លោក អេម៉ានុយអែល ម៉ាក្រុង (Emmanuel Macron) ប្រធានាធិបតីបារាំង បានប្រើប្រាស់ឱកាស នៃប្រពៃណីជូនពរឆ្នាំថ្មី នៅយប់ថ្ងៃទី៣១ ខែឆ្នូ ឆ្នាំ២០២០ ដើម្បីលើកឡើង អំពីជំងឺរាតត្បាត កូវីដ-១៩ (Covid-19) យុទ្ធនាការចាក់ថ្នាំវ៉ាក់សាំង និងព្រឹត្តិការណ៍ជាច្រើនទៀត រួមនឹង«Brexit» ឬហៅថា ការចាកចេញរបស់ចក្រភពអង់គ្លេស ពីសហភាពអ៊ឺរ៉ុបផង។
បើតាមលោកប្រធានាធិបតី បានអះអាងថា ប្រទេសបារាំងបានងើបចេញ ពីវិបត្តិជំងឺរាតត្បាត ជាមួយនឹងឯកភាពជាតិ និងបទពិសោធន៍។ លោកថា រដ្ឋបារាំងបានធ្វើ «ជម្រើសដ៏ល្អ នៅចំពេលដ៏ចាំបាច់» ហើយថា ប្រទេសបារាំងជាប្រទេសមួយ ក្នុងចំណោមប្រទេសមួយចំនួន ដែលបានធ្វើអន្តរាគមន៍ ខ្លាំងជាងគេ ដើម្បីការពារ«យុវជន នយោជិក និងនយោជក»។
ជាមួយនឹងការថ្លែងគោរព ដល់វិញ្ញាណក្ខន្ធ នៃបណ្ដាជនរងគ្រោះបារាំង ប្រមាណជា៦៤០០០នាក់ លោក ម៉ាក្រុង បានបញ្ជាក់ថា៖
«ខ្ញុំទទួលខុស នូវរាល់ការខាតបង់ បែបណាក៏ដោយ [នៅក្នុងវិបត្តិនេះ]។»
លោកប្រធានាធិបតី ម៉ាក្រុង បានលើកឡើង អំពីយុទ្ធនាការចាក់ថ្នាំវ៉ាក់សាំង បង្ការជំងឺ«Covid-19» ដែលចាប់ផ្ដើមដំបូង នៅថ្ងៃទី២៧ ខែធ្នូកន្លងមក ដោយលោកបានធ្វើការធានាថា នឹងមិនអនុញ្ញាតឲ្យមានភាពយឺតយ៉ាវ ខុសប្រក្រតីនោះឡើយ។ នៅអំឡុងរដូវផ្ការីកខាងមុខ (រវាងពីចុងខែមីនា ដល់ចុងខែមិថុនា) យុទ្ធនាការចាក់វ៉ាក់សាំង នឹងចប់សព្វគ្រប់ នៅក្នុងប្រទេសបារាំង ក៏ដូចជានៅតាមបណ្ដាប្រទេសនានា ក្នុងសហភាពអ៊ឺរ៉ុប។
លោកនិយាយថា៖
«ពលរដ្ឋបារាំងគ្រប់រូប ដែលមានបំណង ចង់ចាក់វ៉ាក់សាំង នឹងទទួលបានការចាក់វ៉ាក់សាំង ដោយភាពរលូន និងទៅតាមលំដាប់លំដោយ នៃក្របខណ្ឌអាទិភាព។»
ប្រមុខរដ្ឋបារាំងបានឆ្លៀតឱកាស នៃប្រពៃណីជូនពរឆ្នាំថ្មី ដើម្បីឧទ្ទិសដល់បណ្ដាពលរដ្ឋបារាំងទាំងអស់ ដែលបានពលីជីវិត នៅក្នុងឆ្នាំ២០២០ ក្នុងនោះ មានលោកសាស្ត្រាចារ្យ សាមុយអែល ប៉ាទី (Samuel Paty) បណ្ដាទាហានបារាំង ដែលស្លាប់ក្នុងបេសកកម្ម នៅប្រទេសម៉ាលី (ខាងលិចទ្វីបអាហ្វ្រិក) និងមន្ត្រីអាវុធហត្ថបីនាក់ ដែលទើបត្រូវបានសម្លាប់ ព្រោះបានបំពេញភារកិច្ចរបស់ពួកគេ ដើម្បីអន្តរាគមន៍ក្នុងអំពើហិង្សាក្នុងគ្រួសារមួយ កាលពីសប្ដាហ៍កន្លងទៅជាដើម។
ចំពោះការចាកចេញ របស់ចក្រភពអង់គ្លេស ពីសហភាពអ៊ឺរ៉ុប ឬហៅថា «Brexit» ត្រូវបានលោក ម៉ាក្រុង ចាត់ទុកថា ជាផលវិបាក ដែលកើតចេញពីភាពរកាំរកូស នៅក្នុងសហភាព រួមផ្សំនឹងការភូតកុហកជាច្រើន និងការសន្យាទាំងឡាយ ដែលមិនពិត។ តែលោកប្រធានាធិបតី បន្តអះអាងថា ចក្រភពអង់គ្លេស នៅតែជា«មិត្ត និងសម្ព័ន្ធមិត្តរបស់យើង»ជាដរាប៕
