កម្ពុជាដំណឹង

ផែង វណ្ណៈ ត្រូវបាន«នាំខ្លួន»​មក​សាកសួរ​នៅ​តុលាការ​រសៀលនេះ

មន្ត្រីយោធា និងជាអ្នកប្រើប្រាស់បណ្ដាញសង្កម ដ៏ល្បីល្បាញ លោក ផែង វណ្ណៈ ត្រូវបានកងកម្លាំងកងរាជអាវុធ នាំខ្លួន មកកាន់អយ្យការ អមសាលាដំបូងរាជធានី នៅរសៀលថ្ងៃនេះ ដើម្បីធ្វើការសាកសួរ។

លោក ផែង វណ្ណៈ ត្រូវបាន«នាំខ្លួន»មកកាន់អាគារតុលាការ តែគេមិនឃើញលោក ត្រូវបានអាជ្ញាធរដាក់ខ្នោះដៃនោះទេ។ អ្នកនាំពាក្យសាលាដំបូង លោក លី សុ​ផា​ណា បានថ្លែង​​ប្រាប់​អ្នកកាសែត​ថា៖

«​ជនជាប់សង្ស័យ [ត្រូវ]បាន​បញ្ជូន​ដល់​អយ្យការ​អម សាលាដំបូង​រាជធានី​ភ្នំពេញ ហើយនឹង​ត្រូវ​សាកសួរ​ចម្លើយ​ នា​រសៀល​នេះ។»​

ការចាប់ខ្លួនលោក ផែង វណ្ណៈ ធ្វើឡើងយ៉ាងឆាប់រហ័ស ក្នុងគេហដ្ឋានរបស់លោក នៅក្រុងតាខ្មៅ កាលពីព្រឹកថ្ងៃទី២ ខែមេសា ឆ្នាំ២០១៩ តែមួយថ្ងៃបន្ទាប់ពីលោក គី តិច មេធាវីតំណាង​ឲ្យលោកនាយករដ្ឋមន្ត្រី ហ៊ុន សែន ដាក់បណ្ដឹងកាលពីម្សិលម៉ិញ ប្ដឹងមន្ត្រីយោធារូបនេះ ជុំវិញការបង្ហោះប្រៀបធៀបមួយ នៅលើគណនី និងទំព័រហ្វេសប៊ុករបស់លោក។

កាលពីថ្ងៃទី២៩ ខែមិនា ឆ្នាំ២០១៩ លោក ផែង វណ្ណៈ បានបង្ហោះសារមួយ អមនឹងរូបថតពីរសន្លឹក ដោយធ្វើការប្រៀបធៀប ការយកប្រាក់ទៅចូលបុណ្យសព​យុវតីរងគ្រោះ ក្នុងគ្រោះថ្នាក់ចរាចរណ៍មួយ ថាមិនខុសគ្នា​ពីការចូលបុណ្យ​ធ្វើចេតិយ៍​សពលោក កែម ឡី ពីសំណាក់មេកាសែត «Fresh News» ដែលតំណាងឲ្យលោក ហ៊ុន សែន កាលពីពេលកន្លងមក​នោះទេ។

សារបង្ហោះ របស់អ្នកប្រើប្រាស់បណ្ដាញសង្គមរូបនេះ ជាផ្នែកមួយ នៃការឆ្លើយឆ្លងរវាងរូបលោក ជាមួយលោក ពេជ្រ ស្រស់ ប្រធានគណបក្សយុវជនកម្ពុជា និងស្ថាប័ន​សារព័ត៌មាន «Fresh News» ចេញផ្សាយនៅលើអ៊ិនធើណែត ដែលគេស្គាល់ថា ជាក្បាលម៉ាស៊ីនឃោសនា ​ដ៏រឹងមាំមួយ​​របស់លោក ហ៊ុន សែន និងរបបដឹកនាំសព្វថ្ងៃ។

បើតាមពាក្យបណ្ដឹង របស់លោក គី តិច បានរៀបរាប់ថា ​​ លោក ផែង វណ្ណៈ មានចេតនាបរិហារកេរ្តិ៍លោក ហ៊ុន សែន ថាជាអ្នកនៅពីក្រោយឃាតកម្ម លើលោក កែម ឡី តាមរយៈសារប្រៀបធៀបនោះ។ មេធាវីដ៏មានឥទ្ធិពល បានបញ្ជាក់ថា លោកមានភស្ដុតាងចំនួន១៤ទំព័រ ដែលភ្ជាប់ជាមួយនឹងពាក្យបណ្ដឹង ដើម្បីដាក់បន្ទុកលើលោក ផែង វណ្ណៈ។

ក្រៅពីបណ្ដឹងរបស់នាយករដ្ឋមន្ត្រី លោក ផែង វណ្ណៈ បានរងបណ្ដឹងពីរផ្សេងទៀត។

បណ្ដឹងទីមួយ ជារបស់លោក ពេជ្រ ស្រស់ ទៅកាន់អង្គភាព​ប្រឆាំងអំពើពុករលួយ ពាក់ព័ន្ធនឹង​ករណីតំណាងឲ្យ​ក្រុម​គ្រួសារ​​ជនល្មើស បើកឡានបុកមនុស្សស្លាប់ យកលុយ ៥០០០ដុល្លារ ទៅចូលបុណ្យសព​ជនរងគ្រោះ​។ កាលពីព្រឹកម៉ិញ លោក ពេជ្រ ស្រស់ បានចូលទៅបំភ្លឺក្នុងអង្គភាពប្រឆាំងអំពើពុករលួយរួចហើយ។

រីឯបណ្ដឹងទីពីរ ជារបស់មេកាសែត «Fresh News» ទៅកាន់សាលាដំបូងរាជធានី ប្ដឹងលោក ផែង វណ្ណៈ ពីបទ«បរិហារកេរ្តិ៍ជាសាធារណៈ។

តាមរយៈបណ្ដឹងនេះ លោក អ៊ុំ សុភ​ក្តិ ព្រះរាជអាជ្ញារង និង​ជា​តំណាង​អយ្យការ​អម​សាលាដំបូង​រាជធានី​ភ្នំពេញ បានចេញ​ដីកា​កាលពីម្សិលម៉ិញ បង្គាប់​ឲ្យលោក ផែង វណ្ណៈ ចូល​បង្ហាញខ្លួន នៅ​អយ្យការ​អម​សាលាដំបូង​រាជធានី​ភ្នំពេញ ឲ្យ​បាន​មុន​ថ្ងៃទី​៣០ ខែមេសា ឆ្នាំ​២០១៩ ដើម្បី​សាកសួរ៕



You may also like

កម្ពុជា

ហ៊ុន សែន ប្ដេជ្ញាកម្ចាត់ក្រុមប្រឆាំង ស្មើនឹងគោលដៅ​«កម្ចាត់​ប៉ុលពត»

នាយករដ្ឋមន្ត្រីបីទសវត្សន៍ជាង របស់កម្ពុជា បានប្រកាសនៅថ្ងៃនេះ ថាលោកប្ដេជ្ញា ដាក់គោលដៅ ក្នុងការកម្ចាត់ក្រុមប្រឆាំង ស្មើនឹងគោលដៅរបស់លោក ក្នុងការ«កម្ចាត់​ប៉ុលពត»។ ការថ្លែងដូច្នេះ របស់លោកនាយករដ្ឋមន្ត្រី ហ៊ុន សែន ធ្វើឡើងបន្ទាប់ពីលោកបានរំលឹក ...
កម្ពុជា

EU បើក​នីតិវិធីផ្លូវការ​ដក EBA ពីកម្ពុជា ទោះបី ហ៊ុន សែន គម្រាម

សហភាពអ៊ឺរ៉ុប (EU) បានសម្រេចជាផ្លូវការ​នៅថ្ងៃចន្ទទី១១ ខែកុម្ភ ឆ្នាំ២០១៩នេះ បើកនីតិវិធីដើម្បីឈានទៅព្យួរប្រទេសកម្ពុជា ចេញពីកម្មវិធីអនុគ្រោះពន្ធរបស់ខ្លួន ហៅថា «អ្វីៗទាំងអស់លើកលែងតែអាវុធ (Everything but Arms – ...
កម្ពុជា

សុវណ្ណ រិទ្ធី ឈ្នះ​ពាន​អាល្លឺម៉ង់​«DW» ស្ដីពី​«សេរីភាព​នៃ​ការបញ្ចេញ​មតិ»

ពានរង្វាន់ ស្ដីពី«សេរីភាព​នៃ​ការបញ្ចេញ​មតិ» របស់ប្រព័ន្ធផ្សព្វផ្សាយអន្តរជាតិអាល្លឺម៉ង់ «DW – Deutsche Welle» ឆ្នាំ២០២០នេះ ត្រូវបានប្រគល់ជូន អ្នកសារព័ត៌មាន​ចំនួន​១៧នាក់ មកពី១៤ប្រទេស នៅលើពិភពលោក ក្នុងនោះក៏មានលោក ...

Comments are closed.

កម្ពុជា

ហ៊ុន ម៉ានី រងប្រតិកម្មជុំវិញសំដីថា «CPP»កើតចេញ​ពីប្រជាជន

កម្ពុជា

អ្នកវិភាគ​ជើងចាស់ ប្រាប់អ្នកវិភាគ​ជំនាន់ថ្មី ឲ្យយកគំរូ​តាម«ធនញ្ជ័យ»

កម្ពុជាមានអ្នកវិភាគ ឬអ្នកធ្វើអត្ថាធិប្បាយ ច្រើនរាប់មិនអស់ តាំងពីក្នុងស្រុក រហូតក្រៅស្រុក ទាំងវ័យចំណាស់ និងទាំងវ័យក្មេង។ តែបើសួរថា ការវិភាគរបស់ក្រុមអ្នកវិភាគ អាចផ្ដល់ដំណោះស្រាយ សម្រាប់សង្គមជាតិ និងពលរដ្ឋបាន ឬយ៉ាងណានោះ ...
កម្ពុជា

សម រង្ស៊ី ថាមិនខ្វល់​ពីសំដី«កូនក្នុងខោ-កូនក្រៅខោ»​របស់ កឹម សុខា

លោក សម រង្ស៊ី ប្រធានស្ដីទីគណបក្សសង្គ្រោះជាតិ បានអះអាងថា លោកមិនខ្វល់ចំពោះសំដី អ្នកទាំងឡាយណា ដែលនិយាយ​ជំនួសលោក កឹម សុខា ប្រធានគណបក្សនោះទេ បើទោះជាអ្នកនោះ ជា«កូនក្នុងខោ-កូនក្រៅខោ»របស់លោក ...