ក្រុមសង្គមស៊ីវិលក្នុងស្រុក ចំនួន«១៤១»អង្គការ-សមាគម បានចេញសេចក្តីថ្លែងការណ៍មួយ នៅថ្ងៃទី៣ ខែសីហានេះ ដើម្បីទទូចទៅរដ្ឋាភិបាល នៃរបបក្រុងភ្នំពេញ ឲ្យធ្វើការដោះលែងលោក រ៉ុង ឈុន ដែលពួកគេចាត់ទុកថា ជាអ្នកតស៊ូមតិដ៏ក្លាហានមួយរូប ក្នុងការការពារសិទ្ធិកម្មករ នៅក្នុងប្រទេសកម្ពុជា។
លោក រ៉ុង ឈុន ដែលជាប្រធានសហភាពសហជីពកម្ពុជា និងជាតំណាងក្រុមប្រឹក្សាឃ្លាំមើលកម្ពុជា ត្រូវបាននគរបាលចាប់ខ្លួន នៅផ្ទះរបស់លោក កាលពីយប់ថ្ងៃសុក្រ ទី៣១ ខែកក្កដា ឆ្នាំ២០២០ និងត្រូវបានបញ្ជូនខ្លួនទៅកាន់តុលាការ នៅថ្ងៃសៅរ៍ស្អែកឡើង។ នៅទីនោះ ចៅក្រមស៊ើបអង្កេត នៃសាលាដំបូងរាជធានី បានចោទប្រកាន់លោក រ៉ុង ឈុន ពី«បទញុះញង់ បង្កឱ្យមានភាពវឹកវរធ្ងន់ធ្ងរដល់សន្ដិសុខសង្គម» តាមបញ្ញត្តិមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ មុនពេលលោកត្រូវបានបញ្ជូនទៅឃុំខ្លួនបណ្ដោះអាសន្ន ដើម្បីរង់ចាំសវនាការ នៅពន្ធនាគារព្រៃស។
សេចក្តីថ្លែងការណ៍របស់ក្រុមអង្គការ-សមាគម បានសរសរថា៖
«ការចោទប្រកាន់ ដែលធ្វើឱ្យលោក រ៉ុង ឈុន ប្រឈមនឹងការជាប់ពន្ធនាគារ រហូតដល់ ២ឆ្នាំ គឺជាការរំលោភសិទ្ធិ និងសេរីភាពរបស់លោក ក្នុងការសម្ដែងមតិ ដែលត្រូវបានធានា ដោយរដ្ឋធម្មនុញ្ញ នៃព្រះរាជាណាចក្រកម្ពុជា។»
ក្រុមសង្គមស៊ីវិលទាំងនេះ បានរៀបរាប់ទៀតថា៖
«បន្ទាប់ពីមានការធ្វើទុក្ខបុកម្នេញ ពីសំណាក់អាជ្ញាធរ ជាងមួយទសវត្សរ៍ ការចាប់ខ្លួនចុងក្រោយ នៃប្រធានសហជីព ដែលគួរឱ្យកោតសរសើររូបនេះ គឺជាការគំរាមកំហែងដោយផ្ទាល់ ចំពោះប្រជាពលរដ្ឋកម្ពុជា ដែលគ្រាន់តែប្រើប្រាស់សិទ្ធិ ធានាដោយរដ្ឋធម្មនុញ្ញរបស់ខ្លួន ក្នុងការសម្ដែងមតិ។»
«សិទ្ធិនេះ មិនគួរត្រូវបានប្រឈមនឹងការភ័យខ្លាច ចំពោះការចាប់ខ្លួននៅពេលយប់ ពីសំណាក់នគរបាល ក៏ដូចជាការជាប់ពន្ធនាគារជាច្រើនឆ្នាំនោះទេ។ យើងខ្ញុំសង្ឃឹមថា រាជរដ្ឋាភិបាល នឹងអាចគោរពកាតព្វកិច្ចរបស់ខ្លួន ដើម្បីធានាសិទ្ធិក្នុងការបញ្ចេញមតិ ផ្អែកតាមរដ្ឋធម្មនុញ្ញ និងច្បាប់អន្តរជាតិ។ យើងខ្ញុំក៏សង្ឃឹមថា សាលាដំបូងរាជធានីភ្នំពេញ នឹងអាចទម្លាក់ចោលការចោទប្រកាន់ទាំងអស់ និងដោះលែងលោក រ៉ុង ឈុន ឱ្យមានសេរីភាពវិញ ឱ្យបានឆាប់ផងដែរ៕»
