ដំណឹងអាស៊ី-ប៉ាស៊ីភិក

ប៉ាគីស្ដង់ បិទលំហអាកាស បន្ទាប់ពី​អះអាង​បានបាញ់​ទម្លាក់​យន្ដហោះ​ឥណ្ឌា

ប្រទេសប៉ាគីស្ដង់ បាន«បិទលំហអាកាស»របស់ខ្លួន រហូតដល់មានបទបញ្ជាថ្មី។ នេះ បើតាមការអះអាង របស់អាជ្ញាធរគ្រប់គ្រងដែនអាកាស របស់ប្រទេសប៉ាគីស្ដង់ បន្ទាប់ពីរដ្ឋាភិបាលនៃប្រទេសនេះ បានអះអាងមុននេះ ថាបានបាញ់ទម្លាក់យន្ដហោះពីរគ្រឿង របស់កងទ័ពអាកាសឥណ្ឌា។

នៅលើទំព័រទ្វីសធើររបស់ខ្លួន អាជ្ញាធរគ្រប់គ្រងដែនអាកាសប៉ាគីស្ដង់ បានឲ្យដឹងថា៖

«អាជ្ញាធរគ្រប់គ្រងដែនអាកាស បានបិទជាផ្លូវការ ដែនអាកាសប៉ាគីស្ដង់ រហូតដល់មានបទបញ្ជាថ្មី។»

អ្នកនាំពាក្យកងទ័ពប៉ាគីស្ដង់ ត្រូវបានស្រង់សំដី ដោយទីភ្នាក់ងារព័ត៌មានបារាំង «AFP» មកបញ្ជាក់ថា ការសម្រេចនេះធ្វើឡើង ដោយ«តម្រូវតាមកាលៈទេសៈ»។

កាលពីប៉ុន្មានម៉ោងមុន កងទ័ពប៉ាគីស្ដង់បានអះអាង តាមរយៈអ្នកនាំពាក្យរបស់ខ្លួន ថាបានបាញ់ទម្លាក់យន្ដហោះពីរគ្រឿង នៅក្នុងដែនអាកាសរបស់ខ្លួន។ យន្ដហោះមួយគ្រឿង បានធ្លាក់នៅក្នុងទឹកដីកាស្មៀរឥណ្ឌា និងមួយគ្រឿងទៀត បានធ្លាក់ក្នុងទឹកដីកាស្មៀរប៉ាគីស្ដង់ ហើយអ្នកបើកបរយន្ដហោះឥណ្ឌាមួយរូប ត្រូវបានកងទ័ពប៉ាគីស្ដង់ចាប់ខ្លួនបាន។

បើតាមអ្នកនាំពាក្យដដែលនោះ បានបញ្ជាក់ថា កងទ័ពប៉ាគីស្ដង់ មិនចង់ឲ្យកើតមានសង្គ្រាមទេ។

ក្រសួងការបរទេសប៉ាគីស្ដង់ ក៏បានអះអាងប្រហាក់ប្រហែលគ្នាដែរថា កងទ័ពជើងអាកាសប៉ាគីស្ដង់ បានដឹកនាំការវាយប្រហារមួយ នៅក្បែរបន្ទាត់ព្រំដែន ដែលត្រូវបានកំណត់ឡើង ថាជាតំបន់គ្មានយោធា។ បើតាមក្រសួងមួយនេះ ការវាយប្រហារខាងលើ បានបញ្ចៀសការបាត់បង់ជីវិតមនុស្ស និងការខាតបង់ផ្សេងទៀតជាច្រើន។

«គោលបំណងតែមួយ គឺបង្ហាញពីសិទ្ធិ ឆន្ទៈ និងសមត្ថភាពរបស់យើង ក្នុងការការពារខ្លួន។ (…) យើងគ្មានចេតនា បង្កើតភាពតានតឹងផ្នែកយោធានោះទេ ប៉ុន្តែយើងបានត្រៀមខ្លួនយ៉ាងពេញលេញ ដើម្បីឆ្លើយតប ប្រសិនបើយើងត្រូវបានគេបង្ខំ ដូចក្នុងហេតុការណ៍នេះ។»

ក្នុងពេលភ្លាមៗ រដ្ឋាភិបាលឥណ្ឌាមិនទាន់បញ្ចេញប្រតិកម្ម ជាផ្លូវការនៅឡើយ។

អ្នកទទួលខុសត្រូវម្នាក់ នៃរដ្ឋ «Jammu and Kashmir» ដែលស្ថិតក្នុងទឹកដីឥណ្ឌា បានថ្លែងនៅមុនហេតុការណ៍ថា យន្ដហោះប្រដេញរបស់កងទ័ពប៉ាគីស្ដង់ បានហោះរំលងពីលើតំបន់គ្មានយោធា នៃប្រទេសទាំងពីរ តែត្រូវបានបណ្ដេញចេញទៅវិញ ដោយកងទ័ពអាកាសឥណ្ឌា។

កាលពីថ្ងៃអង្គារម្សិលម៉ិញ រដ្ឋាភិបាលឥណ្ឌាបានអះអាងថា បានបើកការវាយប្រហារ តាមផ្លូវអាកាស ទៅលើទីតាំងរបស់ក្រុមឥស្លាមនិយមមួយ ដែលស្ថិតក្នុងជ្រលងភ្នំ នៃប្រទេសប៉ាគីស្ដង់។ បើតាមអាជ្ញាធរឥណ្ឌា បានឲ្យដឹងថា ក្រុមឥស្លាមនិយម «Jaish-e-Mohammed» ដែលជាក្រុមប្រដាប់អាវុធ​ដ៏សំខាន់មួយ ក្នុងការប៉ុនប៉ងបំបែកទឹកដី កំពុងរៀបចំធ្វើភេរវកម្មអត្តឃាតថ្មីមួយ ក្នុងប្រទេសឥណ្ឌា៕



You may also like

ដំណឹង

ប៉ាគីស្ដង់៖ យុវតីជំទង់​ពីរនាក់ ត្រូវបាន​សម្លាប់​ព្រោះថត​វីដេអូ​ជាមួយ​«ប្រុស»

យុវតីជំទង់​ពីរនាក់ ត្រូវបានសម្លាប់ កាលពីដើមសប្ដាហ៍ កន្លងមក ក្នុងភាគពាយ័ព្យ នៃ​ប្រទេស​ប៉ាគីស្ដង់ ដើម្បី«លាងសម្អាត»កិត្តិយស ឲ្យគ្រួសារ បន្ទាប់ពីពួកនាង បាន​បង្ហោះ​វីដេអូ នៅលើបណ្ដាញសង្កម ឃើញពួកនាង នៅជាមួយយុវជនម្នាក់។ ...
កម្ពុជា

បន្ទាប់ពី​ទទួលវ៉ាក់សាំងចិន ហ៊ុន សែន សុំជំនួយ​វ៉ាក់សាំង​ ពីប្រទេសឥណ្ឌា

មេដឹកនាំកម្ពុជា លោក ហ៊ុន សែន បាន​ស្នើ​សុំជំនួយ​វ៉ាក់សាំង​បង្ការជំងឺកូវីដ១៩ (Covid-19) ពីប្រទេសឥណ្ឌា បន្ទាប់ពីប្រទេសនេះ បានប្រកាសដាក់​ឲ្យប្រើប្រាស់យ៉ាងបន្ទាន់ នូវថ្នាំវ៉ាក់សាំងរបស់ខ្លួន ឈ្មោះ«Covaxin» និង«Covishield» សម្រាប់ពលរដ្ឋឥណ្ឌា ...
កម្រមាន

ឥណ្ឌា៖ ប្រកាសថាស្លាប់ ស្រាប់តែរស់ឡើងវិញ​ ពេលធ្វើ​កោសល្យវិច្ច័យ

ក្នុងរដ្ឋ​«Karnataka» (ភាគខាងត្បូងឥណ្ឌា) បុរសម្នាក់អាយុ២៧ឆ្នាំ ដែលត្រូវបានគ្រូពេទ្យ ប្រកាសថាស្លាប់ បន្ទាប់​ពីបានរងរបួសធ្ងន់ធ្ងរ នៅក្នុងគ្រោះថ្នាក់ដួលម៉ូតូ បានភ្ញាក់ដឹងខ្លួនមកវិញ នៅខណៈពេលសាកសព ត្រូវបានយកទៅ​ធ្វើកោសល្យវិច្ច័យ។ នេះ បើតាមមន្ត្រី​សុខាភិបាល​ឥណ្ឌា ដែលត្រូវបានស្រង់សំដី ...

Comments are closed.

ដំណឹង

សង្គ្រាមនៅអ៊ុយក្រែន ៖ អាមេរិកផ្ដល់ភ្លើងខៀវបញ្ជូនយន្តហោះ«F-16»

កម្ពុជា

ក្រុមការងារ អ.ស.ប អំពាវនាវ​ឲ្យកម្ពុជា​ដោះលែង​«ស្ត្រីសេរីភាព»​ជាបន្ទាន់

អ្នកជំនាញមួយក្រុមរបស់អង្គការសហប្រជាជាតិ បានអំពាវនាវទៅ​របបដឹកនាំរបស់លោក ហ៊ុន សែន ឲ្យដោះលែងអ្នកស្រី សេង ធារី មេធាវីខ្មែរអាមេរិកាំង ដែលគេស្គាល់ក្នុងពេលកន្លងមក ថាជា«ស្ត្រីសេរីភាព» តាមរយៈសម្លៀកបំពាក់តែងខ្លួនសម្ដែងមតិរបស់អ្នកស្រី នៅខាងមុខសាលាដំបូងរាជធានីភ្នំពេញ។ ក្រុមអ្នកជំនាញប្រឆាំងការឃុំឃាំងតាមទំនើងចិត្ត ...
កម្ពុជា

សភាអ៊ឺរ៉ុបទាមទារ​ឲ្យបន្ថែម​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា

នៅមុននេះបន្តិច សភាអ៊ឺរ៉ុបទើបនឹងអនុម័តដំណោះស្រាយមួយ ជុំវិញស្ថានភាពនយោបាយ ការគោរព​លទ្ធិ​ប្រជាធិបតេយ្យ និងសិទ្ធិមនុស្ស នៅក្នុងប្រទេសកម្ពុជា ដោយទាមទារឲ្យគណៈកម្មអ៊ឺរ៉ុប គ្រោងដាក់​ទណ្ឌកម្ម លើសេដ្ឋកិច្ច​និងមេដឹកនាំកម្ពុជា បន្ថែមទៀត។ ដំណោះស្រាយ៧ចំណុច ដែលមានលេខ «P9_TA(2023)0085» ...