មកទល់នឹងព្រឹកថ្ងៃអាទិត្យទី១៧ ខែមករា ឆ្នាំ២០២១នេះ កម្ពុជាប្រកាសបានរកឃើញ ករណីឆ្លងជំងឺកូវីដ (Covid-19) កើនឡើងដល់៤៣៩នាក់ បន្ទាប់ពីបានរកឃើញករណីឆ្លង លើពលករខ្មែរ៣នាក់បន្ថែមទៀត ដែលទើបធ្វើដំណើរមកពីប្រទេសថៃ។ នេះ បើតាមសេចក្ដីប្រកាសព័ត៌មាន របស់ក្រសួងសុខាភិបាលកម្ពុជា ដែលចេញផ្សាយនៅមុននេះបន្តិច។
កាលពីម្សិលមិញ កម្ពុជារកឃើញករណីឆ្លង ចំនួន១០នាក់ ខណៈនៅថ្ងៃសុក្រទី១៥ ខែមករា ឆ្នាំ២០២១ (ម្សិលម្ងៃ) មានករណីឆ្លង ១៥នាក់។ នេះ បើតាមសេចក្ដីប្រកាសព័ត៌មាន របស់ក្រសួង ដែលចេញផ្សាយ ជារៀងរាល់ថ្ងៃ និងជាបន្តបន្ទាប់ ដោយបានបញ្ជាក់ថា ករណីឆ្លងទាំងនេះ សុទ្ធសឹងជាពលករខ្មែរ ដែលធ្វើដំណើរ មកពីប្រទេសថៃ។
មកដល់ព្រឹកថ្ងៃអាទិត្យដដែលនេះ អ្នកជំងឺដែលបានជាសះស្បើយ មានចំនួន ៣៨៥នាក់ និងអ្នកកំពុងសម្រាក នៅមន្ទីរពេទ្យ មានចំនួន ៥៤នាក់៕
