យុង ខេមរា ឡើង«ផ្កាយមួយ» និងជានាយទាហាន កងពលតូចលេខ៧០
កញ្ញា យុង ខេមរា អតីតអ្នកសារព័ត៌មានមួយរូប ដែលមាននិន្នាការស្និត នឹងលោកនាយករដ្ឋមន្ត្រី ហ៊ុន សែន ត្រូវបានតំឡើងឋានន្តរស័ក្ដិ ឲ្យឡើងជា «ឧត្ដមសេនីយ៍ត្រី (ផ្កាយមួយ)» បន្ទាប់ពីស្ត្រីវ័យ ៣២ឆ្នាំរូបនេះ ត្រូវបានតែងតាំង ឲ្យក្លាយជានាយទាហាន នៃកងពលតូចលេខ៧០ កាលពីចុងខែកន្លងទៅរួច។
ព្រះរាជក្រឹត្យរបស់ព្រះមហាក្សត្រ ដែលចុះព្រះហត្ថលេខា កាលពីថ្ងៃទី១៧ ខែធ្នូ ឆ្នាំ២០១៨ និងដែលធ្លាក់មកដល់ ដៃអ្នកសារព័ត៌មាន ក្នុងថ្ងៃនេះ បានឲ្យដឹងថា វរសេនីយ៍ឯក យុង ខេមរា អតីតអ្នករាយការណ៍ព័ត៌មាន ទូរទស្សន៍អប្សរា ក្នុងកម្មវិធី «Apsara net» ត្រូវបានដំឡើងឋានន្តរស័ក្ដិ ថ្នាក់ឧត្តមសេនីយ៍ត្រី (ផ្កាយ១) បន្ទាប់ពី«ទ្រង់បានយល់ សេចក្ដីក្រាបបង្គំទូលថ្វាយ» ពីលោក ហ៊ុន សែន។
ក្នុងលិខិតតែងតាំងមួយទៀត ដែលចុះហត្ថលេខា នៅថ្ងៃទី២៤ ខែវិច្ឆិកា ឆ្នាំ២០១៨ ដោយរដ្ឋមន្ត្រីការពារជាតិ លោក ទៀ បាញ់ បានតែងតាំងអតីតស្ត្រីអ្នកសារព័ត៌មាន ឲ្យមានតំណែងជា «នាយទាហាន នៃកងយោធពលខេមរភូមិន្ទ» ពីលើឋានៈសព្វថ្ងៃ ដែលជានាយសេនាធិការ និងជានាយការិយាល័យទី៥ នៃកងពលតូចលេខ៧០ ។
ជាអ្នកគាំទ្រគណបក្សប្រជាជនកម្ពុជា ដ៏មុតមាំមួយរូប កញ្ញា យុង ខេមរា ធ្លាប់បម្រើការងារ នៅមជ្ឈមណ្ឌលព័ត៌មានដើមអម្ពិល និងទូរទស្សន៍អប្សរា សម្រាប់កម្មវិធី «Apsara Net» មុននឹងបម្រើការងារ នៅកងពលតូចលេខ៧០ និងមានតួនាទី ជានាយរងសេនាធិការ និងជានាយការិយាល័យទី៥ ទទួលបន្ទុកការងារអប់រំផ្សព្វផ្សាយ និងកិច្ចការងារនយោបាយយោធា៕
