Covid-19៖ កម្ពុជារកឃើញអ្នកជំងឺម្នាក់ទៀត នៅខេត្តបន្ទាយមានជ័យ
ប្រទេសកម្ពុជា បានបន្ថែមតួលេខអ្នកជំងឺ «Covid-19» ម្នាក់ទៀត ដែលត្រូវបានរកឃើញ នៅខេត្តបន្ទាយមានជ័យ បន្ទាប់ពីយុវជនអាយុ២៦ឆ្នាំរូបនេះ បានវិលត្រឡប់ពីប្រទេសថៃ។ នេះ បើតាមសេចក្ដីប្រកាសព័ត៌មាន របស់ក្រសួងសុខាភិបាល ដែលទើបនឹងចេញផ្សាយ កាលពីមុននេះបន្តិច។
ក្រសួងសុខាភិបាល បានឲ្យដឹងថា យុវជនដែលត្រូវបានរកឃើញ ថាផ្ទុកមេរោគ «Covid-19» មានស្រុកកំណើត នៅខេត្តត្បូងឃ្មុំ។ យុវជនរូបនេះ បានរួមដំណើរ ជាមួយអ្នកដំណើរ ៩នាក់ផ្សេងទៀត វិលត្រឡប់ពីប្រទេសថៃ។
សេចក្ដីប្រកាសព័ត៌មាន បានបន្តថា នៅពេលយុវជននោះ ចូលដល់ខេត្តបន្ទាយមានជ័យ ក៏ត្រូវបានពិនិត្យឃើញ ថាមានផ្ទុកមេរោគ «Covid-19»។
បច្ចុប្បន្ននេះ យុវជនខាងលើ ដែលមានអាយុ២៦ឆ្នាំ និងអ្នកដំណើរទាំង៩នាក់ ត្រូវរក្សាទុក ឱ្យនៅដាច់ដោយឡែក (ធ្វើចត្តាឡីស័ក) ក្នុងមន្ទីរពេទ្យខេត្តបន្ទាយមានជ័យ។
ការរកឃើញនេះ បានធ្វើឲ្យតួលេខសុរប នៃអ្នកផ្ទុកជំងឺ «Covid-19» បានកើនឡើង ដល់១២៥នាក់ បើរាប់ពីការរាតត្បាតដំបូង មកដល់ថ្ងៃទី៣០ ខែឧសភានេះ។ អាជ្ញាធរសុខាភិបាលកម្ពុជា បានលើកឡើងថា ពីក្នុងចំណោមនោះ អ្នកជំងឺចំនួន ១២៣នាក់ បានជាសះស្បើយហើយ៕
