ស្ថានទូតអាមេរិក ប្រចាំនៅកម្ពុជា បានលើកយកតួលេខ មកពន្យល់ថា ទំនាក់ទំនងពាណិជ្ជកម្មរវាងកម្ពុជា និងចិន មានទំហំធំជាងនរណាទាំងអស់។ តែផ្ទុយទៅវិញ ទំនាក់ទំនងនេះ ផ្ដល់ផលចំណេញសម្រាប់ប្រទេសចិន ច្រើនជាងប្រទេសកម្ពុជាខ្លួនឯង ខុសគ្នាឆ្ងាយ ពីទំនាក់ទំនងពាណិជ្ជកម្ម រវាងកម្ពុជា ជាមួយសហរដ្ឋអាមេរិក ឬកម្ពុជា ជាមួយសហភាពអ៊ឺរ៉ុប។
ទំព័រហ្វេសប៊ុករបស់ស្ថានទូត បានបង្ហោះរូបភាពបង្ហាញពីតួលេខទាំងនេះ កាលពីប៉ុន្មាននាទីមុន ដោយសរសេរអមថា៖
«ប្រទេសចិន គឺជាដៃគូពាណិជ្ជកម្មធំជាងគេ របស់ប្រទេសកម្ពុជា តែទំនាក់ទំនងនេះចំណេញខ្លាំង ទៅខាងប្រទេសចិន។ ប្រហែល ៨៧% នៃទំនិញដោះដូរគ្នា គឺជាទំនិញនាំចូលមកពីប្រទេសចិន ដែលមិនជួយ ដល់ការធ្វើអោយមានការងារ ឬជួយដល់ឧស្សាហកម្ម ដូចទំនាក់ទំនងរបស់ប្រទេសកម្ពុជា ជាមួយសហរដ្ឋអាមេរិក ឬសហភាពអឺរ៉ុបនោះទេ។»
សំណេររបស់ស្ថានទូត នៃប្រទេសមហាអំណាច បានឲ្យដឹងទៀតថា៖
«នេះគ្រាន់តែជាផ្លូវមួយទៀត ដែលប្រទេសកម្ពុជាបានងាកចេញ ពីយុទ្ធសាស្រ្តសេដ្ឋកិច្ច ដែលមានតុល្យភាព និងលក្ខណៈចម្រុះច្រើន ទៅរកយុទ្ធសាស្រ្តសេដ្ឋកិច្ច ដែលមានការពឹងផ្អែកច្រើន ទៅលើប្រទេសចិន។»
*English below* ប្រទេសចិនគឺជាដៃគូពាណិជ្ជកម្មធំជាងគេរបស់ប្រទេសកម្ពុជា តែទំនាក់ទំនងនេះចំណេញខ្លាំងទៅខាងប្រទេសចិន។ ប្រហែល…
Publiée par U.S. Embassy Phnom Penh, Cambodia sur Vendredi 19 avril 2019
ការលើកឡើងរបស់ ស្ថានទូតអាមេរិក ធ្វើឡើងក្នុងខណៈពេល ដែលប្រទេសកម្ពុជាកំពុងរងវិធានការជាបន្តបន្ទាប់ ពីសហភាពអ៊ឺរ៉ុប ជុំវិញការដកប្រព័ន្ធអនុគ្រោះពន្ធ «EBA» បើសិនណាជារបបដឹកនាំក្រុងភ្នំពេញ មិនវិលត្រឡប់មកដឹកនាំប្រទេស តាមបែបលទ្ធិប្រជាធិបតេយ្យ និងការគោរពសិទ្ធិមនុស្សវិញនោះ។
ក្រុមអ្នកតំណាងរាស្ត្រ និងព្រឹទ្ធសមាជិកអាមេរិកច្រើននាក់ ក៏កំពុងធ្វើច្បាប់ ដើម្បីឈានទៅដកប្រព័ន្ធអនុគ្រោះពន្ធ «GPS» ដែលផ្ដល់ដោយសហរដ្ឋអាមេរិក ចេញពីកម្ពុជាដែរ។
ក្រុមអ្នកវិភាគបានរំពឹងថា ការដកប្រព័ន្ធអនុគ្រោះពន្ធទាំងនេះ ចេញពីប្រទេសកម្ពុជា នឹងធ្វើឲ្យការនាំទំនិញពីកម្ពុជា ទៅកាន់លំហទីផ្សារយក្សទាំងពីរ ចុះខ្សោយ។ អ្នកវិភាគ អះអាងទៀតថា បើសិនជាការនាំចេញថយចុះ នោះវានឹងប៉ះពាល់ ទៅដល់ផលិតកម្ម ប្រាក់ចំណូលតាមរយៈការបង់ពន្ធ និងការងាររបស់ពលករក្នុងស្រុក។
យ៉ាងណា លោកនាយករដ្ឋមន្ត្រី ហ៊ុន សែន បានថ្លែង និងបន្តថ្លែងនៅក្នុងសុន្ទរកថា ជាសាធារណៈរបស់លោក តាំងពីច្រើនសប្ដាហ៍ចុងក្រោយនេះ ថាលោក និងរដ្ឋាភិបាលលោក មិនខ្ចីខ្វល់ចំពោះបរទេសណា ដែលចង់ ឬមិនចង់កាត់ប្រព័ន្ធអនុគ្រោះពន្ធនេះ ពីរបបដឹកនាំរបស់លោកទេ។
មេដឹកនាំកម្ពុជារូបនេះ បានបញ្ជាក់ថា កម្ពុជាក្រោមការដឹកនាំរបស់លោក ធ្លាប់បានរស់ និងធ្លាប់បានឆ្លងកាត់ហើយ សម័យកាលនៃការដាក់ទណ្ឌកម្ម ទាំងផ្នែកនយោបាយ និងផ្នែកសេដ្ឋកិច្ច (រវាងពីឆ្នាំ១៩៧៩ មកដល់ឆ្នាំ១៩៩១) ដូច្នេះកម្ពុជានឹងបន្តរស់បានទៀត ចាប់ពីពេលនេះ បើទោះជាគ្មានប្រព័ន្ធអនុគ្រោះពន្ធ ពីក្រុមប្រទេសម្ចាស់ទីផ្សារធំៗ នោះក៏ដោយ៕
