កូរ៉េខាងជើងសាទរខ្លួនឯង អំពី«ជ័យជម្នះដ៏អស្ចារ្យ»លើ«Covid-19»
មេដឹកនាំកូរ៉េខាងជើង លោក គីម ជុង-អ៊ុន (Kim Jong Un) បានធ្វើការកោតសរសើរខ្លួនឯង ដោយអះអាងថា ជា«ជ័យជម្នះដ៏អស្ចារ្យ» ចំពោះការទប់ស្កាត់ និងប្រយុទ្ធទល់នឹងរោគរាតត្បាត «Covid-19»។
ទីភ្នាក់ងារព័ត៌មានផ្លូវការ «KCNA» របស់ក្រុងព្យុងយ៉ាង បានរាយការណ៍ពីសំដី របស់មេដឹកនាំខ្លួន កាលពីថ្ងៃសុក្រ ដោយអះអាងបន្ថែមថា លោក គីម នៅតែបញ្ជាឲ្យបន្តធ្វើការប្រុងប្រយ័ត្ន និងបន្តរក្សាវិធានការទាំងឡាយ ដើម្បីប្រយុទ្ធទល់នឹងរោគរាតត្បាតមួយនេះ។
វិធានការទាំងនោះ រួមទាំងការបិទព្រំដែន កូរ៉េ-ចិន ដែលត្រូវបានធ្វើ តាំងពីចុងខែមករាមកម្លេះ និងការដាក់កំហិត ឲ្យធ្វើចត្តាឡីស័ក យ៉ាងតឹងតែង ទៅលើប្រជាជនកូរ៉េខាងជើង។
លោក គីម ជុង-អ៊ុន ត្រូវបានទីភ្នាក់ងារព័ត៌មាន ស្រង់សំដីមកបញ្ជាក់ថា៖
«យើងរារាំងបាន យ៉ាងល្អិតល្អន់ នូវការវាយលុក នៃមេរោគដ៏សាហាវនេះ ហើយរក្សាបាន នូវស្ថានភាពប្រឆាំង ទល់នឹងការរាតត្បាត ប្រកបដោយស្ថេរភាព បើទោះជាក្នុងពិភពលោកទាំងមូល កំពុងរងវិបត្តិដ៏ធ្ងន់ធ្ងរក្ដី។»
មកដល់ថ្ងៃនេះ របបកុម្មុយនីស្ដិ៍កូរ៉េ បានបញ្ចេញតួលេខ ថាខ្លួនគ្មានករណីឆ្លងមួយសោះ នៅលើទឹកដីរបស់ខ្លួន ខណៈនៅជុំវិញពិភពលោក មេរោគដ៏ចង្រៃ បានឆ្លងដល់មនុស្ស ប្រមាណជា១១លាននាក់ និងបានសម្លាប់អ្នកជំងឺ ប្រមាណជា៥សែននាក់រួចហើយ។
ប្រទេសចំនួនពីរដែលជាប់ព្រំដែនកូរ៉េខាងជើង កំពុងបន្តទប់ស្កាត់ ពីការរលកចម្លងថ្មីៗទៀត នៃការរាតត្បាតនៅឡើយ។ កូរ៉េខាងត្បូង នៅបន្តរកឃើញករណីឆ្លង រវាងពី៤០ ទៅ៦០នាក់ ក្នុងមួយថ្ងៃ ខណៈប្រទេសចិន បានដាក់តំបន់ជាច្រើន ទៅក្នុងបម្រាមជាថ្មី កាលពីខែមិថុនាកន្លងមក។
«KCNA» បានរាយការណ៍បន្ថែមថា៖
«ប្រមុខដឹកនាំ បានរំឮកជាច្រើនដង ថាការលើកចេញ ដ៏ឆាប់រហ័សពេក នូវវិធានការណ៍ទាំងឡាយ ប្រឆាំងនឹងការរាតត្បាត នឹងនាំឱ្យមានវិបត្តិ ដែលមិនអាចស្មានដល់ និងមិនអាចជុសជុលបាន។»
ក្នុងពេលនេះ នរណាក៏ដោយ ដែលជាន់ទឹកដីកូរ៉េខាងជើង នឹងត្រូវដាក់ឲ្យធ្វើចត្តាឡីស័ក និងស្ថិតក្រោមការឃ្លាំមើល យ៉ាងតឹងតែង សម្រាប់រយៈពេល៣០ថ្ងៃ។ ក្រុមអ្នកការទូត និងអ្នកជំនាញ ប្រមើលឃើញថា ព្រំដែនរបស់ប្រទេសកុម្មុយនីស្ដិ៍ ទំនងជាអាចបន្តបិទ រហូតដល់ចុងឆ្នាំ២០២០៕
