ស្ថានទូត​អាមេរិក​រិះគន់​«សមិទ្ធិផល​ចិន» ថា​គ្មាន​គុណភាព​និង​អសុវត្ថិភាព

«តើអ្នកមើលឃើញ រូបភាពរួម[ដូច្នេះ]ឬទេ?» ជាសំនួររបស់ទំព័រហ្វេសប៊ុក នៃស្ថានទូតសហរដ្ឋអាមេរិក សួរទៅកាន់ប្រិយមិត្តរបស់ខ្លួន ជុំវិញគុណភាព និងសុវត្ថិភាព ចំពោះ«សមិទ្ធិផល​ចិន» ដែលត្រូវបានសង់ឡើង នៅក្នុងបណ្ដាប្រទេសនានា ក្នុងពិភពលោក។

ហើយសំណេរនោះ គឺជាភាគបន្តនៃការឌឺដងផ្លែផ្កា រវាងស្ថានទូតនៃមហាយក្សទាំងពីរ នៅក្នុងប្រទេសកម្ពុជា រាប់ចាប់តាំងពីចុងសប្ដាហ៍មុនមក។

កាលពីថ្ងៃសុក្រ ស្ថានទូតអាមេរិកបានលើកឡើង នៅលើទំព័រហ្វេសប៊ុករបស់ខ្លួន អំពី«ឱនភាពពាណិជ្ជកម្ម» ដ៏ធំធេងរបស់កម្ពុជា នៅចំពោះទំនាក់ទំនងពាណិជ្ជកម្ម កម្ពុជា-ចិន ដែលផ្ទុយគ្នាស្រឡះ ពីទំនាក់ទំនងពាណិជ្ជកម្ម កម្ពុជា-អាមេរិក ឬកម្ពុជា-សហភាព​អ៊ឺរ៉ុប។

នៅចំពោះសំណេររបស់ស្ថានទូតអាមេរិក មហាយក្សចិនបានឆ្លើយតបវិញ តាមរយៈបណ្ដាញសង្គមដូចគ្នា ដោយលើកឡើងថា ឱនភាពពាណិជ្ជកម្មនោះ គឺដោយសារកម្ពុជាត្រូវការវត្ថុធាតុដើម ដើម្បីផ្គត់ផ្គង់ ឲ្យដំណើរការផលិតកម្មរបស់ខ្លួន។

ស្ថានទូតចិនបានសរសេរប្រើរូបភាព ពន្យល់«មិត្តកម្ពុជា» អំពីអ្វីដែលស្ថានទូត នៃប្រទេសកុម្មុយនីស្ដិ៍ ចោទស្ថានទូតអាមេរិកថា «កំពុងបង្កបញ្ហាម្ដងហើយ ម្ដងទៀត» និងព្រមទាំងបានរំលើក ពីស្នាដៃសាងសង់ ស្ពាន-ថ្នល់-វារីអគ្គិសនី ដែលចិនសម្រេចបាននៅកម្ពុជា មុននឹងចោទសួរ ទៅសហរដ្ឋអាមេរិកវិញថា តើធ្វើអ្វីបានខ្លះហើយ?

តែនៅព្រឹកថ្ងៃចន្ទ ដើមសប្ដាហ៍នេះ ចម្លើយរបស់មហាយក្សកុម្មុយនីស្ដិ៍ ក្នុងប្រទេសកម្ពុជា ក៏ទទួលបានការវាយបក ពីស្ថានទូតស្ថានទូតអាមេរិកវិញដែរ ដោយមហាយក្សលោកសេរី បានរិះគន់យ៉ាងជូរចត់ ចំពោះសមិទ្ធិផលទាំងឡាយ ដែលប្រទេសចិនបានសាងសង់ នៅតាមបណ្ដាប្រទេសនានា ក្នុងពិភពលោក។

«សមិទ្ធិផល​ចិន… គ្មានតម្លាភាពនិងគណនេយ្យភាព»

ស្ថានទូតអាមេរិក បានយកករណីទំនប់វារីអគ្គិសនីមួយ នៅប្រទេសអេក្វាទ័រ មកសរសេរពន្យល់ នៅលើទំព័រហ្វេសប៊ុករបស់ខ្លួន ដូច្នេះថា៖

«ពីរឆ្នាំក្រោយពីក្រុមហ៊ុនសំណង់រដ្ឋចិន បានសង់ទំនប់វារីអគ្គិសនីដ៏ធំមួយ នៅប្រទេស Ecuador ទំនប់នេះដូចជាគ្មានដំណើរការសោះ។ សំណង់គ្មានគុណភាព និងការមិនគិត ពីស្តង់ដាសុវត្ថិភាព មានន័យថា កសិករនៅផ្នែកខាងក្រោម ត្រូវទទួលរងការជន់លិច ជាញឹកញាប់។»

ស្ថានទូតនៃមហាអំណាចលោកសេរី បានប្រាប់ឲ្យចូលទៅអានបន្ត នូវរបាយការណ៍មួយ ផ្សាយនៅលើគេហទំព័ររដ្ឋាភិបាលអាមេរិក ដែលរៀបរាប់យ៉ាងលំអិត អំពីគំរោងសាងសង់ ក្រោមគោលនយោបាយ ខ្សែក្រវ៉ាត់មួយ-ផ្លូវមួយ របស់ប្រទេសចិន និងអំពីបញ្ហារបស់វា ដែល«គ្មានតម្លាភាព និងគណនេយ្យភាព» នៅត្រង់គុណភាព និងសុវត្ថិភាព។

មិនប្រាកដថា ស្ថានទូតចិនប្រជាមានិតសាទរ ចំពោះការលើកឡើង របស់ស្ថានទូតអាមេរិក ខាងលើនេះទេ ហើយគេនឹងរង់ចាំមើល ពីប្រតិកម្មរបស់ស្ថានទូត មហាអំណាចតំបន់មួយនេះ នៅក្នុងពេលខាងមុខ៕