កម្ពុជាដំណឹង

សម រង្ស៊ី៖ របប ហ៊ុន សែន បន្ត​លុប​បឹង ខណៈ​កម្ពុជា​កំពុង​ខ្វះទឹក

បើសិនជាការឆ្លើយឆ្លងគ្នា រវាងលោក សម រង្ស៊ី និងលោក ហ៊ុន សែន ហាក់ដូចជាស្ងប់ស្ងៀម នៅក្នុងចុងសប្ដាហ៍នេះ តែមេដឹកនាំប្រឆាំងមិនបានដកឃ្លាឡើយ ក្នុងការលើកឡើងថា របបដឹកនាំរបស់លោក ហ៊ុន សែន សព្វថ្ងៃ គឺជាអ្នកទទួលខុសត្រូវ ចំពោះការបំផ្លាញបឹងធម្មជាតិនៅកម្ពុជា ជាពិសេស«ខណៈ​កម្ពុជា​កំពុង​ខ្វះទឹក»។

បន្ទាប់ពីបានចែករំលែក នៅលើទំព័រហ្វេសប៊ុករបស់លោក កាលពីម្សិលម៉ិញ នូវវីដេអូរបស់អង្គការមាតាធម្មជាតិ ស្ដីពីការចាក់លុបបឹងធម្មជាតិ ក្នុងខេត្តព្រះសីហនុនោះ លោក សម រង្ស៊ី បានបន្តចែករំលែកវីដេអូដដែលនេះ នៅលើទំព័រទ្វីសធើរ ក្នុងថ្ងៃនេះជាថ្មីទៀត។

មេដឹកនាំប្រឆាំង​បានសរសេរជាភាសាអង់គ្លេស អមនឹងការបង្ហោះនោះថា៖

«ខណៈប្រទេសកម្ពុជា កំពុងរងគ្រោះនឹងកង្វះទឹក កាន់តែធ្ងន់ធ្ងរនោះ របបដឹកនាំរបស់លោក ហ៊ុន សែន បន្តលុបបឹងដែលជាជីវិតរបស់ពលរដ្ឋ។ វីដេអូនេះ បង្ហាញពីបឹងព្រែកទប់ ក្នុងខេត្តព្រះសីហនុ ដែលត្រូវបានលក់ទៅឲ្យក្រុមហ៊ុន លីយ៉ុងផាត់គ្រុប ដែលមានជាប់សែស្រឡាយដោយផ្ទាល់ ជាមួយនឹងក្រុមគ្រួសារត្រកូល ហ៊ុន។»

ក្នុងវីដេអូរបស់អង្គការមាតាធម្មជាតិ យុវជន ថុន រដ្ឋា សកម្មជនបរិស្ថានបានអះអាងយ៉ាងច្រើន អំពីបឹងងធម្មជាតិ ព្រែកទប់ ក្នុងក្រុងព្រះសីហនុ។ លោក រដ្ឋា បានលើកឡើងថា បឹងមួយនេះត្រូវបានលោក ហ៊ុន សែន ចេញអនុក្រឹត្យលុបស្ទើរទាំងអស់ លក់ទៅឲ្យក្រុមហ៊ុន ឧកញ៉ា លី យ៉ុងផាត់ (The LYP Group) ដែលផ្ទុយគ្នាទាំងស្រុង ពីមួយឆ្នាំកន្លះមុន ដែលបឹងនេះត្រូវបានលោក ហ៊ុន សែន អះអាងថាការពារ មិនឲ្យបាត់បង់។

«ខណៈ​កម្ពុជា​កំពុង​ខ្វះទឹក តើសម្ដេចហ៊ានទទួលខុសត្រូវដែរឬទេ?»

សកម្មជនបរិស្ថានបានពន្យល់ថា៖

«ក្រុងព្រះសីហនុ មានសុទ្ធតែទឹកសមុទ្រ ស្របពេលប្រភពទឹកសាបសម្រាប់ពលរដ្ឋប្រើប្រាស់ មានបរិមាណតិចតួច។ បញ្ហាខ្វះទឹកក៏កំពុងកើតមាន ជាពិសេសនៅក្នុងខេត្តព្រះសីហនុផ្ទាល់តែម្តង។»

យុវជន រដ្ឋា បានចោទសួរទៅលោក ហ៊ុន សែន ថា៖

«តើការសម្រេចចិត្តលុបបឹងធម្មជាតិប្រវត្តិសាស្ត្រ ដ៏មានសារសំខាន់មួយនេះ រដ្ឋទទួលបានលុយប៉ុន្មាន ពីក្រុមហ៊ុនឧកញ៉ា លី យ៉ុងផាត់? ហើយបើសិន​ជាពេលអនាគត ក្រុងព្រះសីហនុ​នៅតែ​បន្តខ្វះខាត​ទឹកប្រើប្រាស់ តើសម្ដេចហ៊ាន​ទទួលខុសត្រូវ​ដែរឬទេ?»

មកដល់ម៉ោងនេះ គ្មានការឆ្លើយតបពីរបបក្រុងភ្នំពេញ ឬពីរដ្ឋបាលសាលាខេត្តព្រះសីហនុទេ នៅចំពោះការលើកឡើងខាងលើ៕



You may also like

កម្ពុជា

ហ៊ុន សែន ពន្យល់​ពីខួប​ទី៥០ នៃថ្ងៃខែឆ្នាំ​កំណើត​«មិនពិត»​របស់លោក

ថ្ងៃខែឆ្នាំកំណើត «មិនពិត» របស់លោក ហ៊ុន សែន មិនមែនជារឿងថ្មីទេ ព្រោះវាត្រូវបាននាយករដ្ឋមន្ត្រីរូបនេះ លើកឡើងដដែលៗ សឹងជារៀងរាល់ឆ្នាំ។ តែប្លែកនៅត្រង់ថា ឆ្នាំថ្មី ឆ្នាំ២០២០ បុរសខ្លាំងកម្ពុជា ...
កម្ពុជា

ហ៊ុន សែន ប្រាប់ឲ្យ​«ចាប់ក្បាល» សម រង្ស៊ី ដោយមិនចាំបាច់​មានបញ្ជា​ពីលោក

នាយករដ្ឋមន្ត្រីកម្ពុជា លោក ហ៊ុន សែន ដែលស្ថិតក្នុងឯកសណ្ឋាន ជាមេទ័ពនៃកងកម្លាំងប្រដាប់អាវុធកម្ពុជា បានប្រាប់កងទ័ព ឲ្យ«ចាប់ក្បាល អាហ្នឹង» ដោយមិនចាំបាច់ មានបញ្ជាពីលោក ដោយហៅការចាប់ខ្លួននោះ ជាការអនុវត្តន៍ច្បាប់។ ...
កម្ពុជា

ហ៊ុន សែន ថា​ព័ត៌មាន​ស្ដីពី​អង្ករ​សិប្បនិមិត្ត ជា​«សង្គ្រាមចិត្តសាស្ត្រ»

លោកនាយករដ្ឋមន្ត្រី ហ៊ុន សែន បានចាត់ទុកព័ត៌មាន ដែលនិយាយពីអង្ករសិប្បនិមិត្ត ក្នុងពេលកន្លងមក ថាជា«សង្គ្រាមចិត្តសាស្ត្រ»។ មេដឹកនាំរូបនេះមិនជឿថា មានអង្ករប្រភេទនេះ ចរាចរលក់ដូរនៅលើទីផ្សារ ដោយលោកគិតថា តម្លៃឧស្សហកម្ម និងសិប្បកម្ម ...

Comments are closed.

កម្ពុជា

ព្រឹត្តិការណ៍២០កុម្ភៈ៖ ករណីឆ្លង​ក្នុងសហគមន៍ កើនដល់​១០៣នាក់

លោក ហ៊ុន សែន នាយករដ្ឋមន្ត្រីតាំងពីឆ្នាំ១៩៨៥ នៅប្រទេសកម្ពុជា។ (រូបថតឆ្នាំ២០២០ បង្ហោះលើទំព័រហ្វេសប៊ុក)
កម្ពុជា

ព្រឹត្តិការណ៍២០កុម្ភៈ៖ ហ៊ុន សែន ឲ្យបិទសាលារៀន និងបន្ថែមវិធានការ

ក្រៅពីសម្រេច​«ឲ្យបិទសាលារៀន» ក្នុងរយៈពេលពីរសប្ដាហ៍ លោកនាយករដ្ឋមន្ត្រី ហ៊ុន សែន បានប្រកាស​ចាត់​វិធានការ​​បន្ថែមមួយចំនួនទៀត នៅក្នុងរាជធានីភ្នំពេញ និងខេត្តកណ្ដាល។ នេះ បើតាមរយៈសារពិសេសមួយ ដែល​លោកបានបង្ហោះ នៅលើបណ្ដាញសង្គម នៅយប់ថ្ងៃចន្ទ​ទី២២ ...
កម្ពុជា

«កម្ពុជាគ្មានឈ្មោះ» ក្នុងប្រទេស​ដែលគ្រប់គ្រង​«Covid-19»​បានល្អ

ផ្ទុយពីការអួតអាង របស់មេដឹកនាំក្រុងភ្នំពេញ កម្ពុជាគ្មានឈ្មោះ នៅក្នុងបញ្ជីសន្ទស្សន៍ នៃក្រុមប្រទេសដែលគ្រប់គ្រងជំងឺរាតត្បាត «Covid-19» បានល្អនោះទេ។ នេះ បើតាមរបាយការណ៍ចំណាត់ថ្នាក់ របស់វិទ្យាស្ថានអន្តរជាតិមួយ ឈ្មោះ «Lowy Institute» ...