ពានរង្វាន់ ស្ដីពី«សេរីភាពនៃការបញ្ចេញមតិ» របស់ប្រព័ន្ធផ្សព្វផ្សាយអន្តរជាតិអាល្លឺម៉ង់ «DW – Deutsche Welle» ឆ្នាំ២០២០នេះ ត្រូវបានប្រគល់ជូន អ្នកសារព័ត៌មានចំនួន១៧នាក់ មកពី១៤ប្រទេស នៅលើពិភពលោក ក្នុងនោះក៏មានលោក សុវណ្ណ រិទ្ធី មកពីប្រទេសកម្ពុជា មួយរូបផង។
សេចក្ដីប្រកាសព័ត៌មាន របស់បណ្ដាញផ្សព្វផ្សាយអន្តរជាតិមួយនេះ បានបញ្ជាក់ថា ក្រុមអ្នកកាសែតទាំងនោះ បានឈ្នះពានរង្វាន់ខាងលើ ព្រោះពួកគេមានភាពក្លាហាន នៅក្នុងវិជ្ជាជីវៈ របស់ផងខ្លួន នៅក្នុងរយៈពេលនៃការរាតត្បាតជំងឺ«Covid-19»។ ផ្ទុយទៅវិញ ពួកគេបែរជារងការចាប់ខ្លួន ឬរហូតដល់ រងការបាត់ខ្លួន ដោយគ្រាន់តែពួកគេ ធ្វើសេចក្ដីរាយការណ៍ អំពីជំងឺដ៏ចង្រៃនេះប៉ុណ្ណេះ។
លោក សុវណ្ណ រិទ្ធី អ្នកសារព័ត៌មានខ្មែរ និងជាចាងហ្វាយការផ្សាយ នៃស្ថាប័ន«TVFB»របស់លោក ត្រូវបានចាប់ខ្លួន អាជ្ញាធរក្រុងភ្នំពេញ ពីបទ«ញុះញង់ ឲ្យប្រព្រឹត្តិបទឧក្រិដ្ឋ ជាអាទិ៍» និងបញ្ជូនទៅឃុំខ្លួន ជាបណ្ដោះអាសន្ន នៅពន្ធនាគារ «PJ» (ភ្នំពេញ)។ ការចាប់ខ្លួននោះ ធ្វើឡើងបន្ទាប់ពីលោកបានផ្សាយ ដំណកស្រង់សំដី របស់លោក ហ៊ុន សែន នាយករដ្ឋមន្ត្រីកម្ពុជា ដែលបានថ្លែងក្នុងថ្ងៃតែមួយ ស្ដីពីវិធានការរបស់ក្រុងភ្នំពេញ នៅចំពោះជំងឺរាតត្បាត«Covid-19»។
ដំណកស្រង់នោះ មានខ្លឹមសារទាំងស្រុងថា៖
«បើអ្នកម៉ូតូឌុបក្ស័យធន លក់ម៉ូតូចាយសិនទៅ រដ្ឋាភិបាលគ្មានលទ្ធភាពជួយនោះទេ។»
មួយថ្ងៃក្រោយការចាប់ខ្លួននោះ ក្រសួងព័ត៌មានកម្ពុជា ក៏បានសម្រេចបិទ ស្ថាប័ន«TVFB»របស់លោក សុវណ្ណ រិទ្ធី ខណៈអ្នកសារព័ត៌មានរូបនេះ នៅមិនទាន់ត្រូវបានតុលាការ រកឃើញទោសកំហុស និងផ្ដន្ទាទោសនៅឡើយ។
សម្រាប់លោក «Peter Limbourg» អគ្គនាយកប្រព័ន្ធផ្សព្វផ្សាយអន្តរជាតិ របស់រដ្ឋអាល្លឺម៉ង់ខាងលើ បានអះអាង នៅក្នុងសេចក្ដីសម្រេច ប្រគល់ពានរង្វាន់ «សេរីភាពនៃការបញ្ចេញមតិ» ទៅឲ្យអ្នកសារព័ត៌មាន ទាំង១៧រូប ក្នុងរដ្ឋធានីប៊ែរឡាំង កាលពីថ្ងៃទី៣ ខែឧសភា កន្លងមកដូច្នេះថា៖
«នៅក្នុងរយៈពេល នៃវិបត្តិ”Covid-19″នេះ សារព័ត៌មានដើរតួនាទី យ៉ាងសំខាន់ ហើយរាល់អ្នកសារព័ត៌មាន មានទំនួលខុសត្រូវខ្ពស់ [ចំពោះការផ្ដល់ដំណឹង ឬព័ត៌មាន សម្រាប់ពលរដ្ឋ]។»
លោកបន្តថា ៖
«ពលរដ្ឋនៃប្រទេសទាំងអស់ មានសិទ្ធិទទួលបាន ព័ត៌មានពិត និងមតិរិះគន់។ ទំរង់ណាមួយ នៃការរារាំង ចំពោះសិទ្ធិទាំងនេះ អាចធ្វើឱ្យអន្តរាយ ដល់ជីវិតមនុស្ស ! ហើយការប៉ុនប៉ង ដាក់ទាក់ទណ្ឌ ចំពោះបាយការណ៍ទាំងឡាយ ស្តីពីស្ថានភាពបច្ចុប្បន្ន ធ្វើឱ្យប៉ះពាល់ដល់ សេរីភាពនៃការបញ្ចេញមតិ យ៉ាងច្បាស់។»
ប្រតិកម្មតាមរយៈកិច្ចសម្ភាសមួយ ជាមួយទស្សនាវដ្ដីមនោរម្យ.អាំងហ្វូ កាលពីមុននេះបន្តិច លោក អ៊ុក គឹមសេង អ្នកនាំពាក្យក្រសួងព័ត៌មាន បានបដិសេធការធ្វើអត្ថាធិប្បាយ ចំពោះការសម្រេច របស់ស្ថាប័ន «WD» របស់ប្រទេសអាល្លឺម៉ង់ ក្នុងការផ្ដល់ពានរង្វាន់ ទៅឲ្យអ្នកសារព័ត៌មានខាងលើ។
លោក គឹមសេង មានប្រសាសន៍ថា៖
«បើគេប្រគល់[ពាន]រង្វាន់ ការងាររបស់គាត់ អាហ្នឹងរឿងរបស់គាត់ ព្រោះអីនៅក្រសួងព័ត៌មាន យើងអត់បានធ្វើការ ជាមួយអង្គការហ្នឹងផង។ ហើយគាត់នៅក្រៅប្រទេសទៅទៀត អញ្ចឹងយើងអត់មាន ប្រតិកម្មអ្វីទេ (…) ខ្ញុំមិនដឹងថា អង្គការហ្នឹងគាត់ធ្វើអី គាត់ចាប់ធ្វើពីពេលណា របៀបម៉េច (…)។»
នៅក្នុងសេចក្ដីថ្លែងការណ៍មួយ ដែលចេញផ្សាយភ្លាមៗ ក្រោយការចាប់ខ្លួនលោក សុវណ្ណ រិទ្ធី អង្គការអ្នកយកព័ត៌មានគ្មានព្រំដែន (RWB /RSF) ដែលមានទីស្នាក់ការធំ ក្នុងរដ្ឋធានីប៉ារីស (បារាំង) បានទាមទារឲ្យដោះលែងលោក សុវណ្ណ រិទ្ធី ជាបន្ទាន់ និងប្រគល់អាជ្ញាប័ណ្ណ ដើម្បីអាចឲ្យស្ថាប័នសារព័ត៌មានរបស់លោក អាចមានដំណើរការឡើងវិញ។ អង្គការខាងលើ បានបរិហារក្រុងភ្នំពេញ នៅចំពោះការចាប់ចងអ្នកសារព័ត៌មាន និងការរិតត្បិត បំបិតមាត់អ្នកសារព័ត៌មាន ថាបានធ្វើឡើង ដោយប្រើលេសនៃជំងឺរាតត្បាត «Covid-19»។
ប៉ុន្តែ អ្នកនាំពាក្យរដ្ឋាភិបាលកម្ពុជា បានច្រានចោលសេចក្ដីថ្លែងការណ៍នោះ ដោយចាត់ទុកថា ការអះអាងនិងការទាមទារ របស់អង្គការអ្នកយកព័ត៌មានគ្មានព្រំដែន ថាជាការប្រមាថ និងមិនយល់ ពីច្បាប់កម្ពុជា។
បើតាមសេចក្ដីប្រកាសព័ត៌មាន របស់ «WD» ដដែល បានរៀបរាប់ថា ក្រុមប្រទេសទាំង១៤ ដែលជាប់ឈ្មោះ ក្នុងការរុកគួន ទៅលើអ្នកសារព័ត៌មាន រួមមាន កម្ពុជា, ស៊ែប៊ី, ស្លូវេនី, បេឡារុស្ស, រុស្ស៊ី, វេណេហ្ស៊ុយអេឡា, អ៊ីរ៉ង់, ហ្ស៊ីមបាវេ, អ៊ូហ្គង់ដា, តួកគី, ហ្ស៊កដានី, ឥណ្ឌា, ហ្វីលីពីន និងប្រទេសចិន។
«DW – Deutsche Welle» ជាស្ថាប័នផ្សព្វផ្សាយរដ្ឋ ដែលមានលក្ខណៈ«ស្វយ័ត» របស់ប្រទេសអាល្លឺម៉ង ដែលផ្សាយចេញ ជាភាសាបរទេស ចំនួន៣០ភាសា តាមរយៈវិទ្យុ ទូរទស្សន៍ គេហទំព័រ និងប្រព័ន្ធផ្កាយរណប។ «DW» មានស្នាក់ការកណ្ដាល នៅក្រុង ប៊ន (Bonn) និងនៅរដ្ឋធានីប៊ែរឡាំង និងបានបង្កើត ឲ្យមានកម្មវិធីពានរង្វាន «សេរីភាពនៃការបញ្ចេញមតិ»នេះឡើង ជារៀងរាល់ឆ្នាំ រាប់ពីឆ្នាំ២០១៥មក។
លោកអគ្គនាយក «Peter Limbourg» បានថ្លែងថា ស្ថាប័ន«WD»របស់លោក ទាមទារឱ្យដោះលែង អ្នកសារព័ត៌មានទាំងអស់ នៅជុំវិញពិភពលោក ដែលត្រូវបានចាប់ខ្លួន ឬធ្វើទុក្ខបុកម្នេញ បន្ទាប់ពីពួកគេបានធ្វើសេចក្ដីរាយការណ៍ អំពីវិបត្តិជំងឺរាតត្បាត។ លោកមានប្រសាសន៍ទៀតថា៖
«យើងសូមគោរព ដល់ក្រុមអ្នកសារព័ត៌មានទាំងនោះ ដែលត្រូវបានរារាំង យ៉ាងហឹង្សា មិនឱ្យធ្វើការងារ របស់ពួកគេ ក្នុងកំឡុងពេលដ៏លំបាកនេះ៕»
