ឃុំខ្លួន​យុវជន​ម្នាក់ ព្រោះបង្ហោះ​សារ​លើ​ហ្វេសប៊ុក​ហៅ ហ៊ុន សែន ថា​«អា»

ចៅក្រមស៊ើបសួរ នៃសាលាដំបូងខេត្តស្វាយវៀង បាន«ឃុំខ្លួន​យុវជន​ម្នាក់» ដែលមានឈ្មោះ នៅលើបណ្ដាញសង្គម «គឹម បញ្ញា (Kim Panha)» ពីបទ​បានប្រមាថអង្គព្រះមហាក្សត្រ នៅលើគណនីហ្វេសប៊ុក​របស់ខ្លួន។ នេះ បើតាមដីកាបង្គាប់ឲ្យឃុំខ្លួន របស់លោកចៅក្រម សុវណ្ណ ច័ន្ទន៍គ្រឹះស្នា ដែលចុះហត្ថលេខា និងចេញផ្សាយកាលពីថ្ងៃទី២៣ ខែឧសភា ម្សិលម៉ិញ។

ប៉ុន្តែសារបង្ហោះ របស់យុវជនខាងលើ ដែលត្រូវបានចែករំលែក បន្តបន្ទាប់គ្នា ដោយក្រុមអ្នកគាំទ្រ​រដ្ឋាភិបាល ក្នុងព្រឹកថ្ងៃសុក្រ ទី២៤ ខែឧសភានេះ ឃើញមានតែសារ ដែលសរសេរ​ហៅលោកនាយករដ្ឋមន្ត្រី ហ៊ុន សែន ថា«អា»​ប៉ុណ្ណោះ។ សារពាក់ព័ន្ធទាំងនោះ ត្រូវបានលប់ចេញ (ឬផ្លាស់ប្ដូរមិនឲ្យមើលឃើញ) ពីគណនីឈ្មោះ «Kim Panha» ទាំងអស់ហើយ មកទល់នឹងថ្ងៃនេះ។

ប្រព័ន្ធផ្សព្វផ្សាយក្នុងស្រុក បានអះអាងថា យុវជនខាងលើ ដែលធ្លាប់ជាបុគ្គលិក របស់ក្រុមហ៊ុនកាស៊ីណូ បាវិតម៉ុកបាយ នៅក្រុងបាវិត ខេត្តស្វាយរៀង ត្រូវបានក្រុមនគរបាលខេត្តស្វាយរៀង ឃាត់ខ្លួនកាលពីថ្ងៃទី២៣ ខែឧសភាម្សិលម៉ិញ មុននឹងបញ្ជូនខ្លួនទៅឃុំ ជាបណ្ដោះអាសន្ន នៅពន្ធនាគារខេត្ត។

«អា… អាគុក?»

លោក សុវណ្ណ ច័ន្ទន៍គ្រឹះស្នា ចៅក្រមស៊ើបសួរ បានចោទយុវជនអាយុ៣២ឆ្នាំរូបនេះ ពីបទបរិហារកេរ្តិ៍ជាសាធារណៈ ជេរប្រមាថជាសាធារណៈ និងញុះញង់ឲ្យប្រព្រឹត្តិបទឧក្រិដ្ឋជាអាទិ៍ និងប្រមាថអង្គព្រះមហាក្សត្រ។

បើនិយាយពីប្រវត្តិ នៃការជេរប្រមាថក្នុងពេលកន្លងមក ភាសាហៅ«អា» របស់យុវជន គឹម បញ្ហា មិនជាធ្ងន់ប៉ុន្មានទេ បើប្រៀបធៀបនឹងការជេរបញ្ចោរ របស់លោកនាយករដ្ឋមន្ត្រី ហ៊ុន សែន ក្នុងពេលកន្លងមក តាមឧឃោសនស័ព្ទ និងតាមប្រព័ន្ធផ្សព្វផ្សាយ យ៉ាងគគ្រឹកគគ្រេង។ ប៉ុន្តែបុរសខ្លាំងកម្ពុជា មិនដែលត្រូវបានចៅក្រម ឬស្ថាប័នយុត្តិធម៌ណាមួយ បើកការស៊ើបអង្កេត និងយកមកជំនុំជម្រះនោះឡើយ។

ពាក្យជេរខ្លាំងៗ ដែលពលរដ្ឋកម្ពុជា សិស្សនិស្សិត យុវជន កុមារ តែងបានស្ដាប់ពីលោក ហ៊ុន សែន មានដូចជា «អាគុក» «ចុយ» ឬ«កន្ដួយម៉ែអាគេបាញ់» ជាដើម។ លោក ហ៊ុន សែន ខ្លួនលោកបានចេញមកបកស្រាយ ការពារភាសា«អាម៉ឹង»ទាំងនេះថា ជាភាសាសាមញ្ញ ឬភាសាអ្នកស្រុក (គ្រាមភាសា) ដែលគេនិយាយតែរបៀបអញ្ចឹង៕