កម្ពុជាដំណឹង

CNRP បដិសេធ​ផែនទីព្រំដែន ១/២៥០០០ ដែល​«គូសដោយ​វៀតណាម»

គណបក្សសង្គ្រោះជាតិ បានប្រកាសទាត់ចោលផែនទីថ្មី ខ្នាត ១/២៥០០០ ដែលក្រុមលោក វ៉ា គឹមហុង – អ្នកស្រី កុយ ពិសី ដែលតំណាងឲ្យរដ្ឋាភិបាលក្រុងភ្នំពេញ និងរដ្ឋាភិបាលក្រុង​ហាណូយ តំណាងដោយលោក ឡេ ហួយទ្រុង (Le Hoai Trung) ទទួលយល់ព្រមគ្នា កាលពី​ថ្ងៃទី១ ខែសីហា​កន្លងមក។ នេះបើតាមសេចក្ដី​ថ្លែងការណ៍មួយ របស់គណបក្សប្រឆាំង ដែលចេញផ្សាយ ក្នុងថ្ងៃទី៣ ខែសីហា ឆ្នាំ២០២០។

សេចក្ដីថ្លែងការណ៍ ដែលទស្សនាវដ្ដីមនោរម្យ.អាំងហ្វូ ទទួលបានមួយច្បាប់ បានពន្យល់ថា ការទទួលយកផែនទីថ្មីស្រឡាង ខ្នាត ១/២៥០០០ ពីវៀតណាម ប្រៀប​ដូច​ជា​ការទទួល​យក​ប្លង់ដីថ្មី នៃប្រទេសកម្ពុជា ដែល«គូសដោយប្រទេស​វៀតណាម»។ ក្នុងន័យនេះ គណបក្ស​សង្គ្រោះជាតិ អះអាងថាខ្លួនមិនទទួលស្គាល់ផែនទី ដែលគូសឡើង ដោយវៀតណាម និង​រាល់​ការបោះបង្គោលព្រំដែន ដែលសម្រេចបាន ចំនួន៨៤% កន្លងមកនេះទេ។

គណបក្សប្រឆាំង ដែលត្រូវតុលាការរបបក្រុងភ្នំពេញ រំលាយចោលកាលពីចុងឆ្នាំ២០១៧  បានសរសេរថា៖

«គណបក្សសង្គ្រោះជាតិ (…) នឹងសើរើឡើងវិញ នូវការបោះបង្គោលព្រំដែនទាំងអស់ ដោយរបបក្រុងភ្នំពេញ នាពេលកន្លងមក នៅពេលដែគណបក្សសង្គ្រោះជាតិ ឈ្នះការបោះឆ្នោត ដឹកនាំរាជរដ្ឋាភិបាល។»

យ៉ាងណា គណបក្សប្រឆាំង បានបើកផ្លូវឲ្យរបបក្រុងភ្នំពេញ បង្ហាញពីតម្លាភាព ចំពោះ​ឯកសារផែនទីថ្មី ដោយទាមទារ ឲ្យបើកបង្ហាញ​ជាសាធារណៈ នូវផែនទី​ទើប​នឹង​ទទួល​បាន ដើម្បីយកមកផ្ទៀងផ្ទាត់ ជាមួយផែនទីបោន ខ្នាត ១/១០០០០០ របស់បារាំង ដែលជា​ផែនទីផ្លូវការតែមួយគត់ មានចែង​នៅក្នុងរដ្ឋធម្មនុញ្ញកម្ពុជា។

ក្រុមលោក វ៉ា គឹមហុង – អ្នកស្រី កុយ ពិសី បានទទួលយក​ឯកសារផែនទី​ខ្នាតថ្មីនេះ នៅក្នុងពិធីមួយ កាលពីថ្ងៃទី១ ខែសីហា ឆ្នាំ២០២០ នៅ​ច្រក​អន្តរជាតិ ម៉ុកបៃ (Moc Bai) ខេត្តតៃនិញ (ខេត្តរោងដំរី នៃទឹកដីកម្ពុជាក្រោម) ជាមួយនឹងសមភាគីវៀតណាម។

ខណៈប្រព័ន្ធផ្សព្វផ្សាយវៀតណាម បានផ្សាយពីពិធីខាងលើ យ៉ាងព្រោងព្រាតនោះ ប្រព័ន្ធ​ឃោសនានៅកម្ពុជា មិនបានបញ្ចេញដំណឹងនេះ ផ្ដល់ជូនប្រជាជនកម្ពុជាទេ។ រហូត​លុះត្រា​ព័ត៌មាននេះ ត្រូវបានទម្លាយមុនគេ ដោយទស្សនាវដ្ដីមនោរម្យ.អាំងហ្វូ (ក្នុងយប់ថ្ងៃទី១ ខែសីហាដដែលនោះ) ទើបក្រុមលោក វ៉ា គឹមហុង និងអ្នកស្រី កុយ ពិសី បានបញ្ចេញ​ព័ត៌មាន​នេះ មកផ្សាយ​ជាផ្លូវការ។

ទីភ្នាក់ងារព័ត៌មានផ្លូវការ របស់រដ្ឋវៀតណាម ហៅថា «VNA» បានរយការណ៍ថា៖

«ភាគីទាំងពីរបានផ្ទៀងផ្ទាត់ ពិនិត្យ និងឯកភាព លើផែនទីព្រំដែនចំនួន ៥០០សន្លឹក ដែលត្រូវបានចងក្រងឡើង រួមមាន ២៥០សន្លឹក ជាភាសាវៀតណាម-ខ្មែរ និង ២៥០ សន្លឹកជាភាសាខ្មែរ-វៀតណាម ដោយមានហត្ថលេខារបស់អាជ្ញាធរពាក់ព័ន្ធ នៃប្រទេសទាំងពីរ នៅជាមួយផង។ ភាគីទាំងពីរ បានរក្សាឯកសារផែនទីទាំងនោះ ចំនួន ២៥០សន្លឹក ក្នុងភាគីម្ខាងៗ។»

ក្នុងថ្ងៃទី៣ ខែសីហានេះដែរ ចលនានិស្សិតដើម្បីលទ្ធិប្រជាធិបតេយ្យ ដែលមានមូលដ្ឋាន​ នៅសហរដ្ឋអាមេរិក បានចេញសេចក្ដីថ្លែងការណ៍ ដ៏វែងអន្លាយមួយ អះអាងថា ការដែល​រដ្ឋាភិបាលកម្ពុជា​ទទួលស្គាល់ផែនទីថ្មីខ្នាត ១/២៥០០០ គឺ​ជាការធ្វើសម្បទានដីថ្មីប​​ន្ថែ​ម​ទៀត ឱ្យទៅវៀតណាម។

ឆ្លើយតប​ទៅ​នឹងការរិះគន់​ខាងលើ អ្នក​ស្រី កុយ ពិសី អនុប្រធានគណៈកម្មការ​ចម្រុះ​ព្រំដែន​កម្ពុជា ​បានចេញមុខមកបកស្រាយ តាមវិទ្យុបារាំងអន្តរជាតិថា​ ផែនទីខ្នាត ១/២៥០០០ ​មិន​មែន​ជា​ផែន​ទី​ថ្មី​ទេ តែ​ជា​ផែនទី​ដែល​ផលិត​ថ្មី​ តាម​សម័យ​ទំនើប​ឌីជីថល​ ៤.0​ ដែល​បាន​ធ្វើ​ជា​យូរ​មក​ហើយ​ និង​បោះពុម្ព​ដោយ​ប្រទេស​ដាណឺម៉ាក។

អ្នកស្រីអះអាង​ថា ​ផែនទី​ខ្នាតថ្មីនេះ​ បង្ហាញ​ច្បាស់​លាស់ ​ពី​ខ្សែ​ព្រំដែន​ បង្គោល​ព្រំដែន​ រួម​និង​ស្ថានភាព​ភូមិសាស្រ្តនៅ ​លើ​ដី​ជាក់​ស្តែង​ ងាយ​ស្រួល​ក្នុង​ការ​ប្រើ​ប្រាស់ មិន​ដូច​ផែន​ទី​បោន​ខ្នាត​ ១/១០០០០០ នោះ​ទេ៕



You may also like

កម្ពុជា

សម រង្ស៊ី ចង្អុល​បង្ហាញថា តុលាការ​ក្រុង​ភ្នំពេញ​«ពិតជាអាយ៉ង​ ហ៊ុន សែន»

ប្រធាន​ស្ដីទី​គណបក្ស​សង្គ្រោះជាតិ បានពន្យល់ថា បើចង់ដឹងស៊ីជម្រៅ ពីករណី​ចោទប្រកាន់ ទៅលើលោក កឹម សុខា តុលាការក្រុងភ្នំពេញ គួរកោះហៅរូបលោក ទៅសាកសួរ ដោយហេតុថា នៅក្នុងពេលដែលលោក កឹម ...
វិភាគ អត្ថាធិប្បាយ

អ្នកវិភាគ​ប្រៀប​ស្មារតី CNRP ទៅ​នឹង​បក្សី​«ហង្សទេព»​ដែល​មិន​ចេះ​ស្លាប់

ការខ្វែងគំនិតគ្នា ក្នុងរយៈពេល​ប៉ុន្មានថ្ងៃ​ចុងក្រោយ រវាងមន្ត្រីគ្រាក់ៗនៅក្នុងគណបក្សសង្គ្រោះជាតិ នឹងមិនធ្វើឲ្យគណបក្សនេះ រងការប្រេះឆានោះទេ។ ផ្ទុយទៅវិញ វាគ្រាន់តែជាវិញ្ញាសារ ដ៏សំខាន់មួយ ដែលគណបក្សប្រឆាំង​ដ៏ធំមួយនេះ ត្រូវឆ្លងកាត់ និងជំនះឲ្យបាន។ នេះ បើតាមការលើកឡើង ...
កម្ពុជា

ពាក្យស្លោក​ពីរឃ្លា ដែលបណ្ឌិត កែម ឡី – មាស នី ជជែកគ្នា​២ខែ​មុន​ឃាតកម្ម

អ្នកវិភាគដ៏ល្បីឈ្មោះទាំងពីរនាក់ បានទស្សន៍ទាយដឹងជាមុនហើយ ពីវាសនា​របស់​គណបក្ស​ប្រឆាំង នៅកម្ពុជា និងថែមទាំងបានលើកឡើង ពី«ពាក្យស្លោក​ពីរឃ្លា» ដែល​ឆ្លុះបញ្ចាំង ពីបរិបទស្រុកទេស ក្នុងពេលអនាគតនោះផង។ នេះ បើតាម​ការលើកឡើង របស់​លោកបណ្ឌិត មាស ...

Comments are closed.

កម្ពុជា

សម រង្ស៊ី ថាមិនខ្វល់​ពីសំដី«កូនក្នុងខោ-កូនក្រៅខោ»​របស់ កឹម សុខា

កម្ពុជា

បន្ទាប់ពី​ទទួលវ៉ាក់សាំងចិន ហ៊ុន សែន សុំជំនួយ​វ៉ាក់សាំង​ ពីប្រទេសឥណ្ឌា

មេដឹកនាំកម្ពុជា លោក ហ៊ុន សែន បាន​ស្នើ​សុំជំនួយ​វ៉ាក់សាំង​បង្ការជំងឺកូវីដ១៩ (Covid-19) ពីប្រទេសឥណ្ឌា បន្ទាប់ពីប្រទេសនេះ បានប្រកាសដាក់​ឲ្យប្រើប្រាស់យ៉ាងបន្ទាន់ នូវថ្នាំវ៉ាក់សាំងរបស់ខ្លួន ឈ្មោះ«Covaxin» និង«Covishield» សម្រាប់ពលរដ្ឋឥណ្ឌា ...
កម្ពុជា

Covid-19៖ កម្ពុជាប្រកាស​រកឃើញ​ករណីឆ្លង កើនឡើង​ដល់៤៣៩នាក់

មកទល់នឹងព្រឹកថ្ងៃអាទិត្យ​ទី១៧ ខែមករា ឆ្នាំ២០២១នេះ កម្ពុជាប្រកាសបានរកឃើញ ករណីឆ្លងជំងឺកូវីដ (Covid-19) កើនឡើង​ដល់៤៣៩នាក់ បន្ទាប់ពីបានរកឃើញករណីឆ្លង លើពលករខ្មែរ​៣នាក់បន្ថែមទៀត ដែលទើបធ្វើដំណើរ​មកពីប្រទេសថៃ។ នេះ បើតាមសេចក្ដីប្រកាសព័ត៌មាន របស់ក្រសួងសុខាភិបាលកម្ពុជា ...