លោកនាយឧត្ដមសេនីយ នេត សាវឿន និងគ្រួសារ ដែលជាសាច់ឈាម ជិតដិតនឹងលោកនាយករដ្ឋមន្ត្រី ហ៊ុន សែន ត្រូវបានស្រាវជ្រាវរកឃើញថា បានដើរ«ទិញផ្ទះនៅក្រៅប្រទេស ដោយប្រើទឹកប្រាក់ ប្រមាណជាង ១៥លានដុល្លារអាមេរិក»។ នេះ បើតាមរបាយការណ៍មួយ របស់វិទ្យុអាស៊ីសេរី ដែលចេញផ្សាយ ក្នុងយប់ថ្ងៃព្រហស្បត្តិ៍ ទី៣០ ខែមេសានេះ។
របាយការណ៍របស់វិទ្យុមួយនេះ បានរកឃើញថា អគ្គស្នងការនគរបាលជាតិ លោក នេត សាវឿន និងភរិយា គឺអ្នកស្រី ហ៊ុន គឹមឡេង ដែលត្រូវជាក្មួយស្រីរបស់លោក ហ៊ុន សែន រួមនិងកូនស្រីផង បានទិញភូមិគ្រឹះ និងគេហដ្ឋាន នៅក្នុងទ្វីបអ៊ឺរ៉ុប និងទ្វីបអាស៊ី យ៉ាងហ៊ឺហា ដោយប្រើទឹកប្រាក់វាល់លានដុល្លារ។
បណ្ដាគេហដ្ឋាន ដែលមានតម្លៃដ៏ថ្លៃៗទាំងនោះ មានដូចជា៖
- ផ្ទះមួយ ក្នុងប្រទេសសិង្ហបូរី តម្លៃ៣,៥លានដុល្លារអាមេរិក ដាក់ឈ្មោះអ្នកស្រី ហ៊ុន គឹមឡេង។
- ផ្ទះមួយ ក្នុងរាជធានី ឡុងដ៍ ចក្រភពអង់គ្លេស តម្លៃ២,៥លានដុល្លារអាមេរិក ដាក់ឈ្មោះអ្នកស្រី ហ៊ុន គឹមឡេង។
- ផ្ទះពីល្វែង ក្នុងផ្លូវតែមួយ នៃរាជធានីឡុងដ៍ ចក្រភពអង់គ្លេស តម្លៃជិត៧លានដុល្លាអាមេរិក ដាក់ឈ្មោះកញ្ញា នេត ធីតាវិឈុណា ជាកូនស្រីច្បង។
- ភូមិគ្រឹះភ្លោះ នៅតំបន់មាត់សមុទ្រ នៃប្រទេសស៊ីព្រ៍ (Cypre) តម្លៃជិត៣លានដុល្លារអាមេរិក ដាក់ឈ្មោះអ្នកស្រី ហ៊ុន គឹមឡេង ដែលទើបនឹងទិញ នៅខែមករា ឆ្នាំ២០២០នេះ។
លោក ជុន ច័ន្ទបុត្រ នាយករងទទួលបន្ទុកការផ្សាយ ជាភាសាខ្មែរ នៃវិទ្យុអាស៊ីសេរី បាននិយាយនៅក្នុងរបាយការណ៍នោះថា៖
«ទឹកប្រាក់សរុប ដែលលោក នេត សាវឿន និងអ្នកស្រី ហ៊ុន គឹមឡេង ព្រមទាំងកូនៗ ចំណាយទិញដីទិញផ្ទះ នៅក្រៅប្រទេស ដែលគេស៊ើបដឹង មកដល់ពេលនេះ មានតម្លៃជាង១៥លាន ដុល្លារសហរដ្ឋអាមេរិក។»
ប្រាក់… ទិញផ្ទះនៅក្រៅប្រទេស ?
ទាក់ទងសុំប្រតិកម្ម ដោយផ្ទាល់ពីវិទ្យុអាស៊ីសេរី លោក នេត សាវឿន និងអ្នកស្រី ហ៊ុន គឹមឡេង មិនបានឆ្លើយតប នឹងការរកឃើញ ខាងលើនេះទេ។
មកដល់ពេលនេះ មិនមានប្រភពណាមួយ បញ្ជាក់ថា តើលោក នេត សាវឿន និងក្រុមគ្រួសារ មានប្រាក់ពីណាមក ដើម្បីដើរទិញផ្ទះសម្បែង នៅជុំវិញពិភពលោក ដោយមានតម្លៃ ថ្លៃៗយ៉ាងដូច្នេះឡើយ។
នៅក្នុងឯកសារបែកធ្លាយមួយ ដែលត្រូវបានបង្ហោះ នៅលើបណ្ដាញសង្គម កាលពីអំឡុងខែមីនា ឆ្នាំ២០១៨ បានបង្ហាញពីតុល្យភាព គណនេយ្យធានាគារ ទាំងក្នុងនិងក្រៅប្រទេស ដែលដាក់ឈ្មោះ «Hun Kim Leng» មានប្រមាណជា២៦លានដុល្លារអាមេរិក។ នៅក្នុងឯកសារបែកធ្លាយដដែល គេឃើញមូលប្បទានប័ត្រមួយ ដែលដាក់ឈ្មោះ «Hun Kim Leng» បានប្រគល់ទឹកប្រាក់ទៅឲ្យឈ្មោះ «Neth Thida Vichhuna» ចំនួន៣លានដុល្លារ។
ក្នុងអំឡុងខែសីហា ឆ្នាំ២០១៩ លោក សម រង្ស៊ី មេដឹកនាំប្រឆាំង បានបង្ហោះនៅក្នុងទំព័រហ្វេសប៊ុករបស់លោក នូវឯកសារមួយចំនួន បង្ហាញពីការទិញសញ្ជាតិបរទេស (ពីប្រទេសចំនួនពីរ) ដោយក្រុមគ្រួសារលោក នេត សាវឿន។
ការបង្ហោះឯកសារ របស់លោក សម រង្ស៊ី នោះ ត្រូវបានលោក នេត សាវឿន តាមរយៈអ្នកនាំពាក្យអគ្គស្នងការនគរបាលជាតិ ប្រកាសច្រានចោល និងអះអាងថា ជារឿងមិនពិត និងជាឯកសារក្លែងក្លាយ។
ប៉ុន្តែនៅប៉ុន្មានខែក្រោយមក ទីភ្នាក់ងាររ៉យទ័រ បានចេញរបាយការណ៍ ដ៏វែងអន្លាយមួយ បង្ហាញបន្ថែមទៀតថា មិនត្រឹមតែលោក នេត សាវឿន និងក្រុមគ្រួសារប៉ុណ្ណោះទេ តែនៅមានមន្ត្រីគ្រាក់ៗ ច្រើននាក់ទៀត របស់រដ្ឋាភិបាលលោក ហ៊ុន សែន ក៏ទទួលបានសញ្ជាតិពីបរទេស ដោយប្រើទឹកប្រាក់ ទៅទិញដែរ៕
