ប្រទេសកម្ពុជា បានសម្រេចបើកការនាំអង្ករស ចេញទៅបរទេសវិញ ចាប់ពីថ្ងៃទី២០ ខែឧសភា ខាងមុខតទៅ។ នេះ បើតាមលិខិតមួយ របស់ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃពុធ ទី១៣ ខែឧសភា។
ការបើកឲ្យមាន ការនាំចេញឡើងវិញនេះ ធ្វើឡើងបន្ទាប់ពី លោកនាយករដ្ឋមន្ត្រី ហ៊ុន សែន បានប្រកាសផ្អាក ការនាំអង្ករសចេញ កាលពីចុងខែមីនា ក្រោមហេតុផល ដើម្បី រក្សាស្បៀង នៅក្នុងដំណាក់កាល នៃវិបត្តិជំងឺ«Covid-19»។
លិខិតរបស់ក្រសួង ដែលចុះហត្ថលេខា ដោយលោករដ្ឋមន្ត្រី អូន ព័ន្ធមុនីរ័ត្ន បានផ្ញើជូនសហព័ន្ធស្រូវអង្ករកម្ពុជា (CRF) ដោយសរសេរឲ្យដឹងថា តបតាមសំណើរបស់ «CRF» រដ្ឋាភិបាលសម្រេច ផ្តល់ការអនុញ្ញាត ឲ្យធ្វើការនាំចេញអង្ករស ជាបណ្តើរៗឡើងវិញ តាមកិច្ចសន្យាបញ្ជាទិញ ពីក្រៅប្រទេស ដោយគិតចាប់ពីថ្ងៃទី២០ ខែឧសភាតទៅ។
ភ្លាមៗ បន្ទាប់ពីបានទទួលលិខិតនោះ «CRF» ក៏បានជូនដំណឹងខាងលើ ទៅដល់រោងម៉ាស៊ីនកិនស្រូវ និងក្រុមហ៊ុននាំចេញ ដែលជាសមាជិករបស់ខ្លួន ផងដែរ។
សហព័ន្ធស្រូវអង្ករកម្ពុជា បានប្រកាស កាលពីពេលថ្មីៗ នេះថា ក្នុងរយៈពេល៤ខែដំបូង នៃឆ្នាំ២០២០នេះ ប្រទេសកម្ពុជាបាននាំចេញអង្ករ ទៅក្រៅប្រទេស បានជាង៣០ម៉ឺនតោន គឺកើនឡើងប្រមាណ៤១% ធៀបនឹងរយៈពេលដូចគ្នា កាលពីឆ្នាំ២០១៩៕
