កម្ពុជាដំណឹង

អាមេរិកស្នើជាថ្មី​​ឲ្យ​ក្រុងភ្នំពេញ​ស៊ើបអង្កេត​«ពេញលេញ»​លើ​ឃាតកម្ម កែម ឡី

សហរដ្ឋអាមេរិក តាមរយៈស្ថានទូតរបស់ខ្លួន ប្រចាំនៅកម្ពុជា បានប្រកាសអំពាវនាវសារជាថ្មី ឲ្យរដ្ឋាភិបាល​របស់​លោក​នាយករដ្ឋមន្ត្រី ហ៊ុន សែន បើកការស៊ើបអង្កេត​«ពេញលេញ ប្រកបដោយតម្លាភាព និងគួរឲ្យទុកចិត្តបាន» ក្នុងឃាតកម្មលើលោកបណ្ឌិត កែម ឡី ដែលបានកើតឡើង កណ្ដាលរាជធានីភ្នំពេញ កាលពីបីឆ្នាំមុន។

នៅលើទំព័រហ្វេសប៊ុករបស់ស្ថានទូត កាលពីប៉ុន្មានម៉ោងមុន បានសរសេរឲ្យដឹងថា៖ 

«នៅខួបលើកទី ៣ នៃការស្លាប់របស់លោក រដ្ឋាភិបាលសហរដ្ឋអាមេរិក សូមអំពាវនាវសារជាថ្មី ឲ្យរដ្ឋាភិបាលកម្ពុជាធ្វើការស៊ើបអង្កេត ពេញលេញ ប្រកបដោយតម្លាភាព និងគួរអោយទុកចិត្តបាន ទៅលើការធ្វើឃាត លើលោក កែម ឡី។»

ស្ថានទូតនៃប្រទេសមហាអំណាច បានបន្តថា៖

«យើងក៏សូមសម្តែងផងដែរ នូវសមានទុក្ខសារជាថ្មី ដល់គ្រួសាររបស់លោក កែម ឡី ដែលនៅកំពុងរង់ចាំ ហើយនៅសង្ឃឹមនៅឡើយ លើការទទួលខុសត្រូវពេញលេញ ចំពោះការសម្លាប់ដ៏កំសាក និងដោយមិនសមហេតុផល លើរូបលោក។»

«ការស៊ើបអង្កេត​បែប​លេងសើច និងសវនាការបែប​លាង​សម្អាត… »

អ្នកធ្វើអត្ថាធិប្បាយនយោបាយ ដ៏ល្បីល្បាញ លោកបណ្ឌិត កែម ឡី ត្រូវបានឃាតករ​ឈាមត្រជាក់បាញ់សម្លាប់ កាលពីព្រឹកថ្ងៃទី១០ ខែកក្កដា ឆ្នាំ២០១៦ នៅខណៈលោក កំពុងទទួលទានកាហ្វេ នៅក្នុងហាងលក់ទំនិញ ស្តាម៉ាត នៃស្ថានីយចាក់ប្រេងឥន្ទនៈ កាល់តិច ស្ថិតនៅស្ដុបបូកគោ កណ្ដាលរាជធានីភ្នំពេញ។ មកដល់ថ្ងៃនេះ មានតែបុរស អឿត អាង ហៅ ជួប សម្លាប់ តែម្នាក់គត់ ដែលត្រូវបានចាប់ខ្លួន និងផ្ដន្ទាទោស។

បណ្ដុំអង្គការជាតិ-អន្តរជាតិធំៗ និងល្បីៗ ចំនួន២៤ បានចេញសេចក្ដីថ្លែងការណ៍ ដ៏វែងអន្លាយមួយ ចាត់ទុកបុរស អឿត អាង ខាងលើ ថាគ្រាន់តែជាជនសង្ស័យម្នាក់ ដែលកើតចេញពីការស៊ើបអង្កេត បែបលេងសើច របស់អាជ្ញាធរក្រុងភ្នំពេញ ដើម្បី​យកទៅ​ផ្ដន្ទាទោស តាមរយៈសវនាការមួយ បែបលាងសម្អាត របស់តុលាការកម្ពុជាប៉ុណ្ណោះ។

ក្នុងសេចក្ដីថ្លែងការណ៍ ដែលចេញនៅថ្ងៃទី៩ ខែកក្កដា ឆ្នាំ២០១៩ ពោលគឺមុនមួយថ្ងៃ នៃខួបបីឆ្នាំ ក្រុមអង្គការជាតិ-អន្តរជាតិទាំងនោះ បានរំឮកកម្ពុជា ពីកាតព្វកិច្ចរបស់ប្រទេសនេះ នៅចំពោះច្បាប់ និងកតិកាសញ្ញាអន្តរជាតិទាំងឡាយ ដែលកម្ពុជាជារដ្ឋភាគី ក្នុងការបើកការស៊ើបអង្កេតមួយ ដែលមានលក្ខណៈឯករាជ្យ ទទួលយកបាន និងមានប្រសិទ្ធិភាព ចំពោះមរណភាពណាក៏ដោយ ដែលរងការសង្ស័យថា ខុសច្បាប់៕

(English below) នៅខួបលើកទី ៣ នៃការស្លាប់របស់លោក រដ្ឋាភិបាលសហរដ្ឋអាមេរិកសូមអំពាវនាវសារជាថ្មី…

Posted by U.S. Embassy Phnom Penh, Cambodia on Thursday, July 11, 2019


You may also like

វិភាគ អត្ថាធិប្បាយ

រវាង ចន ម៉ាកខេន – ដូណាល់ ត្រាំ ជា​ជម្លោះតជាតិ

ប្រធានាធិបតីអាមេរិក លោក ដូណាល់ ត្រាំ (Donald Trump) បានសម្រេចចិត្តថា នឹងមិនទៅចូលរួមបុណ្យសព​ព្រឹទ្ធសមាជិក លោក ចន ម៉ាកខេន (John McCain) ...
ដំណឹង

ត្រាំ បង់ពន្ធប្រកាស ៧៥០​ដុល្លារ តែចំណាយ​៧ម៉ឺនដុល្លារ​ដើម្បី​កាត់សក់

លោក ដូណាល់ ត្រាំ (Donald Trump) ប្រធានាធិបតីអាមេរិក បានបង់ពន្ធប្រកាស ត្រឺមតែ ៧៥០​ដុល្លារ ប៉ុណ្ណោះ ដែលខុសគ្នាឆ្ងាយ ពីតម្លៃកាត់សក់របស់លោកម្ដងៗ ដែល​មានកម្រិត ...
ដំណឹង

ដូណាល់ ត្រាំ នឹង​ចូលគាល់​អធិរាជជប៉ុន ណារូហ៊ីតូ ដំបូងគេ

ប្រធានាធិបតីអាមេរិក លោក ដូណាល់ ត្រាំ (Donald Trump) បានមកដល់ប្រទេស​ជប៉ុន កាលពីថ្ងៃសៅ៍ ដើម្បីដំណើរទស្សនកិច្ចផ្លូវការ ដែលមានរយៈពេល៤ថ្ងៃ ក្នុងប្រទេសអាស៊ីខាងកើតមួយនេះ។​ ជាដំណើរលើកទីពីររបស់លោក ត្រាំ ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...