កម្ពុជាដំណឹង

EU លើកជាថ្មី​ពីកង្វល់​ផ្នែក​សិទ្ធិមនុស្ស​និង​លទ្ធិប្រជាធិបតេយ្យ នៅ​កម្ពុជា

ស្នងការជាន់ខ្ពស់ នៃសហភាពអ៊ឺរ៉ុប ទទួលបន្ទុក​គោលនយោបាយ​ពាណិជ្ជកម្ម អ្នកស្រី សេស៊ីលីយ៉ា ម៉ាលស្រ្តុម (Cecilia Malmström) បានសំដែកក្ដីកង្វល់ជាថ្មីទៀត ចំពោះបញ្ហា សិទ្ធិមនុស្ស និងលទ្ធិប្រជាធិបតេយ្យ នៅក្នុងប្រទេសកម្ពុជា ចំពោះប្រមុខការទូតកម្ពុជា លោក ប្រាក់ សុខុន នៅក្នុងជំនួបមួយ កាលពីថ្ងៃម្សិលម៉ិញ នាអាគារធំនៃសហភាព​អ៊ឺរ៉ុប ក្នុងរាជធានី ព្រុយហ្សែល (ប្រទេសប៊ែលហ្សិក)។

ចេញពីជំនួបនោះ អ្នកស្រី សេស៊ីលីយ៉ា ម៉ាលស្ត្រុម បានបញ្ជាក់ថា វាជាកិច្ចពិភាក្សា ដែលធ្វើឡើង ដើម្បីបញ្ជាក់ឡើងវិញ ជាមួយភាគីកម្ពុជា អំពីកិច្ចព្រមព្រៀង អ៊ឺរ៉ុប-កម្ពុជា ស្ដីពីប្រព័ន្ធអនុគ្រោះពន្ធ «EBA» និងលទ្ធភាពនៃការដកប្រទេសកម្ពុជា ចេញពីកម្មវិធីនេះ។

អ្នកស្រីអះអាងថា អ្នកស្រីបានគូសបញ្ជាក់ឡើងវិញ អំពីកង្វល់របស់សហភាពអ៊ឺរ៉ុប អំពីស្ថានភាព លទ្ធិប្រជាធិបតេយ្យ សិទ្ធិមនុស្ស និងនីតិរដ្ឋ នៅក្នុងប្រទេសកម្ពុជា។

យ៉ាងណា ស្នងការជាន់ខ្ពស់អ៊ឺរ៉ុបរូបនេះ បានថ្លែងដោយសុទិដ្ឋិនិយមថា សហភាពអ៊ឺរ៉ុបនៅតែបើកទ្វាចំហរ ចំពោះការជជែកពិភាក្សា ជាមួយភាគីកម្ពុជា។

សម្រាប់ភាគីកម្ពុជាវិញ គេមិនឃើញមាន សេចក្ដីប្រកាសព័ត៌មានអ្វី នៅក្រោយជំនួបនោះទេ។ នៅលើគេហទំព័រ​របស់ក្រសួងការបរទេស និងសហប្រតិបត្តិការ​អន្តរជាតិ ក៏ដូចជា នៅលើទំព័រហ្វេសប៊ុក​​របស់ក្រសួង គេគ្រាន់តែឃើញ មានព័ត៌មានសរសេរថា គណៈប្រតិភូការទូតកម្ពុជា បានជួបជាមួយមេដឹកនាំ នៃសហភាពអ៊ឺរ៉ុបប៉ុណ្ណោះ។

ក្នុងជំនួបមួយ ជាមួយលោក «Scott Ryan» ប្រធានព្រឹទ្ធសភា​អូស្រ្តាលី កាលពីថ្ងៃទី១៩ ខែមករា ឆ្នាំ២០១៩ លោក ប្រាក់ សុខុន បានឲ្យដឹងថា៖

«ទាក់ទិននឹងបញ្ហា EBA ខ្ញុំនឹងជួបពិភ្សាជាមួយ ស្នងការពាណិជ្ជកម្មសហភាពអឺរ៉ុប ហើយជម្រាបជូន ពីវិធានការអ្វីខ្លះ ដែលរាជរដ្ឋាភិបាលកម្ពុជា បានធ្វើ ក៏ដូចជាផែនការ និងវិធានការអ្វីខ្លះ ដែលកម្ពុជានឹងធ្វើ នៅថ្ងៃអនាគត ពាក់ព័ន្ធលំហនយោបាយ ក៏ដូចជាសេរីភាពសារព័ត៌មាន និងកិច្ចការផ្សេងៗដូចជា សហជីពជាដើម។»

លោក «Umberto Gambini» ដែលជាជំនួយការ របស់លោកសមាជិក​សភា​អ៊ឺរ៉ុប «Ramon Tremosa» បានអះអាងថា នយោបាយរយៈពេល ១០ឆ្នាំ របស់សហភាពអ៊ឺរ៉ុប ដែលធ្វើឡើង តាមរយៈ «ការជជែក ការឃ្លាំមើល និងការសំដែង​ក្ដីកង្វល់»នេះ បាន​ទទួលលទ្ធផលមកវិញ ត្រឹមតែជា «ការបរាជ័យ» នៃសហភាពអ៊ឺរ៉ុបប៉ុណ្ណោះ ហើយស្ថានភាពក្នុងប្រទេសកម្ពុជា មានសភាព​កាន់តែអាក្រក់។

មន្ត្រីអ៊ឺរ៉ុបខាងលើ បានលើកយកមាត្រា១៩ នៃបទបញ្ជាលេខ «978/2012» របស់សហភាពអ៊ឺរ៉ុប មកបញ្ជាក់ថា៖

«សហភាពអឺរ៉ុប មានកាតព្វកិច្ចផ្នែកសីលធម៌ និងកាតព្វកិច្ចផ្នែកច្បាប់ ដើម្បីគោរពច្បាប់របស់ខ្លួន ជាពិសេសនៅត្រង់មាត្រា ១៩ នៃបទបញ្ជាលេខ “978/2012″។»

កាលពីដើមខែតុលា ឆ្នាំ២០១៨ សហភាពអ៊ឺរ៉ុបបានបើកនីតិវិធី ដែលមានរយៈពេល ៦ខែ និងបន្ថែម៦ខែទៀត ដើម្បីឈានទៅដក ប្រព័ន្ធអនុគ្រោះពន្ធ «EBA» ចេញពីប្រទេស​កម្ពុជា។

ចំណាត់ការនេះ ធ្វើឡើង បន្ទាប់ពីសហភាពអ៊ឺរ៉ុប បានមើលឃើញ ពីការបង្ក្រាបមិនប្រណីដៃ ពីសំណាក់របបដឹកនាំរបស់លោក ហ៊ុន សែន ទៅលើគណបក្សប្រឆាំង អង្គការសង្គមស៊ីវិល ដែលមិនរណបរដ្ឋាភិបាល និងទៅលើសាព័ត៌មានឯករាជ្យ ជាពិសសេស នៅចំពោះភាពមិនអើពើ នៃរបបដឹកនាំនេះ ក្នុងការងាកត្រឡប់ មករកការដឹកនាំ បែបប្រជាធិបតេយ្យសេរី ពហុបក្ស និងការគោរពសិទ្ធិមនុស្ស ឲ្យបានត្រឹមត្រូវវិញ។

ការសម្រេចខាងលើ ក៏ត្រូវបានសហភាពអ៊ឺរ៉ុប ធ្វើសេចក្ដីជូនដំណឹង ទៅកាន់រដ្ឋាភិបាលលោក ហ៊ុន សែន ក្នុងពេលនោះដែរ។ តែរបបដឹកនាំក្រុងភ្នំពេញ តាមរយៈក្រសួងការបរទេសរបស់ខ្លួន បានប្រតិកម្មតបទៅសហភាពអ៊ឺរ៉ុបវិញ ដោយហៅការបើកនីតិវិធីខាងលើ ថាជាទង្វើដ៏«អយុត្តិធម៌»បំផុត៕



You may also like

ដំណឹង

បារាំង-អាល្លឺម៉ង់ រួមគ្នា​ប្រាប់​មហាអំណាច​ចិន ឲ្យ​គោរព​គុណតម្លៃ EU

មហាយក្សពីររបស់សហភាពអ៊ឺរ៉ុប បារាំង-អាល្លឺម៉ង់ បានរំលឹកប្រទេសចិន អំពីគុណតម្លៃរបស់សហភាពអ៊ឺរ៉ុប (EU) ដើម្បីអាចឲ្យចំណងទាក់ទង ផ្នែកពាណិជ្ជកម្ម មានភាពកាន់តែប្រសើរឡើង។ នៅក្នុងដំណើរទស្សនកិច្ច នៅប្រទេសបារាំង លោក ស៊ី ជិនពីង ...
កម្ពុជា

តំណាង​ជាន់ខ្ពស់​អ៊ឺរ៉ុប​ជួប ប្រាក់ សុខុន រំឭក​ពីបញ្ហា​​«EBA»​​នៅ បាងកក

ជាជំនួបជាមួយលោក ប្រាក់ សុខុន រដ្ឋមន្ត្រីការបរទេស ដើម្បីពិនិត្យមើលឡើងវិញ អំពីជំហានទាំងឡាយ ដែលកម្ពុជាបានដើរ ឬបានឆ្លើយតបជាវិជ្ជមាន ក្នុងការវិលត្រឡប់ ទៅរកការដឹកនាំ តាមបែបប្រជាធិបតេយ្យ និងការគោរពសិទ្ធិមនុស្ស ដើម្បីជាថ្នូរនឹងការបញ្ឈប់ ...
កម្ពុជា

GDP ៖ គឺ​ថ្ងៃ៧មករា និង​បំណុលចិន ដែល​ប៉ះពាល់​ដល់​អធិបតេយ្យជាតិ

សម្រាប់គណបក្សប្រជាធិបតេយ្យមូលដ្ឋាន «GDP» ការទាមទាររបស់សហភាពអ៊ឺរ៉ុប តាមរយៈកិច្ចព្រមព្រៀងអ៊ឺរ៉ុប-កម្ពុជា នៃប្រព័ន្ធអនុគ្រោះពន្ធ «EBA» ក្នុងការលើកស្ទួយលទ្ធិប្រជាធិបតេយ្យ និងសិទ្ធិមនុស្សនៅកម្ពុជា មិនប៉ះពាលដល់អធិបតេយ្យភាពកម្ពុជា ជាដុំកំភួនទេ។ ផ្ទុយទៅវិញ គឺការដឹងគុណ និងសងគុណប្រទេសវៀតណាម ...

Comments are closed.

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...