ព័ត៌មានអាជ័យ៖ «Fake News» ពាក្យដែលត្រូវប្រើ បន្ទាប់ពី «បដិវត្តពណ៍»
«Fake News» និង «បដិវត្តពណ៍»៖ ថ្ងៃនេះ ត្មាត (អាត្មា) បានជួបសម្ភាសន៍ ជាមួយឯកឧត្តមសមមិត្ត បណ្ឌិត ដឿង រឹង ទីប្រឹក្សាទទួលបន្ទុក ខាងប្រតិកម្មរហ័ស ដើម្បីសុំការពន្យល់ លើពាក្យដ៏ពេញនិយមមួយ ដែលតែងត្រូវបានក្រុមមន្ត្រីផ្លូវការ របស់សម្តេចនាយក យកមកអះអាង ដើម្បីបដិសេធករណីរសើបណាមួយ ក្នុងឆ្នាំ២០២០នេះ។
ពាក្យនោះ គឺ«Fake News» ដែលជារឿយៗ ត្រូវបានបន្លឺចេញពីមាត់ របស់ក្រុមមន្ត្រីទាំងនោះ ទាំងបើពួកគេ មិនបានស្រាវជ្រាវ ឬប្រមូលបានព័ត៌មាន ច្បាស់លាស់ គ្រប់គ្រាន់ក៏ដោយ។
ឆ្លើយតបនឹងការសាកសួរ របស់ត្មាត ឯកឧត្តមសមមិត្ត បណ្ឌិត ដឿង រឹង បានធ្វើសុន្ទរកថាខ្លី ឲ្យដឹងពីគោលការណ៍មួយ នៅក្នុងជួរបក្ស និងរដ្ឋប្រជាជន បដិវត្តន៍កម្ពុជា។ នោះ គឺមិនត្រូវដឹងរឿង ច្រើនជាងសម្ដេចឡើយ។
ឯកឧត្តមសមមិត្ត បណ្ឌិត បានរៀបរាប់ ជាដំបូងឡើងថា៖
«បើអន្ទិតជ័យឯង សាកល្បងសួរពីរឿងព្រំដែន កាប់ព្រៃឈើ អំពើពុករលួយ ការបំផ្លាញបរិស្ថាន ជំងឺរាតត្បាតកូវិដ១៩ ។ល។ ពីមុនខ្ញុំនឹងឆ្លើយភ្លាម ថាជាសំនួររបស់ក្រុមចង់ធ្វើ”បដិវត្តពណ៍” ព្រោះកាលនោះ វាមានគណបក្សប្រឆាំង។ តែឥឡូវ ខ្ញុំនឹងឆ្លើយភ្លាមថា សំនួរទាំងនេះ ជាការលើកឡើង ពី”Fake News”! ហើយបើខ្ញុំថា”Fake News”ហើយ ត្រូវចប់ត្រឹមតែប៉ុណ្ណឹង ហាមសួរទៀត។ បើនៅបន្តសួរទៀត នឹងក្លាយជាបទញុះញង់ ឬបរិហារកេរ្តិ៍។»
«ហេតុអ្វី?» ត្មាតសួររន្ថើន។
«ព្រោះជាផ្លូវការ ខ្ញុំគ្មានរឿង ឲ្យអន្ទិតឯងដឹងទេ។»
ឯកឧត្តមសមមិត្ត បណ្ឌិត ដឿង រឹង បានពន្យល់មួយៗ ឲ្យដឹងបន្តថា តាមពិតទៅ មិនមែនឯកឧត្តមសមមិត្ត បណ្ឌិត មិនដឹងអ្វីសោះទេ តែជាគោលការណ៍ ត្រូវតែធ្វើមិនដឹង ឬបើសិនជាដឹង ក៏ត្រូវដឹងរឿង ឲ្យតិចជាងសម្ដេច។
«ជាគោលការណ៍ បើសម្ដេចបញ្ជាមក ឲ្យធ្វើដឹង នោះទើបខ្ញុំ ដឿង រឹង អាចដឹងរឿងបាន។ ឬបើមិនអញ្ចឹងទេ តើមានរឿងឯណា ទុកឲ្យសម្ដេចនិយាយ បានរាប់ម៉ោង ក្នុងពេលសំណេះសំណាល ម្ដងៗនោះ?»
«អញ្ចឹងបើតាមគោលការណ៍នោះ តើឯកឧត្ដមអាចដឹងរឿងអ្វីខ្លះ?»
«Fake News !»
«ចុះរឿង ដែលឯកឧត្ដមមិនដឹង?»
«Fake News ! កុំសួរទៀត។ បើបន្តសួរ ម៉េច… អន្ទិតឯង ចង់ញុះញង់ឬ?»
