តើ«សន្តិភាព»របស់ CPP ជួយដោះស្រាយអ្វីខ្លះ ក្នុងវិបត្តិ«Covid-19»?
ចម្លើយខ្លី គឺ«សន្តិភាព» ដែលរដ្ឋាភិបាលគណបក្សប្រជាជនកម្ពុជា តែងលើកឡើង ប្រាប់ឲ្យពលរដ្ឋ ស្រែកតាមនោះ មិនបានជួយដោះស្រាយអ្វីឡើយ នៅក្នុងវិបត្តិ«Covid-19»។ នេះ បើតាមការអះអាង របស់លោក ប៉ា ងួនទៀង នាយកមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) និងជាអ្នកឃ្លាំមើលបញ្ហាសង្គម យ៉ាងជាប់លាប់មួយរូប។
តែយ៉ាងហោចណាស់ ក៏ក្នុងមួយរយៈកាលចុងក្រោយ ពាក្យ«អរគុណសន្តិភាព» ហាក់រៀងរសាយ ដោយគេមិនឃើញប្រព័ន្ធឃោសនា របស់ក្រុងភ្នំពេញ លើកយកពាក្យនេះ មកឃោសនាយ៉ាងសន្ធឹកសន្ធាប់ ដូចលើកមុនៗទេ។
សម្រាប់លោក ប៉ា ងួនទៀង បានពន្យល់ថា នោះគឺដោយសារតែតម្រូវការជាមូលដ្ឋាន និងចំពោះមុខ ក្នុងវិបត្តិនៃការរាតត្បាត មិនមែនគ្រាន់តែ ជាពាក្យ«សន្តិភាព»មួយម៉ាត់ ដែលរដ្ឋាភិបាលលោក ហ៊ុន សែន តម្រូវឲ្យហោរកញ្ជៀវតាមនោះទេ។
នាយក «CCIM» បានសរសេរនៅលើបណ្ដាញសង្កមថា គឺវិបត្តិនេះ បានពន្យល់ឲ្យពលរដ្ឋខ្មែរដឹងថា មនុស្សមិនអាចរស់នៅ ដោយខ្វះតម្រូវការជាមូលដ្ឋាន សម្រាប់ជីវិតបានឡើយ។ លោក ងួនទៀង បានរៀបរាប់ថា៖
«១) អាហារ (ត្រូវការមានការងារ ឬមុខរបរ ដើម្បីមានចំណូល) ដោយយើងមិនអាចហូបសន្តិភាពកើត ហើយសន្តិភាព មិនអាចទូទាត់បំណុលធានាគារ ឬទិញទំនិញផ្សេងៗបានទេ។»
«២) ជំរករស់នៅ ដោយសន្តិភាព មិនអាចទិញផ្ទះ ឬជួលផ្ទះបានទេ។»
«៣) សុខភាព (សេវាសុខភាព ប្រកបដោយគុណភាព និងអាចទទួលយកបាន ហើយអាចទៅរកបាន គ្រប់ពេល) ដោយពេលឈឺ សន្តិភាពព្យាបាលមិនកើត ហើយពេទ្យអត់ទទួលយកសន្តិភាពទេ គឺយកលុយ។»
«៤) ដូចគ្នាដែរចំពោះសេវា និងគុណភាព នៅក្នុងវិស័យអប់រំ។»
អ្នកឃ្លាំមើលបញ្ហាសង្គមរូបនេះ បានអះអាងបន្ថែមថា មេដឹកនាំគណបក្សប្រជាជនកម្ពុជា ដែលបានគ្រប់គ្រងប្រទេសកម្ពុជា ជាង៤០ឆ្នាំមកនេះ បានបរាជ័យក្នុងការធ្វើឲ្យប្រជាពលរដ្ឋខ្មែររស់នៅ ដោយទទួលបាន នូវសេចក្តីត្រូវការជាមូលដ្ឋាន ដែលហៅជាភាសាអង់គ្លេស «Basic Needs» (ឬភាសាបារាំង «Besoins Essentiels») សំរាបជីវិតរបស់ពួកគេ ដូចបានរៀបរាប់ខាងលើ។
លោក ងួនទៀង បន្តទៀតថា ផ្ទុយទៅវិញ ក្រុមមេដឹកនាំទាំងនេះ បែរជាខំបន្លំប្រជាពលរដ្ឋ ឲ្យគិតរឿងផ្សេង។ លោកសរសេរថា៖
«នៅពេលដែលពួកអ្នកកាន់អំណាច ខំស្រែកឲ្យប្រជាពលរដ្ឋ គិតរឿងសន្តិភាព បែរជាក្រុមអ្នកកាន់អំណាចទាំងនោះ នាំគ្នាគិតតែរឿងលុយ និងទ្រព្យសម្បត្តិ។»
«ជាកាតព្វកិច្ច មេដឹកនាំគណបក្សប្រជាជនកម្ពុជា ដែលកពុងកាន់អំណាច ត្រូវតែបង្កើតសន្តិភាពពិតប្រាកដ និងលក្ខខណ្ឌ័រស់នៅដោយថ្លៃថ្នូរ សំរាប់ពលរដ្ឋខ្មែរ៕»
