កម្ពុជាដំណឹង

«អ.ស.ប និង​សហគមន៍​អន្តរជាតិ​ត្រូវទប់ស្កាត់​ផែនការឧក្រិដ្ឋ​របស់ ហ៊ុន សែន»

មេដឹកនាំប្រឆាំង លោក សម រង្ស៊ី បានអំពាវនាវពីរដ្ឋធានីប៉ារីស ប្រទេសបារាំង ទៅកាន់អង្គការសហប្រជាជាតិ (អ.ស.ប) និងសហគមន៍អន្តរជាតិ ឲ្យធ្វើការទប់ស្កាត់បទបញ្ជាមួយ ពីក្នុងចំណោមបទបញ្ជាចំនួនពីរ របស់លោកនាយករដ្ឋមន្ត្រី ហ៊ុន សែន ដែលត្រូវបានឲ្យដឹង រយៈសារបែកធ្លាយមួយ ថានឹង​«សម្លាប់​ក្រុមប្រឆាំង»​ក្នុងប្រទេស​ឲ្យអស់។

លោក សម រង្ស៊ី បានហៅបទបញ្ជានោះ​របស់លោក ហ៊ុន សែន ថាជា«ផែនការឧក្រិដ្ឋ» ដែលមានលក្ខណៈជាការសម្លាប់រង្គាល និងដែលមិនធ្លាប់មាន រាប់ចាប់តាំងពីរបបខ្មែរក្រហម បានរំលំរលាយទៅ។

នៅក្នុងសេចក្ដីអំពាវនាវ សរសេរជាភាសាអង់គ្លេស​របស់មេដឹកនាំប្រឆាំង ដែលទស្សនាវដ្ដី​មនោរម្យ.អាំងហ្វូ ទើបនឹងទទួលបាន​កាលពីប៉ុន្មាននាទីមុន បានអះអាងថា បទបញ្ជារបស់លោក ហ៊ុន សែន ដែលបញ្ជាឲ្យ«សម្លាប់ក្រុមប្រឆាំង»ឲ្យអស់ នៅក្នុងសារបែកធ្លាយ​​នោះ គឺជាការអះអាងមួយទៀត បញ្ជាក់ពីគោលនយោបាយរបស់លោក ហ៊ុន សែន ដែលធ្លាប់ប្រកាសកន្លងមក ឲ្យកម្ទេចរាល់អ្នករិះគន់១០០ ឬ២០០នាក់ចោល។

លោក សម រង្ស៊ី បានសរសេរថា៖

«ការប្រកាស [របស់លោក ហ៊ុន សែន] នោះមានន័យស្មើ​នឹងបទបញ្ជា​ឲ្យសម្លាប់។ គោលបំណង​របស់​លោក ហ៊ុន សែន ក្នុងការប្រើប្រាស់​វិធានការ​មនុស្សឃាត ដើម្បីកម្ទេចសម្លេងរិះគន់ ធ្លាប់ត្រូវបានបង្ហាញឲ្យដឹង ជាសាធារណៈច្រើនដង​រួចមកហើយ នៅក្នុង​ពេល​កន្លងមក។»

«គណបក្សសង្គ្រោះជាតិ ត្រូវបានគាំទ្រដោយប្រជាជនកម្ពុជារាប់លាននាក់ ហើយគណបក្សនេះទទួលបានសម្លេងគាំទ្រ ជិតពាក់កណ្ដាលប្រទេស នៅក្នុងការបោះឆ្នោតជាតិ ឆ្នាំ២០១៣ និងការបោះឆ្នោតជ្រើសតាំងក្រុមប្រឹក្សាឃុំសង្កាត់ ឆ្នាំ២០១៧។»

ហ៊ុន សែន សហភាពអ៊ឺរ៉ុប អ.ស.ប និង«ឱកាស»

ក្នុងសារជាលក្ខណៈឯកជន ជាង១២នាទី ដែលលោក​បាន​បញ្ជូន​​​ ទៅកាន់​​មនុស្ស​​ជំនិតៗ​​របស់​លោក តាមរយៈប្រព័ន្ធ​​បញ្ជូនសារមួយ លោក ហ៊ុន សែន បានពន្យល់​នៅក្នុងបញ្ជានោះថា ការព្យួរប្រព័ន្ធអនុគ្រោះពន្ធ «EBA» ពីសំណាក់សហភាពអ៊ឺរ៉ុប គឺជា«ឱកាស»​សម្រាប់​​របបដឹកនាំ​របស់លោក  ក្នុងការ«លត់​ពួកអានៅ​ខាងក្នុង»​ ដោយ«មិនអាចឲ្យពួកអាក្រុមនេះរស់ទេ»។

សម្លេងលោកនាយករដ្ឋមន្ត្រី​ ត្រូវបានឮ នៅក្នុងសារឯកជននោះថា៖

«មួយផ្នែកទៀត គឺរឹតពួកអាប្រឆាំង ឲ្យវារលំរលាយកាន់តែឆាប់ ព្រោះគ្មាននរណា (សហគមន៍អន្តរជាតិ) នឹងត្រូវមកប្រដៅយើងបានទៀតទេ ព្រោះអ្នកឯងបានធ្វើចំពោះខ្ញុំយ៉ាងដូច្នេះហើយ។ ដូច្នេះ ជាឱកាសដើម្បីយើងលត់ ពួកអានៅខាងក្នុង ផ្ដាច់ខ្សែសង្វាក់របស់វាឲ្យអស់។ ឥឡូវវាកំពុងដើរ​តាមប្រជុំនៅ​តាមហាង នៅតាមស្អីនានា ដែលខ្ញុំសុំយកឱកាសនេះ ខ្ញុំនឹងបញ្ជូនបញ្ហានេះ សម្រាប់អភិបាលខេត្ត សម្រាប់ការណែនាំនានា ទៅតាម​គ្រប់កន្លែងផងដែរ ព្រោះយើង មិនអាចឲ្យពួកអាក្រុមនេះរស់ទេ។»

ការលើកឡើងខាងលើ ត្រូវបានលោក សម រង្ស៊ី ចាត់ទុកថា ជាគម្រោងរបស់លោក ហ៊ុន សែន ដែលជា​អតីត​មេទាហាន​ខ្មែរក្រហម​មួយរូប ក្នុងការបន្តសម្លាប់រង្គាល ទៅលើប្រជាជន​កម្ពុជា។ ប្រធានស្ដីទីគណបក្សប្រឆាំង បានសរសេរថា៖

«នៅក្នុងបរិបទនេះ បទបញ្ជាឲ្យកម្ទេចគណបក្សប្រឆាំង បង្កក្ដីបារម្មណ៍ដ៏ខ្លាំងក្លា អំពីការសម្លាប់រង្គាលទៅលើប្រជាជនកម្ពុជា ដែលមិនធ្លាប់ឃើញ រាប់ចាប់តាំង​ពីរបបខ្មែរក្រហមនោះមក។»

លោក សម រង្ស៊ី បានបន្តថា ផ្ទុយពីតួនាទីរបស់រដ្ឋាភិបាល ដែលត្រូវការពារសុវត្ថិភាព របស់ពលរដ្ឋរបស់ខ្លួន ទង្វើរបស់លោក ហ៊ុន សែន និងរដ្ឋាភិបាលរបស់លោក បែរជាបង្កគ្រោះថ្នាក់ចំពោះប្រជាពលរដ្ឋ ហើយដែលធ្វើឲ្យរដ្ឋាភិបាលមួយនេះ កាន់តែបាត់បង់ នូវ«ភាពស្របច្បាប់»ក្នុងការដឹកនាំប្រទេស។

លោក សម រង្ស៊ី បានសង្កត់ធ្ងន់ថា៖

«អង្គការសហប្រជាជាតិ និងសហគមន៍អន្តរជាតិ ត្រូវធ្វើប្រតិកម្ម ដើម្បីការពារប្រជាជនកម្ពុជារាប់លាននាក់ ដែលកំពុងរងការគម្រាមកំហែង ដោយរបបផ្ដាច់ការមួយនេះ»៕



You may also like

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

អ្នកជំនាញមួយក្រុមរបស់អង្គការសហប្រជាជាតិ បានអំពាវនាវទៅ​របបដឹកនាំរបស់លោក ហ៊ុន សែន ឲ្យដោះលែងអ្នកស្រី សេង ធារី មេធាវីខ្មែរអាមេរិកាំង ដែលគេស្គាល់ក្នុងពេលកន្លងមក ថាជា«ស្ត្រីសេរីភាព» តាមរយៈសម្លៀកបំពាក់តែងខ្លួនសម្ដែងមតិរបស់អ្នកស្រី នៅខាងមុខសាលាដំបូងរាជធានីភ្នំពេញ។ ក្រុមអ្នកជំនាញប្រឆាំងការឃុំឃាំងតាមទំនើងចិត្ត ...
កម្ពុជា

CNRP ថ្កោលទោស​«ការបាញ់បង្ក្រាបពលរដ្ឋ»តវ៉ាដីធ្លី​នៅខេត្ត​ព្រះសីហនុ

ការបាញ់បង្ក្រាបពលរដ្ឋ«ស្លូតត្រង់» ដែលបានប្រមូលគ្នា តវ៉ាលើបញ្ហាដីធ្លី ក្នុងខេត្តព្រះសីហនុ កាលពីថ្ងៃព្រហស្បត្តិ៍ ជា«ទង្វើដ៏ឃោឃៅព្រៃផ្សៃ និងជាការបង្ហាញ នូវ​សារជាតិ​ដ៏អាក្រក់ នៃរបបផ្ដាច់ការបច្ចុប្បន្ន»។ នេះ ជាការលើកឡើង របស់គណបក្សសង្គ្រោះជាតិ នៅក្នុងសេចក្ដីថ្លែងការណ៍មួយ ...
កម្ពុជា

ហ៊ុន សែន ថាបានរក«វិធីនានា ដែលអាចធ្វើបាន» ដើម្បីជួយ​ជនក្រីក្រ

ខណៈវិបត្តិបានផ្ទុះឡើង តាំងពីប៉ុន្មានខែមុន លោកនាយករដ្ឋមន្ត្រី ហ៊ុន សែន ប្រកាស​ក្នុងថ្ងៃអាទិត្យនេះ ថារដ្ឋាភិបាលបានរិះរក «វិធីនានា ដែលអាចធ្វើបាន» ដើម្បី​ជួយ​ពលរដ្ឋក្រីក្រ នៅតាមតំបន់ដាច់ស្រយាល ដែលខ្វះខាតម្ហូបអាហារ។ ការប្រកាសរបស់បុរសខ្លាំង ...

Comments are closed.

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

កម្ពុជា

កម្ពុជា ជាប់ឈ្មោះ​​ក្នុងបញ្ជី​​នៃក្រុមប្រទេស​«វាយបង្ក្រាប​សិទ្ធិពលរដ្ឋ»

ប្រទេសកម្ពុជា​ទើបត្រូវបានចាត់ចូល ក្នុងបញ្ជីនៃក្រុមប្រទេស«វាយបង្ក្រាប​សិទ្ធិពលរដ្ឋ» របស់អង្គការ«សម្ព័ន្ធភាពពិភពលោក នៃបណ្ដាអង្គការសង្គមស៊ីវិល និងសកម្មជន» ហៅកាត់ថា«CIVICUS» ដែលមានសមាជិកប្រមាណជាង ៩០០០អង្គការសង្គមស៊ីវិល មកពី១៧៥ប្រទេស នៅជុំវិញផែនដី។ ការចុះបញ្ជីនេះ បានធ្វើឡើងបន្ទាប់ពីការសម្រេចថ្មីបំផុត របស់រដ្ឋាភិបាលលោក ...