«ដាច់ខាត» «ពង្រីក» និង«ពង្រឹង» ដើម្បីគណបក្សប្រជាជនកម្ពុជា ( CPP )! នេះជាខ្លឹមសារសំខាន់ ដែលលោក ហ៊ុន ម៉ាណែត កូនប្រុសច្បងនាយករដ្ឋមន្ត្រី បានថ្លែងឡើងជាលើកដំបូង ភ្លាមៗបន្ទាប់ពីបានឡើងកាន់តំណែង ជាប្រធានថ្មី នៃយុវជនគណបក្សប្រជាជនកម្ពុជា ថ្នាក់កណ្ដាល។
សារថ្មីថ្មោងរបស់ កូនប្រុសបុរសខ្លាំង ត្រូវបានបង្ហោះ នៅលើបណ្ដាញសង្គម បង្ហាញពី«គោលដៅចំបង» ចំនួនពីរ ដែលលោកអះអាងថា យុវជននៃគណបក្សកាន់អំណាច «CPP» ត្រូវ«ប្រកាន់ឲ្យជាប់»៖
«១. ថែរក្សាអោយបានដាច់ខាត នូវរាល់សមិទ្ធិផលដែលសម្រេចបាន ដោយគណបក្សប្រជាជនកម្ពុជា ក្នុងការដឹកនាំកសាងប្រទេស និងដែលមាន [ការ]ចូលរួមយ៉ាងសកម្ម របស់យុវជនគណបក្សគ្រប់ជំនាន់។»
«២. បន្តពង្រឹង និងពង្រីក សមិទ្ធិផលថ្មីៗរបស់យុវជនគណបក្ស ដើម្បីចូលរួម ជាមួយគណបក្សប្រជាជនកម្ពុជា ក្នុងបុព្វហេតុបម្រើជាតិ និងប្រជាជន ឲ្យបានកាន់តែល្អប្រសើរឡើង។»
សាររបស់កូនប្រុសបុរសខ្លាំង ត្រូវបានបណ្ដាញយុវជនគណបក្ស ជាពិសេសបណ្ដាញយុវជនគណបក្ស នៅក្រៅប្រទេសចែករំលែក តៗគ្នា យ៉ាងសន្ធឹកសន្ធាប់។
ការថ្លែងសារ របស់លោក ហ៊ុន ម៉ាណែត ធ្វើឡើង ដោយមានអមនឹងរូបថតមួយចំនួន ដែលថតពីពិធីផ្ទេរតំណែង ប្រធានយុវជនគណបក្សប្រជាជនកម្ពុជាថ្នាក់កណ្តាល ដែលលោកត្រូវធ្វើ បន្តពីលោក កែ ប៊ុនខៀវ ដែលបានកាន់តំណែងនេះ តាំងពីជាង២០ឆ្នាំមក។ ពិធីនេះប្រព្រឹត្តិទៅ ក្រោមអធិបតីភាព របស់លោក សាយ ឈុំ អនុប្រធានគណបក្ស និងជាប្រធានគណៈប្រចាំការគណៈអចិន្ត្រៃយ៍ នៃគណៈកម្មាធិការកណ្តាល។
លោក ហ៊ុន សែន ប្រធានគណបក្ស នាយករដ្ឋមន្ត្រី និងជាឪពុកលោក ហ៊ុន ម៉ាណែត បានតែងតាំងលោក ហ៊ុន ម៉ាណែត តាមរយៈលិខិតសម្រេចមួយ ចុះថ្ងៃទី៨ ខែមិថុនា ឲ្យមានតំណែងជា ប្រធានយុវជនគណបក្សប្រជាជនកម្ពុជាថ្នាក់កណ្ដាល ខណៈលោក ហ៊ុន ម៉ាណែត មានតំណែងយ៉ាងច្រើន រួចជាស្រេចហើយ នៅក្នុងជួរយោធា។
ការតែងតាំងខាងលើ បានរងប្រតិកម្ម ពីក្រុមអ្នកឃ្លាំមើល ដោយពួកគេអះអាងថា ជាការតែងតាំង ដែលរំលោភលើច្បាប់កងយុទ្ធពលខេមរភូមិន្ទ និងច្បាប់គណបក្ស អំពី អព្យាក្រឹតភាពលំអៀងដាច់ខាត និងធ្វើឲ្យបាត់បង់ កិត្យានុភាព «credibility»នៃវិជ្ជាជីវៈកងទ័ព ដែលមេបញ្ជាការកងទ័ពរូបនេះ ធ្វើជាមន្ត្រីទទួលបន្ទុក និង បម្រើសកម្មភាពការងារ របស់គណបក្សនយោបាយមួយបែបនេះ។
