ហ៊ុន សែន ឲ្យពលរដ្ឋខ្មែរវិលចូលស្រុកដោយគ្មាន វិញ្ញាបនប័ត្របញ្ជាក់សុខភាព
លោកនាយករដ្ឋមន្ត្រី ហ៊ុន សែន បានប្រកាសជាថ្មី ឲ្យពលរដ្ឋខ្មែរនៅក្រៅប្រទេស អាចវិលចូលមាតុភូមិវិញ ដោយមិនចាំបាច់មាន វិញ្ញាបនប័ត្របញ្ជាក់សុខភាព ថាគ្មានជំងឺ «Covid-19»។ ប៉ុន្តែពួកគេ ត្រូវដាក់ឲ្យនៅដោយឡែក រយៈពេល១៤ថ្ងៃសិន នៅពេលឈានជើង ជាន់ទឹកដីកម្ពុជា។
បុរសខ្លាំងកម្ពុជា បានបញ្ជាក់អំពី«ជំហរជាថ្មី»របស់លោក នៅលើបណ្ដាញសង្គម កាលពីព្រឹកថ្ងៃពុធ ទី២៧ ខែឧសភានេះ ដោយហៅការផ្លាស់ប្ដូរជំហរនេះ ថា ជាការ«សម្រេចវិធានការដោះស្រាយ ជាផ្លូវការ»។
ទំព័រហ្វេសប៊ុក របស់នាយករដ្ឋមន្ត្រីរាប់ទសវត្ស នៅកម្ពុជា បានសរសេរថា៖
«នៅថ្ងៃទី២៧ ខែឩសភា ឆ្នាំ២០២០នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានសម្រេចវិធានការដោះស្រាយ ជាផ្លូវការ ចំពោះពលរដ្ឋខ្មែរ ដែលកាន់លិខិតឆ្លងដែនកម្ពុជា ហេីយដែលកំពុងធ្វេីដំណេីរ ឬមានបំណងធ្វេីដំណេីរ ពីក្រៅប្រទេស វិលត្រឡប់ចូលមកកម្ពុជាវិញ គឺមិនតម្រូវឱ្យមាន វិញ្ញាបនប័ត្របញ្ជាក់សុខភាព ថាគ្មានជំងឺឆ្លងកូវីដ-១៩ ទេ។»
«វិធានការនេះ គឺនឹងជួយសម្រួល ដល់ពលរដ្ឋនៅក្រៅប្រទេស ឆាប់បានវិលត្រឡប់ មកជួបជុំក្រុមគ្រួសារ នៅក្នុងប្រទេសខ្លួនវិញ។»
លោក ហ៊ុន សែន បានបន្តថា៖
«ប៉ុន្តែពេលវិលត្រឡប់ មកដល់ប្រទេសវិញ គឺតម្រូវឱ្យចូលពិនិត្យសុខភាព និងពិនិត្យសំណាក ហេីយដាក់ឲ្យស្នាក់នៅ ដាច់ដោយឡែក ចំនួន១៤ថ្ងៃ រង់ចាំលទ្ធផលសំណាកថា តេីមានរោគឆ្លង ឬអត់រោគឆ្លង ទេីបអនុញ្ញាតឱ្យទៅលំនៅដ្ឋានវិញ។»
ការប្រកាសជំហរជាថ្មី របស់លោក ហ៊ុន សែន ធ្វើឡើងនៅខណៈពលរដ្ឋខ្មែរច្រើននាក់ នៅបរទេស ជាពិសេសនៅក្នុងប្រទេស ម៉ាឡេស៊ី កំពុងទន្ទឹងចង់វិលចូលមាតុភូមិ របស់ខ្លួនវិញ។ ពលរដ្ឋទាំងនោះ បានត្អូញត្អែរអំពីជីវិត ដ៏លំបាកលំបិន នៅក្រៅប្រទេស ដែលបណ្ដាលពីមេដឹកនាំកម្ពុជា បិទទឹកដីកំណើត មិនឲ្យត្រឡប់មករួមរស់ ជាមួយគ្រួសាររបស់ពួកគេវិញ។
សូមបញ្ជាក់ដែរថា នៅក្នុងសំនុំរឿងតែមួយនេះ លោក ហ៊ុន សែន បានផ្លាស់ប្ដូរជំហរ យ៉ាងហោចបីដងហើយ ចំពោះការសម្រេច របស់លោក ដែលហាមពលរដ្ឋខ្មែរ មិនឱ្យវិលចូលស្រុកវិញ ក្រោមហេតុផល «ខ្លាចនាំជំងឺចូលស្រុក»។
ជំហរខាងលើរបស់លោក ហ៊ុន សែន បានរងការរិះគន់ យ៉ាងចាស់ដៃ ពីមេដឹកនាំប្រឆាំង លោក សម រង្ស៊ី ដោយហៅការសម្រេច របស់បុសខ្លាំងកម្ពុជា ថាបាន«រំលោភរដ្ឋធម្មនុញ្ញ»ធ្ងន់ធ្ងរ៕
