ចុះងូតទឹកកក ដែលមានសីតុណ្ហភាព -២០ដឺក្រេ តើអាចទៅរួចឬទេ? ក្នុងថ្ងៃអង្គារទី១៩ ខែមករានេះ លោក វ្លាឌីមៀ ពូទីន (Vladimir Poutine) ប្រធានាធិបតីនៃប្រទេសរ៉ុស្ស៊ី បានចុះងូតទឹកកក ដ៏សែនត្រជាក់ ដើម្បីបូជាដល់បុណ្យ «Epiphany» និងពិធីបង្កក់ព្រះគ្រឹស្ដិ៍ ដែលជាពិធីបុណ្យ នៅក្នុងសាសនាគ្រឹស្ដិ៍ និកាយអូតូដុក (Orthodoxe)។
ក្នុងវីដេអូខាងក្រោម លោកប្រធានាធិបតី អាយុ៦៨ឆ្នាំ បានដោះខោអាវក្រាសៗចេញ ដោយទុកតែខោខ្លីពណ៌ខៀវផ្ទៃមេឃ និងបានដើរចុះទៅក្នុងអាងទឹកមួយ ដែលស្ថិតនៅខាងក្រៅអាគារ កណ្ដាលគំនរទឹកកក នៃសិសិររដូវដ៏ព្រឺព្រួច។ លោកបានជ្រមុជ ចូលទៅក្នុងទឹកចំនួន៣ដង ដោយធ្វើសញ្ញាសាសនាគ្រឹស្ដិ៍ផង មុននឹងងើបចេញពីទីនោះមកវិញ។
វិមានក្រឹមឡាំង បានអះអាងថា ការចុះមុជទឹកខាងលើ ជាការបង្ហាញនូវការគោរព ដល់ទំនៀមទម្លាប់សាសនាគ្រឹស្ដិ៍ ជាពិសេស«ពិធីបង្កក់ព្រះគ្រឹស្ដិ៍»៕
