ ខែមិនា ឆ្នាំ២០១៩នេះ ដាក់«ទណ្ឌកម្មហិរញ្ញវត្ថុ» ប្រឆាំងឧត្ដមសេនីយ៍យោធា និងអ្នកទទួលខុសត្រូវជាច្រើននាក់ ដែលស្និតនឹងលោក នីកូឡា ម៉ាឌូរ៉ូ (Nicolas Maduro) ...

Comments are closed.

ដំណឹង

សង្គ្រាមនៅអ៊ុយក្រែន ៖ អាមេរិកផ្ដល់ភ្លើងខៀវបញ្ជូនយន្តហោះ«F-16»

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

អ្នកជំនាញមួយក្រុមរបស់អង្គការសហប្រជាជាតិ បានអំពាវនាវទៅ​របបដឹកនាំរបស់លោក ហ៊ុន សែន ឲ្យដោះលែងអ្នកស្រី សេង ធារី មេធាវីខ្មែរអាមេរិកាំង ដែលគេស្គាល់ក្នុងពេលកន្លងមក ថាជា«ស្ត្រីសេរីភាព» តាមរយៈសម្លៀកបំពាក់តែងខ្លួនសម្ដែងមតិរបស់អ្នកស្រី នៅខាងមុខសាលាដំបូងរាជធានីភ្នំពេញ។ ក្រុមអ្នកជំនាញប្រឆាំងការឃុំឃាំងតាមទំនើងចិត្ត ...
កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...