ចាប់ពីថ្ងៃទី០១ ខែមិថុនា ឆ្នាំ២០២០នេះតទៅ «សារមន្ទីរទាំង៣»របស់អាជ្ញាធរជាតិអប្សរា នឹងបើកទ្វាឡើងវិញ ដើម្បីចូលទស្សនា ដោយមិនគិតថ្លៃ។ នេះ បើតាមសេចក្ដីជូនដំណឹង របស់ស្ថាប័នជាតិមួយនេះ ដែលចុះថ្ងៃខែ តាំងពីថ្ងៃព្រហស្បត្តិ៍ ទី២២ ខែឧសភា តែទើបនឹងចេញផ្សាយជាសាធារណៈ នៅថ្ងៃអាទិត្យនេះ។
សារមន្ទីរទាំង៣ ក្នុងរមណីយដ្ឋានអង្គរ ដែលគ្រប់គ្រង ដោយអាជ្ញាធរជាតិអប្សរា រួមមាន៖ (១) សារមន្ទីរព្រះនរោត្ដមសីហនុ – អង្គរ (២) សារមន្ទីរវាយនភណ្ឌប្រពៃណីអាស៊ី និង(៣) សារមន្ទីរឡេតានី។
បើតាមសេចក្ដីប្រកាស របស់អាជ្ញាធរជាតិមួយនេះ បានអះអាងថា ការប្រកាសបើកសារមន្ទីរទាំងបីទាំងវិញ ធ្វើឡើងដោយយោងតាមលិខិត របស់ក្រសួងសុខាភិបាល ដែលអនុញ្ញាត ឲ្យបើកសារមន្ទីរនានា ជូនភ្ញៀវជាតិ និងអន្តរជាតិ បានចូលទស្សនាឡើងវិញ បន្ទាប់ពីបានប្រកាសផ្អាក តាំងពីចុងខែមីនាមក ក្រោមការបង្ការ ទល់នឹងជំងឺ«Covid-19»។
តែវិធានការការពារនានា ដូចជា ការវាស់ស្ទង់កម្ដៅ ការលាងដៃដោយអាល់កុល (ឬជែល) ការពាក់ម៉ាស់ និងគម្លាតសុវត្ថិភាព នឹងត្រូវអនុវត្តន៍ នៅក្នុងសារមន្ទីរទាំងនោះ ដើម្បីបង្ការរលកទីពីរ នៃការរាតត្បាតជំងឺ ដ៏ចង្រៃ៕
