«គ្រវាត់ចោល» មិនដឹងនៅឯណា! ក្រុមអ្នកជួយសង្ក្រោះ ត្រូវបានហៅ ឲ្យធ្វើអន្តរាគមន៍ជាបន្ទាន់ នៅក្នុងយប់ថ្ងៃ អង្គារ ចូលមកថ្ងៃពុធ សប្ដាហ៍មុន នៅក្នុងសង្កាត់មួយ នៃរដ្ឋធានីប៊ែរឡាំង ប្រទេសអាល្លឺម៉ង់។
នៅពេលមកដល់ កន្លែងកើតហេតុ ក្រុមអ្នកជួយសង្គ្រោះ បានប្រទះឃើញបុរសម្នាក់ ដេកដួលនៅក្នុងសួនច្បារ កណ្ដាលថ្លុកឈាម យ៉ាងអាណោចអាធម។ បុរសរូបនោះ ស្ថិតក្នុងសភាពស្រវឹងជោគជាំ និងបាត់… លិង្គទៅណា រកមិនឃើញ។
សារព័ត៌មាន «Berliner Kurier» បានរាយការណ៍ថា ស្ថានភាពរបស់បុរស មានលក្ខណៈធ្ងន់ធ្ងរ ដោយសារលិង្គ បានដាច់មួយកំណាត់ ដោយត្រូវកាត់ផ្ដាច់ ដោយកាំបិទស្នៀត របស់បុរសនោះខ្លួនឯង។ គេមិនដឹងនៅឡើយថា តើសម្រេចកាត់ ផ្ដាច់ប្រដាប់ភេទខ្លួនដូច្នេះ ត្រូវបានធ្វើឡើង ក្រោមមូលហេតុអ្វីទេ។
បន្ទាប់ពីដាក់ជនរងគ្រោះ ដល់ដៃគ្រូពេទ្យរួច ក្រុមអ្នកជួយសង្ក្រោះ បានវិលទៅស្វែងរកលិង្គមួយកំណាត់ ដែលត្រូវកាត់ដាច់។ តែសាច់មួយដុំនោះ ត្រូវបាន«គ្រវាត់ចោល» មិនដឹងនៅទីណាឡើយ។
យ៉ាងណា អាជ្ញាធរអាល្លឺម៉ង់ បានប្រកាសបើកសំនុំរឿងមួយឡើង ដើម្បីស៊ើបអង្កេត រកឲ្យឃើញ ពីមូលហេតុ ដែលនាំឲ្យបុរស ដាច់ចិត្តកាត់លិង្គខ្លួនឯង យ៉ាងដូច្នេះ៕
