បញ្ចាំងវីដេអូផិតក្បត់របស់ភរិយា ក្នុងថ្ងៃអាពាហ៍ពិពាហ៍ នៅចំពោះមុខភ្ញៀវ
រង់ចាំដល់ថ្ងៃមង្គលការ ដើម្បីសងសឹក នៅចំពោះមុខភ្ញៀវ ដែលមកចូលរួមឬ? ជារឿងរ៉ាវ ដែលបានកើតឡើង កាលពីចុងខែធ្នូ ឆ្នាំ២០១៩ ក្នុងខេត្ត «Fujian» ភាគអាគ្នេយ៍នៃប្រទេសចិន។
ខណៈពិធីមង្គល់ការ បានប្រព្រឹត្តិទៅ ដូចបានព្រាងទុក បុរសជាប្ដីបានបញ្ចាំងវីដេអូ បង្ហាញរូបភាព នៅលើអេក្រង់ដ៏ធំ ឃើញស្ត្រីជាភរិយា បានរួមរ័ក្សស្នេហា ជាមួយបងថ្លៃរបស់ខ្លួន (ប្ដីរបស់បងស្រី ដែលមានផ្ទៃពោះ ក្នុងពេលនោះ)។
នៅពេលចាប់ផ្ដើមរូបភាព ដែលមានរយៈពេលសរុប ប្រមាណជា៥នាទី បុរសជាប្ដីបានងាក ទៅនិយាយជាមួយភរិយាខ្លួនថា៖
«នាងឯងស្មានថា ខ្ញុំមិនដឹងឬ?»
នៅចំពោះការទម្លាយរឿងអាស្រូវ ដ៏អាម៉ាស ស្ត្រីជាភរិយាបានគប់បាច់ផ្កា ទៅបុរស ហើយអ្នកទាំងពីរ ចាប់ផ្ដើមវាយប្រតប់គ្នា មុននឹងត្រូវបានញាតិមិត្ត ទាំងសងខាង ចាប់បំបែកគ្នាចេញ។
បើតាមប្រព័ន្ធផ្សព្វផ្សាយ ក្នុងប្រទេសចិន បានឲ្យដឹងថា អ្នកទាំងពីរបានរស់នៅជាមួយគ្នា តាំងពី២ឆ្នាំមកហើយ និងបានភ្ជាប់ពាក្យជាមួយគ្នា កាលពី៦ខែមុន។ ប៉ុន្តែ នៅក្នុងរយៈពេលនោះ បុរសជាប្ដីបានដឹង ពីទំនាក់ទំនងសម្ងាត់ រវាងគូដណ្ដឹងខ្លួន និងបងប្រុសថ្លៃរបស់នាង។
ដោយហេតុនេះ ទើបបុរសបានលួចបំពាក់ កាម៉េរ៉ាសម្ងាត់មួយ ជាប់នឹងពិដានបន្ទប់គេង នៅពេលធ្វើការជុសជុលផ្ទះ។
គេហទំព័រមួយ ដាក់ឈ្មោះ «Jiang Zhe Hu Ba Jie» បានត្រឡប់មកពន្យល់ ពីហេតុការណ៍នេះថា ស្ត្រីជាភរិយា (ដែលជាគូដណ្ដឹង ក្នុងពេលប្រពឹត្តិអំពើផិត) ទំនងជាបានផិតប្ដីខ្លួន នៅពេលផ្ទុះជម្លោះ ដ៏ហិង្សា និងជាច្រើនដង រវាងអ្នកទាំងពីរ។ ប្រភពដដែល បានអះអាងទៀតថា នាងបានយល់ព្រមរៀបការ ដោយហេតុថា បុរសជាប្ដីបានសន្យា ផ្ដល់ផ្ទះសម្បែង និងរថយន្ដសម្រាប់នាង៕
