ហ៊ុន សែន ឲ្យ«កាត់ភ្លើង»ផ្ទះអ្នកវិភាគ ដែល​រិះគន់​ការដាច់​ចរន្ត​ជ្រុលហួស

នាយករដ្ឋមន្ត្រីកម្ពុជា បានថ្លែងក្នុងព្រឹកនេះ ឲ្យ«កាត់ភ្លើង»សម្រាប់ផ្គត់ផ្គង់ផ្ទះ របស់អ្នកវិភាគណា ដែលរិះគន់ការគ្រប់គ្រង របស់រដ្ឋាភិបាលលោក ផ្នែកផ្គត់ផ្គង់អគ្គិសនី ដែលនាំឲ្យមានការផ្ដាច់អគ្គិសនី នៅក្នុងប្រទេសតាំងពីច្រើនសប្ដាហ៍ នោះមក។

លោក ហ៊ុន សែន បានថ្លែងដូច្នេះ នៅក្នុងពិធីសម្ពោធ ដាក់ឱ្យដំណើរការជាផ្លូវការ នូវប្រព័ន្ធផ្គត់ផ្គង់ទឹកស្អាត នៅខេត្តកំពត ដែលសាងសង់ឡើង ក្រោមជំនួយរបស់រដ្ឋាភិបាលជប៉ុន។

បន្ទាប់ពីព្រមានក្រុមអ្នកវិភាគ ឲ្យប្រយ័ត្ន«រន្ទះបាញ់» បើសិនជាមើលមកលោក និងរដ្ឋាភិបាលលោក តែនៅក្នុង«ផ្លូវអាក្រក់»នោះ លោក ហ៊ុន សែន បានងាកទៅបញ្ជាមន្ត្រីជំនិតរបស់លោក ដែលអង្គុយនៅខាងក្រោយខ្នង ឲ្យ«កាត់ភ្លើង» (ផ្ដាច់ចរន្ដ) សម្រាប់ផ្ទះអ្នកវិភាគណា ដែលលើកឡើងថា ការដាច់ភ្លើង ជាលេសដើម្បីសង់វារីអគ្គិសនីបន្ថែម។

បុរសខ្លាំងកម្ពុជា បានថ្លែងឡើងថា៖

«អាអ្នកវិភាគ! ហ្អែងប្រយ័ត្នរន្ទះបាញ់! អញប្រឹងណាស់…ស្ថានភាពវាបែបហ្នឹង។ គ្រាន់តែវារីអគ្គិសនីនេះមួយ បាត់ដល់ទៅ ១៤៤ម៉េហ្គាវ៉ាត់។ អញ្ចឹងបើវារីអគ្គិសនីទាំងអស់ ខ្លះបាត់អស់៥០ ខ្លះ១០០ អញ្ចឹង ៤០០ហ្នឹងវាត្រូវហើយ។»

កង្វះចរន្តប្រមាណជា ៤០០មេហ្គាវ៉ាត់ ដែលបណ្ដាលមកពី អាកាសធាតុក្ដៅហួតហែង បានធ្វើឲ្យប្រទេសកម្ពុជា រងការផ្ដាច់ចរន្តញឹកញាប់ និងតម្រូវឲ្យរដ្ឋាភិបាលលោក ហ៊ុន សែន ត្រូវទិញអគ្គិសនី ពីប្រទេសជិតខាង និងពីប្រទេសទួរគី។

នៅក្នុងទិដ្ឋភាពនេះ ក្រុមអ្នកវិភាគ ដែលមានជំនាញបរិស្ថាន បានសំដែងការសង្ស័យ និងលើកឡើង នៅលើបណ្ដាញសង្គម​ថា នេះ​ជា​ល្បិច​របស់​របប​ក្រុងភ្នំពេញ​ ដើម្បីយក​លេស សាងសង់​ទំនប់​វារីអគ្គិសនី​ បន្ថែម​ទៀត។

នាយករដ្ឋមន្ត្រីកម្ពុជា បានបន្តថ្លែងទៀតថា៖

«កុំស្អីឡើង មើលមករដ្ឋាភិបាល ហ៊ុន សែន ដោយកែវភ្នែកអាក្រក់ ប្រយ័ត្នរន្ទះបាញ់! ៗ! ខ្ញុំមិនចង់និយាយទេ តែវាចេញមកវិភាគ របៀបនេះ។ ឥឡូវអញ្ចេះ បើយើងស្គាល់វា អាផ្ទះហ្នឹង ទៅកាត់ភ្លើងហ្មង។ កាត់ភ្លើងអាផ្ទះហ្នឹង តែម្ដង។ ឲ្យទៅកាត់អាផ្ទះហ្នឹង ឲ្យហ្អែងដុតចន្លុះ។»

«មើល៍អាអ្នកវិភាគ ទៅកាត់ភ្លើងផ្ទះអាហ្នឹង! ដើម្បីឲ្យហ្អែងដឹង ថាខ្វះអគ្គិសនីមិនមែន​យកហេតុផល ដើម្បីនឹងធ្វើវារីអគ្គិសនីទេ។ វាថា យើងធ្វើឲ្យដាច់ភ្លើង ដើម្បីបង្កើតលេស បង្កើតវារីអគ្គិសនី។ (…) សុំឲ្យចេញមកវិភាគទៀត តែបើហ្អែងនៅក្នុងស្រុក ច្បាស់ហើយ គឺកាត់ភ្លើងហ្អែង៕»