នាយករដ្ឋមន្ត្រីកម្ពុជា លោក ហ៊ុន សែន បានដឹកនាំគណៈប្រតិភូមួយ កាលពីរសៀលថ្ងៃព្រហស្បត្តិ៍ ទី២ ខែឧសភានេះ ចេញពីកម្ពុជាឆ្ពោះទៅកាន់រដ្ឋធានី ហាណូយ ប្រទេសវៀតណាម ដើម្បីចូលរួមគោរពវិញ្ញាណក្ខន្ធសពលោក ឡេ ឌឹកអាញ់ អតីតមេដឹកនាំវៀតណាម ដែលបានទទួលមរណភាព កាលពីពីរសប្ដាហ៍មុន។
ទំព័រហ្វេសប៊ុកផ្លូវការ របស់លោក ហ៊ុន សែន បានសរសេរថា៖
«ឯកឧត្តម ឡេ ឌឹកអាញ់ ជារដ្ឋបុរសវៀតណាមមួយរូប និងជាតួអង្គនយោបាយដ៏សំខាន់ នៅក្នុងប្រវត្តិសាស្ត្រ នៃប្រទេសរវៀតណាម និងប្រទេសកម្ពុជា ពីព្រោះឯកឧត្តមបានចូលរួមយ៉ាងសកម្ម ក្នុងការវាយរំលំ របបប្រល័យពូជសាសន៍ ប៉ុល ពត។»
បុរសពិការភ្នែកម្ខាង ឧត្តមសេនីយ៍ ឡេ ឌឹកអាញ់ បានទទួលមរណភាព នៅថ្ងៃច័ន្ទ ទី២២ ខែមេសា ឆ្នាំ២០១៩ ក្នុងវ័យ៩៩ឆ្នាំ ដោយសារតែជំងឺប្រចាំកាយដ៏រ៉ាំរ៉ាំ និងតាំងពីយូរមកហើយ។ ជនកុម្មុយនីស្ដិ៍រូបនេះ បានកាន់កាប់អំណាច ជាប្រធានាធិបតីវៀតណាម ពីចន្លោះឆ្នាំ១៩៩២ ដល់១៩៩៧ ដោយប្រើកណ្ដាប់ដៃដែក ដើម្បីការពារអំណាចគណបក្សកុម្មុយនីស្ដិ៍វៀតណាម។
លោក ឡេ ឌឹកអាញ់ ត្រូវបានគេចាត់ទុកថា ថាជាតួអង្គនយោបាយដ៏សំខាន់ នៅក្នុងនយោបាយកម្ពុជា។ មេដឹកនាំវៀតណាម ដែលគេបានប្រសិទ្ធនាមថា ជា«ខ្លារបស់កម្ពុជា»រូបនេះ គឺជាបុគ្គលជួរមុខគេ ដែលបានរៀបចំគម្រោង វាយរំលំរបបកម្ពុជាប្រជាធិបតេយ្យ របស់ ប៉ុល ពត៕
ខាងក្រោមនេះ ជាកម្រងរូបភាពមួយចំនួន ក្នុងដំណើររបស់លោក ហ៊ុន សែន ចូលជួបមេដឹកនាំរូបនេះ កាលពីអំឡុងចុងខែធ្នូ ឆ្នាំ២០១៣ ពោលគឺនៅប៉ុន្មានថ្ងៃ មុនការបង្ក្រាបយ៉ាងហិង្សា ទៅលើបាតុកម្មរបស់គណបក្សប្រឆាំង និងកម្មករ-នយោជិត នៅក្នុងប្រទេសកម្ពុជា នៅដើមខែមករា ឆ្នាំ២០១៤ (រូបថតរបស់សារព័ត៌មានវៀតណាម)៖
